1 ओकरपाछे पावल एथेन्स शहरमेसे विदा होके कोरिन्थ शहरमे गैल। 2 ऊ पोन्टस प्रदेशके वासिन्दा अकिलास नाउँ रहल एकथो यहूदिहे भेटाइल। ऊ अपन जन्नी प्रिस्किलक संग इटालिया प्रदेशसे भर्खर आइल रहे। काकरेकी महाराजा क्लौडियस सक्कु यहूदिनहे* रोममेसे निकरके जैना आज्ञा देलक कारण ओइने कोरिन्थ शहरमे आइल रहिँत। पावल ओइन्हे वहाँ भेँटा करे गैल। 3 पावल और अकिलासके एक्के काम हुइलक ओहोँरसे ऊ फेन ओइनेहेँन्के संग बैठल, और काम करल। काकरेकी ओइन्के काम क्रिपाल बनैना रहिन।

4 हरेक बिँसैना दिनमे पावल बैठक भवनमे बहस करे, और यहूदी और ग्रीकहुँक्रिहिनहे सम्झाके येशू ख्रीष्टमे विश्वास करैना कोशिस करे। 5 जब सिलास और तिमोथी माकेडोनिया प्रदेशमे आपुग्लाँ, तब पावल क्रिपाल बनैना* छोरके वचन प्रचार करनामे व्यस्त होगिल। और यहूदिनहे येशूए ख्रीष्ट हुइताँ कना शिक्षा देहे लागल। 6 पर जब यहूदिनके विरोध करके पावलके निन्दा करे लग्लाँ। तब् ऊ अपन लुग्गक धुर झराके ओइन्हे कहल, "परमेश्वरके वचन अस्वीकार कर्लक कारण तुहुरिन्के खुनके दण्ड तुहुरिनेके जिम्मामे बा, मै निर्दोष बतुँ। आबसे मै गैर-यहूदिनके थेन जैम, और परमेश्वरके वचन प्रचार करम।"

7 तब् ऊ वहाँसे परमेश्वरके भक्ति करुइया गैर-यहूदी तीतस युस्तस नाउँ रहल मनैयक घरेम गैर-यहूदिनहे सिखाई गैल। ओकर घर यहूदी बैठक भवनके लग्गेहेँ रहिस्।

8 यहूदी बैठक भवनके शासक क्रिस्पसके पूरा परिवार प्रभुमे विश्वास करलाँ। और कोरिन्थ शहरमे रहुइया मनैनमेसे फेन बहुत्ते जाने पावलके वचन सुनके विश्वास करलाँ और डुब्कि लेलाँ। 9 एक रात दर्शनमे प्रभु पावलहे कलाँ, "ना डराऊ, पर बोल्ती जाऊ, और चुप ना लागो। 10 काकरेकी मै तोहाँरिक संग बतुँ, और केऊ तुहिन्हे आक्रमण करके नोकसान पुगाई नै सेकी। काकरेकी यी शहरमे मोरमे भरोसा करुइया बहुत्ते मनै बताँ।" 11 तबेकमारे परमेश्वरके वचन सिखैती पावल एक साल छे महिनासम ओइन्के संग रहल।

12 जब गलियोन अखैया प्रदेशके शासक बनल। तब् यहूदी दलके नेतन एक्केम मिलके पावलकेमे आक्रमण करलाँ, और उहिहे अदालतमे नन्लाँ। 13 और असिक कलाँ, "यी मनैया परमेश्वरके आराधना मनैनहे असिके करे सिखाइता, जोन मोशक नियम कानुनके उल्टा बा।"

14 जब पावल बोल्ही लागल रहे, तब्बेहेँ गलियोन शासक उ यहूदी दलके नेतनहे कहल, "हे यहूदिनके, यदि जात्तिके यी कुछु अन्याय या दुष्ट अपराधके बात रहत कलेसे मै तुहुरिन्के बात सुन्ना ठिक रहे। 15 पर यदि यी बहसके शब्द, नाउँ और तुहुरिन्के अपने मोशक नियम कानुनके सवाल हुइलक ओहोँरसे तुहुरे अप्निहीँ जानो। मै असिन बातके न्याय करना अस्वीकार करतुँ।"

16 तब् गलियोन शासक ओइन्हे अदालतमेसे भगादेहल। 17 तब् ओइने सक्कु जाने यहूदी बैठक भवनके शासक सोस्थेनेसहे पकरके अदालतके आघे पिट्लाँ। पर गलियोन उ बातके कुछु वास्ता नै करल।

18 ओकरपाछे पावल बहुत्ते दिनसम कोरिन्थ शहरमे बैठल। तब् विश्वासीनके संग विदा होके ऊ जहाजमे सिरिया प्रदेशमे चलगिल। ओकर संग प्रिस्किला और अकिलास फेन रहिँत। कौनो कसम खैलक कारण ऊ किंक्रिया नगरमे अपन भुट्ला खौरल। 19 ओइने तीनु जाने एफिसस शहरमे आपुग्लाँ। तब् पावल प्रिस्किला और अकिलासहे वहैँ छोरदेहल। और अप्ने भर एकथो बैठक भवनमे पैँठ्के यहूदी दलके नेतनसे बहस करे लागल।

20 तब् उ मनै पावलहे थोरिक दिन आकुर बैठ्ना बिन्ती करलाँ, तब् ऊ अस्वीकार करल। 21 पर ओइन्के संग विदा हुइबेर ऊ कहल, "यदि परमेश्वरके इच्छा रही कलेसे मै फेनदोस्रे तुहुरिन्के थेन घुमके अइबुँ।" तब् ऊ जहाजमे चहुँरके एफिसस शहरमेसे चलगिल।

22 जब पावल कैसरिया शहरमे उतरल, तब् उप्पर चहुँरके यरुशलेम शहरके मण्डलीहे भेटघाट करके नमस्कार करके एन्टिओखिया नगर ओहोँर गैल। 23 ऊ एन्टिओखिया नगरमे थोरिक दिन रहिके वहाँसे निकरके गलातिया और फ्रिगिया प्रदेश ओहोँरसे होके सक्कु चेलनहे हौसला देती अलग-अलग ठाउँमे गैलस।

24 उ समयमे अलेक्जेन्ड्रिया शहरमे बैठुइया अपोल्लोस नाउँक एकथो यहूदी एफिसस शहरमे आइल। ऊ एकथो सिपार अगमवक्ता और पवित्र शास्त्रमे सिपार और दक्ष रहे। 25 ऊ प्रभुक डगरके शिक्षा भेटाइल रहे। और आत्मामे हौसके ऊ येशूक विषयक बात ठिक ठिकसे बोल्ना और सिखैना काम करे। तभुन फेन ऊ यूहन्नक डुब्किक बात किल जानल रहे। 26 ऊ बैठक भवनमे हिम्मतसे बोले लागल। पर ओकर बोल्लक बात सुनके प्रिस्किला और अकिलास उहिहे अपन घरेम नन्लाँ। और परमेश्वरके डगरके मतलब आकुर फरछ्वारसे बुझादेलाँ।

27 अपोल्लोस अखैया प्रदेशमे जैना मन करल। तब् विश्वासीन उहिहे वहाँ जैना उत्साहा देलाँ। और उहिहे ग्रहण करिँत् कहिके वहाँक चेलनहे उत्साहा देके चिट्ठी लिख्लाँ। ऊ वहाँ पुग्के अनुग्रहसे विश्वास करुइया मनैनहे गजब सहायता करल। 28 काकरेकी ऊ पवित्र शास्त्रक वचनसे येशूए ख्रीष्ट हुइताँ कना बात साबित करके यहूदी दलके नेतनहे सक्कुहुनके आघे बिरकुल बिना जवाफके बनादेहल।