1 जब यहूदी मनैनके पेन्तिकोसके तिहुवारके* दिन अइलिन। उ सक्कु चेलनके एक्के ठाउँमे जुटल रहिँत। 2 तब् स्वर्गमेसे एकफाले भारी बयालके बौखा हस एकथो आवाज आइल। और ओइन्के बैठल पूरा कोन्तीमे फैलगिलिन। 3 तब ओइन्के आघे असिन आगीक मोँजा देखा पर्लिन, जोन मोँजक आकार जीभ हस रहिस। और उ अलग-अलग होके प्रत्येक जहनकेमे परगिलिन। 4 तब् ओइने सक्कु जाने पवित्र आत्मासे भरगिलाँ। और ओइन्हे पवित्र आत्मक देहल वरदान अनुसार ओइने मेरमेरके भाषामे बोले लग्लाँ।

5 वहे समयमे वहाँ संसारके हर देशमेसे परमेश्वरके डर मनुइया बहुत्ते यहूदी मनै तिहुवार मनाइक लग यरुशलेम शहरमे आके बैठल रहिँत। 6 तब् बौखक हस आवाज सुनके मनैनके भीड़ एक्के थेन जमा होगिल। और ओइने अचम्म होगिलाँ, काकरेकी ओइने सक्कु जाने अपन-अपन भाषामे चेलनहे बोलत सुनतिहिँत। 7 ओइन सक्कु जहनहे अचम्म लग्लिन, और ओइने एकदोसर जहनहे कहे लग्लाँ, "का यी बोलुइयन सक्कु गालील प्रदेशमे रहुइया मनै नै हुइँत? 8 ते यी का हुइता, कसिके ओइन्हे हम्रे सक्कु जाने हमार अपन-अपन भाषामे बोलत सुनती? 9 हमारमेसे यहाँ केऊ पार्थी ईलाकक, केऊ मादी ईलाकक और केऊ एलामी ईलाकक, केऊ मेसोपोटामिया प्रदेशके, केऊ यहूदिया प्रदेशके, केऊ कापाडोकिया प्रदेशके, केऊ पोन्टस ईलाकक और केऊ एशिया प्रदेशमे रहुइयन बती। 10 और हमारमेसे केऊ फ्रिगिया, पामफिलिया प्रदेशके, मिश्र देश और केऊ लिबिया देशके लग्गे परना कुरेनी शहरमेसे और केऊ जुन रोम शहरमेसे यरुशलेम शहरसम घुमे अइलक यहूदी और गैर-यहूदिनमेसे यहूदी मत मनुइया दुनु बती। 11 और केऊ क्रेट टापुक मनै और केऊ अरब देशके मनै फेन बती। और हम्रे अपन-अपन भाषामे परमेश्वरके महान कामके चर्चा करत ओइन्से सुनती।" 12 उ सक्कु जहनहे अचम्म लग्लिन। और ओइने अकमकाके एकदोसुर जहनसे असिक पुँछे लग्लाँ, "यकर मतलब का हो?" 13 पर दोसुर जाने मजाक उरैती कलाँ, "ओइने लावा अंगुरके मदसे मतवार होरलाँ।"

14 पर पत्रुस एघारथो निउतरह्यनके संग ठरह्याके ओइन्हे जोरसे कहल, "हे यहूदिया प्रदेशके मनै और यरुशलेम शहरके मनै, तुहुरिन्हे यी बात बुझ्ना जरुरी बा। तबेकमारे तुहुरे मोरिक बातहे ध्यान देके सुनो। 15 काकरेकी तुहुरिन्के सोँचल हस यने मतवार नै हुइल हुइँत। काकरेकी अभिन बेहानिक नौ किल बजल बा। 16 पर जोन घटना हमार बिच्चेम हुइता, ओकर बारेमे परमेश्वरके अगमवक्ता योएलके माध्यमसे पवित्र शास्त्रमे लिखल बात पूरा हुइता।

17 आखिरी दिनमे असिन हुई कहिके परमेश्वर कथाँ।

‘मै सक्कु मनैनहे मोरिक आत्मा देहम।

और तुहुरिन्के छाईछावन अगमवाणी बोल्हीँ।

और तुहुरिन्के जवान मनै दर्शन देख्हीँ।

और तुहुरिन्के बुह्राइल मनै सपना देख्हीँ।

18 उ समयमे, मै अपन सेबक और सेविकनहे अपन आत्मा देहम।

और ओइने अगमवाणी बोल्हीँ।

19 मै उप्पर आकाशमे अचम्मक चमत्कार देखैम।

और तरे पृथ्वीमे खुन, आगी और धुँवक मोँजक बद्रीमे अचम्मक चिन्हा देखैम।

20 प्रभुक महान और गौरवमय दिन अइनासे आघे सूर्य अंधार होजाई।

और जोन्ह्याँ खुन हस होजाई।

21 और उ समयसे आघे जे-जे परमप्रभुक नाउँ लिहीँ,

उ सक्कु जाने मुक्ति भेटैहीँ।’"

22 "हे इजरायलके मनै, यी बात सुनो, परमेश्वर येशूक माध्यमसे तुहुरिन्के बिच्चेम शक्तिशाली काम करके अचम्मक चिन्हा देखैलाँ। और यी बात सच्चा हो कहिके तुहुरिन्हे पतै बा। वहे चिन्हासे परमेश्वर नासरत गाउँक येशूहे अप्निहीँ पठैलाँ कहिके साबित फेन करलाँ। 23 परमेश्वरके ठहराइल लक्ष्य और पैलेहेँसे जानलेना ज्ञानके अनुसार ऊ तुहुरिन्के हाँथेम सौँपदेगिलाँ। तुहुरे अधर्मी मनैनके सहायतासे हुँकिन्हे किल्ला ठोकके क्रूसमे टँगाके मारदेलो। 24 पर तभुन फेन परमेश्वर मुअलमेसे हुँकिन्हे फेनदोस्रे जिवादेलाँ। काकरेकी येशू अपनहे मृत्युक अधिनमे धर्ले पलिरना सम्भव नै रहे। 25 काकरेकी येशूक बारेमे राजा दाऊद असिके कले बा,

‘मै प्रभुहे सदादिन हेर्ती रहुँ।

काकरेकी ऊ मोरिक दाहिन ओहोँर बताँ,

ताकि मै उ मनैनसे ना डराऊँ, जेने मोरिक नोकसान पुगाई खोज्थाँ।

26 तबेकमारे मै आनन्दसे भरगिल बतुँ।

और मै आनन्दसे अप्निक स्तुति करतुँ।

यकर संगसंगे मोरिक शरीर फेन आशामे जिती रही।

27 काकरेकी अप्नि महिन्हे मुअल नै रहेदेबी।

और ना ते अप्नि अपन पवित्र मनैयक लाहाशहे सरे देबी!

28 अप्नि महिन्हे जीवनके डगर देखैली।

अप्नि महिन्हे अपन हाजिरीमे आनन्दसे भरदेबी।’"

29 "हे मोरिक विश्वासी भैयो, हमार पुर्खा दाऊद रज्वक बारेमे यी जात्तिक हो कि ऊ मुअल। और ओकर लाहाशहे चिहानमे फेन धारगिलिस। और उ चिहान आज फेन वहैँ पलि बा। 30 ऊ एकथो परमेश्वरके अगमवक्ता हुइलक कारण यी जाने कि परमेश्वर कसम खाके उहिसे यी वाचा कर्ले बताँ, ‘मै तोरिक खानदानमेसे एकथो मनैयाहे तोरिक सिंहासनमे बैठ्वैम।’ 31 यी जानके कि भविष्यमे परमेश्वर का करे जाइतिहिँत। दाऊद रज्वा येशू ख्रीष्टके फेनदोस्रे जिउठ्नक बारेमे बात बत्वाइल। और ऊ कहल,

‘काकरेकी अप्नि महिन्हे मुअल नै रहेदेबी;

और ना ते अप्नि अपन पवित्र मनैयक लाहाशहे सरे देबी!’

32 यहे येशूहे परमेश्वर जित्ती बनैलाँ। यी बातके हम्रे सक्कु जाने साँखी बती। 33 आब ऊ स्वर्गमे परमेश्वरके दाहिन पाँजर सक्कुहुनसे ऊँच सम्मानके ठाउँमे विराजमान बताँ। और जसिके बाबा हुँकिन्से वाचा कर्ले रहिन, ओस्तेहेँके हुँकिन्हे पवित्र आत्मा देलाँ और वहे पवित्र आत्मा ऊ हम्रिहिन्हे देले बताँ, जसिके आज तुहुरे देख्थो और सुन्थो। 34 दाऊद रज्वा ते स्वर्गमे नै गैल रहे, तभुन फेन ऊ अप्निहीँ कहल:

‘प्रभु परमेश्वर मोरिक प्रभुहे कलाँ,

तुँ मोरिक दाहिन पाँजर बैठो,

35 जबसम मै तोहाँरिक दुश्मननहे तोहाँर अधिनमे ना करादिऊँ।’

36 तबेकमारे इजरायलके सक्कु मनै यी बात जानलिँत: कि परमेश्वर वहे येशूहे प्रभु और ख्रीष्ट दुनु ठहरैलाँ, जिहिहे तुहुरे क्रूसमे टँगैलो।"

37 जब मनै यी बात सुन्लाँ, तब ओइने अपनहे बहुत दोषी रहल महसुस करलाँ। ओइने पत्रुस और औरे निउतरह्यनसे पुँछे लग्लाँ, "हे भैयो, हम्रे का करी?" 38 पत्रुस ओइन्हे कहल, "अपन मन बदलके पाप करना छोरदेऊ, और तुहुरे प्रत्येक जाने अपन-अपन पापके माफिक लग येशू ख्रीष्टके नाउँमे डुब्कि लेऊ; तब् तुहुरे पवित्र आत्मक वरदान भेटैबो। 39 काकरेकी यी प्रतिज्ञा तुहुरिन्के लग, और तुहुरिन्के लरकनके लग और दूर-दूर रहल सक्कु मनैनके लग फेन हो, जेनहे प्रभु हमार परमेश्वर अपन थेन बलैहीँ।" 40 पत्रुस यी बात घनी-घनी कहिके ओइन्हे बिन्ती करल कि, "तुहुरे अपनहे अप्निहीँ यी दुष्ट पुस्तासे बँचाऊ।" 41 तब् जोन-जोन मनै पत्रुसके कहल बातहे स्वीकार करलाँ, ओइने डुब्कि लेलाँ; और वहे दिन विश्वासीनके उ समूहमे लगभग तीन हजार मनै ओइन्के संग थपगिलाँ।

42 ओइने निउतरह्यनके संग सिखिँत, और संगति करिँत। और ओइने प्रभुभोजमे शामिल हुइँत। और सक्कु विश्वासीन एक्के संग अपन खाना खाइँत, और हरदम प्राथनामे लग्ले रहिँत। 43 यरुशलेम शहरके सक्कु मनै अचम्म लग्तिक डर अनुभव करलाँ। और बहुत्ते चिन्हा और निउतरह्यन अचम्मक काम करलाँ। 44 और विश्वास करुइया उ सक्कु जाने एक्के संग बैठिँत। और ओइन्के थेन रलक सक्कु चिज ओइने एकदोसुर जहनहे बाँतिँत्। 45 ओइने अपन सम्पति और सामान बेँचबेँचके जिही-जिहिहे ज्या-ज्या चिजके जरुरी परिन, ओइन्हे उ चिज बाँटदिँत। 46 और ओइने प्रत्येक दिन एक्के मन बनाके मन्दिरमे एकजुट होके आराधना करिँत। और प्रभुभोजके लग एकदोसुर जहनके घरेम जमा हुइँत। और ओइने खुशी और शुद्ध मनसे मिल्जुलके खाना खाँइत। 47 और ओइने परमेश्वरके प्रशंसा करिँत। और सक्कु जाने यनसे खुशी रहिँत। और जोन-जोन मनैनहे मुक्ति मिलिन, ओइन्हे दिन-दिने प्रभु यनके समूहमे शामिल करादिन।