1 शाऊल प्रभु येशूक चेलनहे मुवैना धम्की देती रहल। और ऊ प्रधान पुजारीक थेन गैल। 2 तब ऊ "दमस्कस शहरमे रहल बैठक भवनके शासकहुँक्रिहिन्हे मोरिक परिचय देके चिट्ठी लिख्देऊ", कहिके अनुरोध करल। और "कौनो फेन थारु मनै और जन्नी मनै जेने ख्रीष्टके डगरमे नेंग्था, उ सक्कुहुनहे खोज-खोजके पकरके यरुशलेम शहरमे नाने भेटाऊँ", कहिके शाऊल अधिकार माँगल। 3 पर जब शाऊल और ओकर संघरियन यात्रा करतिहिँत। तब ओइने दमस्कस शहरके लग्गे पुग्लाँ ते एकफाले आकाशमेसे एकथो ओजरार ओकर चारु ओहोँर चम्कलिस। 4 तब ऊ भुइयाँमे गिर पर्लस। और ऊ परमेश्वरके असिन बोली सुनल, "हे शाऊल, हे शाऊल, तुँ महिन्हे काकरे सताइतो?" 5 तब शाऊल पुँछल, "हे प्रभु, अप्नि के हुइती?" तब् ऊ कलाँ, "मै येशू हुइतुँ; जिहिहे तुँ सताइतो। 6 पर उठ्के आब तुँ नगरमे जाऊ, और केऊ तुहिन्हे बतादी कि मै तुहिन्से का करवाई चहथुँ।" 7 जोन मनै ओकर संग जाइतिहिँत, ओइने चिमचाम रहिगिलाँ। काकरेकी ओइने बोली ते सुनतिहिँत, पर ओइने किहुहे फेन नै देखतिहिँत। 8 तब् शाऊल भुइयाँमेसे उठल, और आँखी खोलल ते ऊ कुछु फेन नै देखे लागल। और बाँकी मनै ओकर हाँथ पकरके उहिहे दमस्कस शहरमे लैगिलाँ। 9 तब् तीन दिनसम ऊ आँधर होगिल, और ना ते ऊ कुछु खाइल, और ना कुछु पिअल।

10 दमस्कस शहरमे हननिया नाउँ रहल प्रभु येशूक एकथो चेला रहे। उहिहे प्रभु येशू दर्शनमे कलाँ, "ए हननिया।" तब हननिया कहल, "मै यहैँ बतुँ प्रभु।" 11 तब् प्रभु हननियाहे कलाँ, "उठो, और ‘सोझ’ नाउँक गल्लीमे जाऊ। और वहाँ यहूदक घरेम शाऊल नाउँक टार्सस शहरके मनैयाहे खोजो। काकरेकी ऊ प्राथना करता। 12 शाऊल दर्शनमे देखल बा कि हननिया नाउँ रहल एकथो मनैया आके ओकरमे हाँथ धारे, ताकि ऊ फेनदोस्रे देख्नाहाँ होजाए।" 13 पर हननिया जवाफ देहल, "हे प्रभु, मै यी मनैयक बारेम बहुत मनैनसे सुनल बतुँ कि यी यरुशलेम शहरमे अप्निक पवित्र मनैनहे कत्थुक सतैले बा। 14 और यहाँ फेन जोन-जोन मनै अप्निकमे विश्वास करथाँ, ओइन्हे बहानके यरुशलेम शहरमे लैजाए कहिके यिहिहे मुख्य पुजारीनसे अधिकार मिलल बतिस।" 15 पर प्रभु उहिहे कलाँ, "तुँ जाऊ। काकरेकी मै यिहिहे गैर-यहूदिनके, रज्वनके और इजरायलीनके आघे मोरिक नाउँक प्रचार करक लग और मोरिक सेवा करवाइक लग रोजल बतुँ। 16 और मै उहिहे बतैम कि मोरिक बारेम बतैलक कारण उहिहे कसिन-कसिन दुःख उठाई परहिस।" 17 तब् हननिया उठ्के उ घरेम गैल जहाँ शाऊल रहे। और ओकरमे अपन हाँथ धारके कहल, "हे शाऊल भैया, महिन्हे उ प्रभु येशू पठैले बताँ, जिहिहे तुँ उ डगरमे देख्ले रहो, जोन डगर सोज तुँ आइल रहो। तुँ देख्नाहाँ हुई सेको, और पवित्र आत्मासे भरिपूर्ण हुई सेको कहिके ऊ महिन्हे पठैले बताँ।" 18 जुरतेहेँ ओकर आँखीमेसे सेवाँर हस कुछु चिज गिरलिस, और ऊ फेनदोस्रे देख्नाहाँ होगिल। तब् ऊ उठल और डुब्कि लेहल, 19 तब् खाना खाके ऊ बल भेटाइल। शाऊल बहुत्ते दिनसम दमस्कस शहरमे चेलनके संग रहल।

20 तब् जुरतेहेँ दमस्कस शहरके बैठक भवनहुँक्रिहिनमे "येशूए परमेश्वरके छावा हुइँत" कहिके ऊ येशूक प्रचार करे लागल। 21 तब् सुनुइयन भर सक्कु जाने अचम्म मानके कलाँ, "का यी वहे मनैया नै हो, जे उ मनैनहे यरुशलेम शहरमे खोब सताइल, जेने येशू ख्रीष्टकेमे विश्वास करिँत। और का यी वहे मनैया नै हो, जे ओइन्हे बहानके मुख्य पुजारीनके थेन लैजाइक लग आइल रहे?" 22 पर शाऊल आकुर धेउर शक्तिशाली रुपमे प्रचार करना सुरु करदेहल। और येशूए ख्रीष्ट हुइताँ कहिके ऊ असिन एकथो पक्का सबुत देहल कि दमस्कस शहरके यहूदिन कुछु फेन जवाफ देहे नै सेक्लाँ। 23 जब शाऊलके दमस्कस शहरमे रलक बहुत्ते समय बितगिलिस, तब् यहूदी दलके नेतन मिलके उहिहे मुवैना षड़यन्त्र बनैलाँ। 24 पर ओइन्के षड़यन्त्र शाऊलहे पता चलगिलिस: ओइने उहिहे मुवाइक लग रातदिन शहरके दवारमे नुकके बैठिँत। 25 एक दिन रातके समयमे ओइने शाऊलहे पठरक उ महा ढेंग देवालमे लैगिलाँ, जोन देवाल शहरहे घेरल रहे। तब चेलनके देवालके एकथो खुलल ठाउँमेसे लस्रीक प्रयोग करके छिट्वामे बैठ्वाके शाऊलहे तरे उतारदेलाँ। और असिके ऊ दमस्कस शहरमेसे बँचके निकरगिलस।

26 शाऊल यरुशलेम शहरमे गैल, और ऊ चेलनके संग शामिल हुइना कोशिस करल। पर ओइने सक्कु जाने शाऊलसे डराइल रहिँत। और शाऊल फेन आब जात्तिकमे येशूक चेला बनगिल बा कहिके ओइने विश्वास करे नै सेकतिहिँत। 27 पर बारनाबास शाऊलहे निउतरह्यनके थेन लैगिलस। और ओइन्हे फरछ्वारसे बतादेहल कि दमस्कस शहरमे जैना डगरमे शाऊलहे येशू कसिन दर्शन देले रहिस। और प्रभु उहिसे बात बत्वैलिस। और कसिके शाऊल दमस्कस शहरमे येशूक नाउँक प्रचार बिना डरैले कर्लस। 28 निउतरह्यन बारनाबासके बातमे विश्वास करलाँ। तबेकमारे शाऊल यरुशलेम शहरमे निउतरह्यनके संग रहे लागल। और येशू ख्रीष्टके नाउँक प्रचार बिना डरैले करे लागल। और ऊ यरुशलेम शहरके प्रत्येक ठाउँमे गैलस। 29 और शाऊल ग्रीक भाषा बोलुइया यहूदिनके संग बात बत्वाए और ओइन्से वाद-विवाद करे। पर ओइने उहिहे मुवाइक खोजतिहिँत। 30 जब दोसुर विश्वासी भैयन यी बातके बारेम पता पैलाँ ते ओइने शाऊलहे कैसरिया शहरमे लैगिलाँ। और वहाँसे ओइने उहिहे जहाजमे बैठ्वाके टार्सस नगरमे पठादेलाँ, जोन नगर ओकर अपन ठाउँ रहिस। 31 असिके सारा यहूदिया प्रदेश, गालील प्रदेश और सामरिया प्रदेशके मण्डलीमे शान्ति होगिलिन, और मण्डली बल्गर होगिल। प्रभुक डरमे नेंग्ती और पवित्र आत्मासे हौसती बहुत्ते मनै प्रभु येशूकमे विश्वास करलाँ।

32 तब असिके हुइल कि पत्रुस उ सक्कु प्रदेशके प्रत्येक ठाउँमे गैलस, और परमेश्वरके उ पवित्र मनैनहे भेँटा करे गैल, जेने लुद्दा नगरमे रहिँत। 33 ऊ वहाँ एनियास नाउँक कौनो एकथो मनैयाहे भेटाइल, जे आठ सालसे कुँज रोगसे पठरीमे परल रहे। 34 पत्रुस उहिहे कहल, "ए एनियास! येशू ख्रीष्ट तुहिन्हे चोख्वादिहिँ। उठो, और अपन पठरी उसराऊ।" तब् ऊ जुरतेहेँ उठ्गिलस। 35 और उहिहे देख्के लुद्दा और शारोन नगरमे रहुइया सक्कु जाने प्रभु येशूकमे विश्वास करलाँ।

36 योप्पा नगरमे तबीता नाउँ रहल एकथो विश्वासी लौँदी रहे। ग्रीक भाषामे ओकर नाउँ डोरकास रहिस, जेकर मतलब हुइत एकथो हरणी। ऊ महा मजा-मजा काम करे, और गरीब मनैनहे सहायता करे। 37 जब पत्रुस लुद्दा नगरमे रहे वहे समयमे उ लौँदी बेमार होके मुगिलस; और मनै उहिहे लौह्वाके उपरका तल्हक एकथो कोन्तीमे धरलाँ। 38 लुद्दा नगर योप्पा नगरके लग्गे हुइलक ओहोँरसे चेलनके पता पालेलाँ कि पत्रुस वहाँ बा। तब ओइने पत्रुसके थेन दुईथो मनैनहे असिन बिन्ती करे पठैलाँ, "बिना बेर कर्ले हमार थेन आजाऊ।" 39 तब् पत्रुस उठ्के ओइन्के संग चलगिलस। वहाँ पुग्लाँ ते ओइने उहिहे उपरका तल्हक कोन्तीमे लैगिलाँ। वहाँ सक्कु विधवा जन्नी मनै पत्रुसके थेन ठरह्याके रुई लग्लाँ। उ विधवा जन्नी मनै पत्रुसहे उ सक्कु लुग्गा देखैलाँ, जोन लुग्गा डोरकास जित्ती रहल समयमे बनाइल रहे। 40 पर पत्रुस उ सक्कुहुनहे बाहेर पठाके ठेहुनी टेकल, और प्राथना करल, और उ लाहाश ओहोँर घुमके कहल, "तबीता, उठो!" तब् उ लौँदी आँखी उघारल, और पत्रुसहे देख्के उठ्के बैठगिलस। 41 पत्रुस डोरकासहे अपन हाँथेलेके पकरके जुरुकसे उठाइल। तब् ऊ परमेश्वरके पवित्र मनैनहे और विधवनहे बलाके ओइन्हे देखाइल कि डोरकास मुअलमेसे जित्ती होगिल बा। 42 यी बात सारा योप्पा नगरमे फैलगिलस; और बहुत्ते जाने प्रभु येशूकमे विश्वास करलाँ। 43 तब् पत्रुस बहुत्ते दिनसम एकथो सिमोन कना छालक काम करुइया मनैयक संग योप्पा नगरमे रलस।