1 एन्टिओखिया शहरके मण्डलीमे बहुत्ते अगमवक्ता और गुरुनके रहिँत। ओइन्मेसे बारनाबास, निगेर कना शिमियोन, कुरेन शहरके लुकियस, प्रान्‍तीय शासक हेरोद रज्वक संग बह्रल-पहुँरल मनैया मनाहेम और शाऊल रहिँत। 2 जब यने परमेश्वरके आराधना करतिहिँत, और उपवास बैठल रहिँत। तब्बेहेँ पवित्र आत्मा ओइन्हे कलिन, "मोरिक सेवा करक लग बारनाबास और शाऊलहे अल्गे करदेऊ, जेहँकक लग मै ओइन्हे बलाइलतुँ।" 3 तब ओइने उपवास और प्राथना करके बारनाबास और शाऊलके उप्पर हाँथ धारके परमेश्वरके काम करक लग ओइन्हे पठादेलाँ।