1 एन्टिओखिया शहरके मण्डलीमे बहुत्ते अगमवक्ता और गुरुनके रहिँत। ओइन्मेसे बारनाबास, निगेर कना शिमियोन, कुरेन शहरके लुकियस, प्रान्‍तीय शासक हेरोद रज्वक संग बह्रल-पहुँरल मनैया मनाहेम और शाऊल रहिँत। 2 जब यने परमेश्वरके आराधना करतिहिँत, और उपवास बैठल रहिँत। तब्बेहेँ पवित्र आत्मा ओइन्हे कलिन, "मोरिक सेवा करक लग बारनाबास और शाऊलहे अल्गे करदेऊ, जेहँकक लग मै ओइन्हे बलाइलतुँ।" 3 तब ओइने उपवास और प्राथना करके बारनाबास और शाऊलके उप्पर हाँथ धारके परमेश्वरके काम करक लग ओइन्हे पठादेलाँ।

4 तब् बारनाबास और शाऊल पवित्र आत्मक अगुवाइसे एन्टिओखिया शहरमेसे सिलुकिया बन्दरगाहा शहरसम गैलाँ। और वहाँसे जहाजमे चहुँरके ओइने साइप्रस टापुक सलामिस बन्दरगाहामे चलगिलाँ। 5 और सलामिस बन्दरगाहामे पुग्के परमेश्वरके वचन ओइने यहूदिनके बैठक भवनमे सुनैलाँ। और ओइन्हे सहायता करक लग मर्कूस कना यूहन्ना ओइन्के संग रहे। 6 ओकर पाछे ओइने पूरा टापुमे एकथो नगरमेसे दोसुर नगरके यात्रा करलाँ। और सक्कुहुनसे पाछे ओइने पाफोस शहरमे पुगगिलाँ। तब् वहाँ ओइने बार-येशू कना एकथो जादूगरहे भेटैलाँ, जे यहूदी रहे, और ऊ झूँटा अगमवक्ता फेन रहे। 7 उ जादूगर साइप्रस प्रदेशके राजपाल सर्गियस पौलुसके संग बैठे। सर्गियस पौलुस एकथो बुद्धिमान मनैया रहे। राजपालहे शाऊल और बारनाबासहे बलाके परमेश्वरके वचन सुन्ना मन लग्लिस। 8 पर एलुमास जादूगर (काकरेकी ग्रीक भाषामे ओकर नाउँक मतलब जादूगरे हो।) बारनाबास और शाऊलके सामना करके येशूकमे विश्वास करनासे राजपाल सर्गियस पौलुसहे रोके खोजल। 9 पर शाऊल जेकर नाउँ पावल फेन हुइतिस, ऊ पवित्र आत्मालेके भरके जादूगरके ओहोँर हेरके कहल, 10 "ए शैतानके छावा, तैँ सारा धार्मिकतक दुश्मन हुइते, और तैँ पूरा कपट और दुष्टतासे भरल बते! का तैँ परमेश्वरके सोझ डगरहे तेहेँर कराई नै छोरबे? 11 आब हेर, परमेश्वर तुहिहे दण्ड दिहीँ। तैँ थोरिक समयसम आँधर होजिबे, और तैँ सूर्यहे नै हेरे भेटैबे।" तब् जुरतेहेँ कुहिरा और अंधार उहिहे टोपदेलिस, और केऊ ओकर हाँथ पकरके उहिहे सहायता करे कहिके ऊ यहोँर-ओहोँर टटोरे लागल। 12 तब् राजपाल यी हुइल देख्के प्रभु येशूकमे विश्वास करल। काकरेकी परमेश्वरके शिक्षासे ऊ अचम्मित होगिल रहे।

13 पावल और ओकर संघरियन पाफोस शहरमेसे समुन्दरके यात्रा सुरु करलाँ। और ओइने पामफिलिया प्रदेशके पर्गा नगरमे पुगगिलाँ; और मर्कूस कना यूहन्ना ओइन्हे छोरके यरुशलेम शहरमे फिर्ता होगिल। 14 पर ओइने पर्गा नगरमेसे निकरके गलातिया प्रदेशके पिसिदिया जिल्लक लग्गे एन्टिओखिया शहरमे पुगगिलाँ; और बिँसैना दिनमे यहूदी बैठक भवनके भित्तर जाके बैठ्गिलाँ। 15 आब मोशक नियम कानुन और परमेश्वरके अगमवक्तक किताबमेसे पहरके यहूदी बैठक भवनके शासकहुँक्रे ओइन्के थेन असिक कहिके पठैलाँ, "ए भैयो, तुहुरिन्के संग मनैनके लग कुछु उपदेश देना वचन बा कलेसे कहो।" 16 तब् पावल ठरह्याके ओइन्हे शान्त करक लग हाँथेलेके इशारा करके कहल, "हे इजरायलके मनै और परमेश्वरके डर मनुइया गैर-यहूदिनके, सक्कु जाने सुनो। 17 इजरायल जातिनके परमेश्वर हमार बाबा-पुर्खनहे चुनलेलाँ। और ओइने मिश्र देशमे परदेशी होके रहतिहिँत, तब ऊ ओइन्के उन्नति कर्लिन। और परमेश्वर अपन पराक्रमी शक्तिसे ओइन्हे उ देशमेसे बाहेर निकारके लयन्लिन। 18 हमार पुर्खन घनी-घनी परमेश्वरके आज्ञक उल्लङ्घन करलाँ। तभुन फेन उजाड़-ठाउँमे परमेश्वर लगभग चालीस सालसम हमार पुर्खनके रेखदेख कर्लिन। 19 तब् कनान देशके सातथो जातिनहे नाश पारके ओइन्के देश परमेश्वर हमार बाबा पुर्खनहे देलाँ, यी प्रक्रियामे लगभग चार सौ पचास साल लागल। 20 परमेश्वर शमूएल अगमवक्तक समयसम इजरायलके मनैनकेमे राज करक लग अगुवा नियुक्त करलाँ। 21 जब शमूएल ओइन्के अगुवै पलिरहीन, तब्बेहेँ ओइने एकथो रज्वक माँग करलाँ। तब परमेश्वर बेन्यामिन कुलके कीशके छावा शाऊलहे ओइन्के रज्वा बनैलिन। और ऊ शाऊलहे चालीस सालसम इजरायलके मनैनकेमे राज करक लग देलिन। 22 तब परमेश्वर शाऊलहे ओकर पदमेसे हटाके ओकर ठाउँमे दाऊदहे रज्वा बनैलाँ। ओकर बारेमे परमेश्वर गवाही देके कलाँ, ‘मै यिशैक छावा दाऊदहे मोरिक खोजल हस मनैया भेटैनु, जे मोरिक सक्कु इच्छा पूरा करी।’ 23 ओक्रेहे वंशमेसे परमेश्वर अपन वाचा अनुसार इजरायलके मनैनके थेन एकथो मुक्तिदाता अर्थात वहे येशूहे पठैलाँ। 24 जेकर अइनासे आघे यूहन्ना इजरायल देशके सक्कु मनैनहे प्रचार करल कि अपन मन बद्लो और पाप करना छोरदेऊ ताकि परमेश्वर तुहुरिन्के पाप माफ करिँत। और तब् मै तुहुरिन्हे डुब्कि देहम। 25 जब यूहन्नक सेवक काम पूरा हुइतिहिस, तब ऊ असिके कहल रहे, ‘तुहुरे का सोँच्थो, मै के हुइतुँ? मै ख्रीष्ट नै हुइतुँ। पर मोरिक पाछे एक जाने अइहीँ, मै हुँकार आघे यी लायकके फेन मै नै हुइतुँ कि मै हुँकार असिन नोकर बने सेकुँ जे जुत्तक टेनी खोल्ना काम करत।’ 26 हे मोरिक विश्वासी भैयो, तुहुरे जेने अब्राहामके सन्तान हुइतो, और परमेश्वरके डर मनुइया गैर-यहूदिनके, तुहुरिन सक्कु जहनके थेन मुक्तिक सन्देश पठागिल बा। 27 यरुशलेम शहरके मनै और ओइन्के शासकहुँक्रे येशू ख्रीष्टहे नै चिहिन्लाँ। और ओइने परमेश्वरके अगमवक्तनके उ वचनहे नै बुझ्लाँ, जोन वचन ओइने हरेक बिँसैना दिनमे पह्रिँत। तबेकमारे ओइने येशूहे दोषी ठहरैलाँ। और असिके ओइने परमेश्वरके अगमवक्तनके वचनहे पूरा करलाँ। 28 ज्यान सजायके कुछु कारण नै भेटैलेसे फेन ओइने येशूहे मुवाइक परी कहिके राजपाल पिलातसके थेन बिन्ती करलाँ। 29 और ओइने उ सक्कु चिज करलाँ, जोन बात पवित्र शास्त्रमे येशूक बारेमे लिखल बतिन। और ओइने येशूहे क्रूसमे किल्ला ठोकके मुवाँदेलाँ। ओकर पाछे ओइने हुँकिन्हे क्रूसमेसे उतारके चिहानमे धरलाँ। 30 पर परमेश्वर येशूहे मुअलमेसे फेनदोस्रे जिवादेलिन। 31 और बहुत दिनसम येशू गालील प्रदेशमेसे यरुशलेम शहरमे अउइया अपन चेलनके थेन देखा पर्तिरलाँ। और आब मनैनके थेन यने किल साक्षी बनल रहिँत। काकरेकी यने येशूहे देख्ले रहिँत। 32 हम्रे अप्निनके थेन वहे खुशीक खबर नन्थी, जोन खुशीक खबरके वाचा परमेश्वर हमार पुर्खनसे कर्ले रहिँत। 33 अर्थात परमेश्वर येशूहे मुअलमेसे फेनदोस्रे जित्ती बनाके वहे वाचा हम्रे यहूदिनके लग फेन पूरा कर्ले बताँ, जेने हुँकार सन्तान हुइती। जसिके भजनसंग्रहक किताबमे परमेश्वर येशू ख्रीष्टके बारेमे असिके कले बताँ।

‘तैँ मोरिक छावा हुइते। और आज मै तोरिक बाबा बनगिल बतुँ।’

34 परमेश्वर ख्रीष्टहे कबु नै सरना मेरिक मुअलमेसे फेनदोस्रे जित्ती बनैलाँ। यी सच्चाइहे असिके कहिगिल बा, ‘मै तुहुरिन्हे वहे पवित्र और अटल आशीर्वाद देहम, जोन आशीर्वाद मै दाऊद रज्वाहे देले रहुँ।’ 35 तबेकमारे दाऊद यी बात भजनसंग्रहक दोसुर ठाउँमे फेन असिके लिख्ले बा, ‘अप्नि अपन पवित्र जनके शरीर सरे नै देबी।’ 36 काकरेकी दाऊद रज्वा ते परमेश्वरके इच्छा अनुसार परमेश्वरके लक्ष्यहे पूरा करके मुगिलस, और अपन पुर्खनके संग मिलगिलस, और ओकर शरीर फेन सरगिलिस। यिहिसे हम्रे जाने सेक्थी कि यी बात दाऊद अपन बारेमे नै बोलतेहे। 37 पर दाऊद येशूक बारेमे बात करतेहे, जिहिहे परमेश्वर मुअलमेसे फेनदोस्रे जिवैलाँ, और हुँकार शरीर सरे नै भेटैलिन।

38 तबेकमारे हे मोरिक भैयो; तुहुरे यी जानलेऊ कि येशूक माध्यमसे पापके माफ हुइत कना खुशीक खबर तुहुरिन्हे देजाइता। 39 तुहुरे विश्वास करुइया हरेक जाने येशूएसे सक्कु चिजसे छुटकारा भेटाइल बतो, जोन छुटकारा मोशक नियम कानुनसे तुहुरिन्के लग सम्भव नै रहे। 40 तबेकमारे यी विषयमे तुहुरे हौश्यार रहहो। कहुँ असिन ना होए कि परमेश्वरके अगमवक्तनके किताबमे लिखल यी बात तुहुरिन्केमे आजाए।

41 ‘हे निन्दा करुइयन, हेरो और अचम्म मानो और नाश होजाऊ।

काकरेकी तुहुरिन्के समयमे मै एकथो काम करम।

असिन काम जेकर बारेमे केऊ बयान करदेलेसे फेन तुहुरे कबु विश्वास नै करबो।’"

42 जब पावल और बारनाबास बैठक भवनमेसे बाहेर निक्रतिहिँत, तब मनै ओइन्हे अनुरोध करलाँ कि अइना बिँसैना दिनमे फेन ओइने यहे विषयमे शिक्षा दिँत। 43 जब सभा ओराके विदा हुइलिन ते बहुत्ते यहूदी दलके नेतनके और यहूदी मत मनुइया भक्त मनै पावल और बारनाबासके पाछे लागगिलाँ। और ओइने पावल और बारनाबासहे परमेश्वरके अनुग्रहमे पलिरहहो कहिके आग्रह करलाँ। 44 दोसुर बिँसैना दिनमे लगभग पूरा शहरके मनै परमेश्वरके वचन सुनक लग जमा होगिलाँ। 45 पर यहूदी दलके नेतन मनैनके भीड़हे देख्के हिस्का मुए लग्लाँ। और पावलके बत्वाइल बातके विरोध कर्ती ओइन्के निन्दा करे लग्लाँ। 46 पर पावल और बारनाबास बिना डरैले कलाँ, "परमेश्वरके वचन सक्कुहुनसे आघे अप्निनेहे सुनैना जरुरी रहे। पर अप्निनके यिहिहे अस्वीकार करदेली, और अपनहे सदाकालके जीवनके अयोग्य ठहरालेले बती। ते आब हम्रे गैर-यहूदिनके थेन जैबी। 47 काकरेकी प्रभु हम्रिहिन्हे असिन आज्ञा देले बताँ, ‘मै तुहुरिन्हे गैर-यहूदिनके लग एकथो ओजरारके रुपमे चुन्ले बतुँ। ताकि तुहुरे संसारमे हरेक ठाउँक मनैनके थेन जाऊ, और ओइन्हे बताऊ कि परमेश्वर ओइन्हे कसिके बँचाई चहथाँ।’" 48 यी बात सुनके गैर-यहूदिनके खुशी होके परमेश्वरके वचनके प्रशंसा करे लग्लाँ, और सदाकालके जीवनके लग नियुक्त हुइल सक्कु जाने यम्ने विश्वास करलाँ। 49 तब परमेश्वरके वचन एन्टिओखिया शहरके सक्कु ईलाकामे फैलगिल। 50 पर यहूदी दलके नेतन पावल और बारनाबासके विरोधमे भक्त और प्रतिष्ठित जन्नी मनैनहे और शहरके मुख्य-मुख्य मनैनहे उक्सैलाँ। और ओइन्हे अपन साँधसिमानासे बाहेर पठादेलाँ। 51 तब परमेश्वर ओइन्हे अस्वीकार करदेले बतिन, और ओइन्हे दण्ड दिहिन कना देखाइक लग अपन गोरक धुर झराके पावल और बारनाबास ओइन्के थेनसे आइकोनिया शहरमे चलगिलाँ। 52 और आइकोनिया शहरमे चेलनके आनन्द और पवित्र आत्मालेके भरपूर होगिलाँ।