झेलमेसे पत्रुसके छुट्लक
5 बहुत दिनसे झेलमे पत्रुसके अख्वारी हुइतिहिस, पर मण्डलीक मनै ओकर लग एक्के मन बनाके परमेश्वरसे प्राथना करतिहिँत। 6 जब हेरोद रज्वा पत्रुसके न्याय करक लग उहिहे मनैनके आघे नानक लग रहे, ते ओकर एक रात आघे पत्रुस दुईथो सिँक्रीलेके बँधल रहे। और दुईथो सिपाहिनके बिच्चेम सुतल रहे। और अख्वारी करुइया सिपाहिन दवारमे ठरह्याके झेलके अख्वारी करतिहिँत। 7 एकफाले प्रभुक एकथो स्वर्गदूत पत्रुसके लग्गे आके ठरह्यागिलिस। और उ कोठरीमे ओजरार चम्कल। और स्वर्गदूत पत्रुसके पस्रीमे हाँथेलेके मारके उहिहे जगैलिस, और कलिस, "झत्ते उठो।" तब् ओकर हाँथेमसे सिँक्री खुलके गिरगिलिस। 8 तब स्वर्गदूत पत्रुसहे कलिस, "लुग्गा और जुत्ता घाललेऊ।" तब् पत्रुस ओस्तेहेँके कर्लस। फेनदोस्रे स्वर्गदूत पत्रुसहे कलिस, "अपन कोट घालके मोरिक पाछेपाछे आऊ।" 9 तब् पत्रुस निकरके उ स्वर्गदूतके पाछेपाछे नेगे लागल। पर स्वर्गदूतके कर्लक बात जात्तिक हो कहिके पत्रुसहे पतै नै रहिस। पर दर्शन देखतुँ कहिके ऊ सोँचल। 10 जब सुरुक और दोसुर अख्वारी करुइया सिपाहिनके टोलीहे नहाङके ओइने लोहेक दवार थेन पुगगिलाँ, जोन दवार शहर ओहोँर लैजाइत। तब उ दवार अप्निहीँ खुलगिल। तब ओइने बाहेर निकरके एकथो गल्लीक डगर सोज गैलाँ। और जुरतेहेँ स्वर्गदूत पत्रुसहे छोरके चलगिलिस। 11 जब पत्रुसके होश खुल्लिस, तब् ऊ कहल, "आब महिन्हे जात्तिके पता होगिलस, कि प्रभु अपन स्वर्गदूत पठाके हेरोद रज्वक अधिकारसे और यहूदि नेतनके ज्या करक लग रहिँत, उ सक्कुहुनसे महिन्हे छुटकारा देलाँ।" 12 परमेश्वर पत्रुसहे बँचैलिस कना बात जानके सेकल ते ऊ मर्कूस कना यूहन्नक दाई मरियमके घरेम गैल। वहाँ बहुत्ते विश्वासीन जमा होके प्राथना करतिहिँत।