2 हेरोद रज्वा यूहन्ना निउतरह्यक दादू याकूबहे तरवाललेके मरवा दारल।
झेलमेसे पत्रुसके छुट्लक
5 बहुत दिनसे झेलमे पत्रुसके अख्वारी हुइतिहिस, पर मण्डलीक मनै ओकर लग एक्के मन बनाके परमेश्वरसे प्राथना करतिहिँत। 12 परमेश्वर पत्रुसहे बँचैलिस कना बात जानके सेकल ते ऊ मर्कूस कना यूहन्नक दाई मरियमके घरेम गैल। वहाँ बहुत्ते विश्वासीन जमा होके प्राथना करतिहिँत। 13 जब पत्रुस दवार धकधकाइल, तब् रोदा नाउँ रहल नोकर्नी दवार खोले आइल। 14 पत्रुसके बोली चिन्हल ते खुशी होके बिना दवार खोल्ले भित्तर दौरके जाके बतादेहल, "पत्रुस दवारमे ठरह्याइल बताँ।" 15 पर ओइने उहिहे कलाँ, "तैँ बौरागिल बते।" पर ओकर कहल बात जात्तिक हो कहिके ऊ जिद्दी करल: तब् ओइने कलाँ, "ऊ ओकर स्वर्गदूत हुइहिस।" 16 पर पत्रुस दवार धकधकैती रहल। जब ओइने दवार खोल्लाँ ते ओइने पत्रुसहे देख्के छक्क परके दंग परगिलाँ।