1 जब पत्रुस और यूहन्ना मनैनके संग बोल्तीए रहिँत, तब्बेहेँ पुजारीनके, मन्दिरके कप्तान और सदुकी दलके मनै ओइन्के थेन आगिलाँ। 2 ओइने महा जोरसे रिसागिलाँ। काकरेकी पत्रुस और यूहन्ना मनैनहे सिखाइतिहिँत कि जोन मनै मुसेकल बताँ, ओइन्हे परमेश्वर फेनदोस्रे जित्ती करादिहीँ, जसिके ऊ येशूहे मुअलमेसे फेनदोस्रे जिवादेलाँ। 3 और ओइने यूहन्ना और पत्रुसहे गिरफ्तार करके दोसुर दिनसम थानामे धर्ले रलाँ। काकरेकी संझा होसेकल रहे। 4 पर वचन सुनुइयनमेसे बहुत जाने येशूकमे विश्वास करलाँ। और वहाँ लगभग पाँच हजार थारु मनै रहिँत, जेने येशूकमे विश्वास करे लग्लाँ।

5 दोसुर दिन ओइन्के शासकहुँक्रे, यहूदी दलके नेतनके और यहूदी कानुनके गुरुनके यरुशलेम शहरके एकथो ठाउँमे जमा होगिलाँ। 6 उ सभामे शामिल रहल मनै यहूदी प्रधान पुजारी हन्नाससे भेँटा करलाँ। और कैयाफा, यूहन्ना, अलेक्जेन्डर और जतरा फेन प्रधान पुजारीक परिवारके रहिँत, ओइने सक्कु जाने यरुशलेम शहरमे जमा हुइल रहिँत। 7 और पत्रुस और यूहन्नाहे ओइने सक्कुहुनके बिच्चेम थरह्वाके पुँछ्लाँ, "यी मनैयाहे चोख्वाइक लग तुहुरे कोन शक्तिसे या कोन अधिकारके प्रयोग कर्ले बतो?" 8 तब पत्रुस पवित्र आत्मामे भरके यहूदी दलके नेतनहे कहल, 9 "हे मनैनके शासक और यहूदी दलके नेतनके, हम्रे एकथो कमजोर मनैयक भलाई कर्ले बती। और आज हम्रिहिन्हे पुँछ्पाँछ हुइता कि ऊ कसिके चोखाइल। 10 कलेसे तुहुरे सक्कु जाने और इजरायलके सक्कु मनै, तुहुरे यी जानलेऊ, कि यी काम नासरत गाउँक येशू ख्रीष्टके नाउँमे करगिल बा। वहे येशूहे तुहुरे क्रूसमे टँगादेले रहो। पर परमेश्वर हुँकिन्हे मुअलमेसे फेनदोस्रे जिवादेलाँ। आज हुँकारे नाउँसे यी मनैया तुहुरिन्के आघे चोखाके ठरह्याइल बा। 11 ख्रीष्ट येशू वहे पठरा हुइँत, जिहिहे तुहुरे राजमिस्ट्रीन बेकारके बा कहिके सम्झलो। वहे पठरा जगके मुख्य पठरा बनगिलस। 12 येशू बाहेक कौनो दोसुर जहनमे मुक्ति नै हो। काकरेकी स्वर्गक तरे मनैनके लग कौनो दोसुर नाउँ नै देगिल हो, जिहिसे हम्रिहिन्हे मुक्ति मिले सेके।"

13 जब ओइने पत्रुस और यूहन्नक हिम्मत देख्लाँ, और यने अनपढ़ और साधारण मनै हुइताँ कना पता पालेलाँ। तब् ओइन्हे अचम्म लग्लिन। और ओइने ओइन्हे जानलेलाँ कि यने येशूक संग रहतिहिँत। 14 पर चोख्वागिलक उ मनैयाहे पत्रुस और यूहन्नक संग ठरह्याइल देख्के यहूदी सभक मनै कुछु बोले नै सेक्लाँ। 15 तबेकमारे ओइन्हे ओइने महासभामेसे बाहेर जैना आज्ञा देलाँ। तब ओइने एकदोसुर जहनसे छलफल करे लग्लाँ, 16 "हम्रे यनहे का करी? यी ते फरछ्वारे बा कि यनसे एकथो असाधारण चमत्कार जरुर हुइल बतिन। और यी बात यरुशलेम शहरके मनै फेन जानसेकल बताँ। यी सच्चाइहे हम्रे अस्वीकार करे नै सेक्बी। 17 पर यी बात जनतनमे आकुर धेउर ना फैलजाए कहिके हम्रे यनहे धम्की देबी। ताकि ओइने येशूक नाउँ लेके आबसे फेनदोस्रे दोबारा किहुसे फेन बात ना बत्वाइँत।" 18 तब ओइने पत्रुस और यूहन्नाहे बलैलाँ, और ओइन्हे चेतावनी देके असिके कलाँ, "आबसे तुहुरे येशूक नाउँ लेके कुछु ना बोल्हो, और कुछु फेन ना सिखैहो।" 19 पर पत्रुस और यूहन्ना ओइन्हे जवाफ देलाँ, "तुहुरेहे न्याय करो कि का यी परमेश्वरके नजरमे सही बा कि हम्रे परमेश्वरके बात छोरके तुहुरिन्के बात मानी? 20 काकरेकी यी ते हम्रिहिन्से हुई नै सेकी, कि हम्रे ज्या देखल और सुनल बती ओकर बारेमे हम्रे कती रहे नै सेकब।" 21 तब ओइने ओइन्हे धम्की देके छोरदेलाँ। ओइने यी सम्झे नै सेकतिहिँत कि ओइने पत्रुस और यूहन्नाहे कोन आधारमे दण्ड देहे सेकजाई। काकरेकी सक्कु मनै यी घट्नक कारण परमेश्वरके प्रशंसा करतिहिँत। 22 जोन मनैया एकथो अचम्मक तरिकासे चोखाइल रहे, ओकर उमेर चालीस सालसे फेन धेउर रहिस।

23 पत्रुस और यूहन्ना छुट्के अपन संघरियनके थेन गैलाँ। और मुख्य पुजारी और यहूदी दलके नेतनके कलक सक्कु बात ओइने अपन संघरियनहे बतादेलाँ। 24 यी सुनके ओइने सक्कु जाने एक्के मन बनाके बरका आवाजमे परमेश्वरसे प्राथना करलाँ, "हे प्रभु, अप्निए हुइती जे स्वर्ग, पृथ्वी, समुन्दर और ओइन्केमे रहल सक्कु प्राणीनहे बनैली। 25 अप्नि पवित्र आत्मक माध्यमसे अपन सेबक हमार पुर्खा दाऊदके मुहेँसे कली।

‘गैर-यहूदिनके काकरे रिसैथाँ।

और मनै काकरे बिनाकामक षड़यन्त्र बनैथाँ?

26 ख्रीष्ट प्रभु और हुँकार अभिषेक करल मनैयक विरोधमे पृथ्वीक रज्वन एकजुट हुइलाँ।

और शासकहुँक्रे एक ठाउँमे जमा होगिलाँ।’

27 जात्तिकमे अप्निक अभिषेक कर्लक अप्निक पवित्र सेबक येशूक विरोधमे हेरोद रज्वा और पन्तियस राजपाल पिलातस दुनु जाने गैर-यहूदी और इजरायलीनके संग यहे शहरमे जमा हुइल रहिँत। 28 ओइने वहे करलाँ, ज्या अप्निक शक्ति और इच्छामे पैलेहेँ तय होगिल रहे कि अस्तेहेँके हुई परी। 29 आब हे प्रभु, ओइन्के धम्कीहे सुनी; और अपन दासहुँक्रिहिनहे अप्निक वचन पूरा हिम्मतसे सुनाई दैदी। 30 और चोख्वाइक लग अप्नि अपन हाँथ बह्राई कि चमत्कारके चिन्हा और अचम्मक काम अप्निक पवित्र सेबक येशूक नाउँसे होए।" 31 जब ओइने प्राथना करके सेक्लाँ ते जहाँ ओइने जमा हुइल रहिँत, उ ठाउँ हिलगिलस। और ओइने सक्कु जाने पवित्र आत्मासे भरगिलाँ। और ओइने परमेश्वरके वचन हिम्मतसे सुनैती रलाँ।

32 विश्वास करुइयनके मण्डली सक्कु जाने एक्के मन और एक्के आत्मक हुइल रहिँत। यहाँसम कि केऊ फेन अपन सम्पतिहे अपन नै कहिँत, पर ओइन्के सक्कु चिज साझा रहिन। 33 और निउतरह्यन महा शक्तिशाली तरिकासे प्रभु येशूक फेनदोस्रे जित्ती हुइलक गवाही देती रलाँ। और उ सक्कु जहनकेमे बरवार अनुग्रह रहिन। 34 और ओइन्मेसे केऊ फेन गरीब नै रहे। काकरेकी जेनके थेन जग्गाजमिन या घर रहिन, ओइने उ चिज बेँचबेँचके, बिकल चिजके मोल नानके निउतरह्यनहे दैदिँत। 35 और जिही-जिहिहे ज्या-ज्या चिजके जरुरी परिन, ओक्रेहे अनुसार निउतरह्यन ओइन्हे बाँटदिँत। 36 योसेफ नाउँ रहल साइप्रस टापुक एकथो लेवी रहे। जेकर नाउँ निउतरह्यन बारनाबास धर्ले रहिँत। जेकर मतलब हुइत "उत्साहा देहुइया।" 37 ओकर थोरचे जग्गा रहिस। और ऊ उहिहे बेँचदेहल, और मोलके रुपिया नानके मनैनहे बाँटक लग निउतरह्यनहे दैदेहल।