1 तुहुरे परमेश्वरके दुलार लरका हुइतो, तबेकमारे तुहुरिन्के व्यवहार हुँकार स्वभाव अनुसार रहे परत। 2 ख्रीष्टहे उदाहरण बनाके दोसुर जहनहे प्रेम कर्ती जिओ, जे तुहुरिन्हे प्रेम करल और तुहुरिन्के पापहे उठाइक लग अपनहे बलिदान करदेहल। और परमेश्वर खुशी रहिँत, काकरेकी उ बलिदान हुँकार लग सुगन्धित अत्तरके बराबर रहिन।

3 पर तुहुरिन्के बिच्चेम छिनार काम, या कौनो मेरिक फेन अशुद्ध काम या कौनो चिजके फेन लालचके एकथो संकेत फेन नै रहे परत। काकरेकी यी काम परमेश्वरके पवित्र मनैनके लग सहि नै हुइँत। 4 और कौनो फेन लाज लग्तिक बात, और ना अपमान करना बात, ना कौनो लाज लग्तिक खेल्वार होए। काकरेकी यी चिज तुहुरिन्के लायकके नै हो, बेन तुहुरे परमेश्वरहे धन्यवाद देना काम करो।

5 काकरेकी तुहुरे मजासे जन्थो कि कौनो छिनार काम करना मनैया, या अशुद्ध काम करना मनैया, या लाल्ची मनैया एकथो उ मूर्ति पुजुइया हस हो, जेने यी संसारके चिजहे आराधना करथाँ। ओइने कबु फेन ख्रीष्ट और परमेश्वरके राजमे हकदार नै बन्हीँ। 6 उ मनै तुहुरिन्हे मूर्ख ना बनाइँत, जेने यी पाप करक लग बहाना बनैना कोशिस करथाँ; काकरेकी यहे कामके कारणसे परमेश्वरके रिस आज्ञा पालन नै करुइयनके उप्पर बरस्थिन। 7 तबेकमारे तुहुरे ओइन्के संग पाप भरल काम करक लग शामिल ना होऊ।

8 काकरेकी पहिले तुहुरे अंधारमे रहतोहो, पर जबसे तुहुरे प्रभुक मनै बनगिल बतो, तुहुरे ओजरारमे बतो। तबेकमारे तुहुरिन्हे ओस्तेहेँ मनैनके हस जिए परत, जेनके सम्बन्ध ओजरारसे बतिन। 9 काकरेकी यदि कौनो मनैया ओजरारमे बा कलेसे ओकर व्यवहार मजा और धार्मिक रथिस, और ओकरमे भरोसा करे सेकजाइत। 10 और परमेश्वरहे खुशी बनाइक लग सिख्ना कोशिस करो। 11 तुहुरे ओइन्के संग पाप भरल काम करक लग शामिल ना होऊ, बेन ओइन्हे यी काम गलत हो कहिके बतादेऊ। 12 काकरेकी अविश्वासीनके गुपचुपमे कर्लक कामके बारेमे बात बत्वैना फेन लाजके बात हो।

13 पर जब खराब मनै तुहुरिन्के मजा व्यवहारहे देख्थाँ, तब ओइन्के खराब व्यवहार फरछ्वार होजिथिन। यकर कारण ओइने अपन खराब कामहे छोरदिहीँ, और तुहुरिन्के हस मजा बनजिहीँ। 14 तबेकमारे एकथो असिन कहकुट बा,

"ए निदाइल मनैया जाग,

और मुअलमेसे जीजा;

तब ख्रीष्ट अपन ओजरार तोरमे चम्कैहीँ।"

15 तबेकमारे ध्यानसे हेरो, कि तुहुरे कसिन जीवन जिअतो; मूर्ख मनैनके हस नै होके बुद्धिमान मनैनके हस नेगो। 16 और अपन थेन रलक हरेक मौकाहे भलाईक काम करक लग प्रयोग करो। काकरेकी दिन खराब बा। 17 तबेकमारे मूर्ख ना बनो, पर प्रभु का चहथाँ कना जानके वहे करक लग कोशिस करके बुद्धिमान बनो।

18 और जाँर-दारु पिके मदुवा ना बनो, काकरेकी यी चिज मनैनहे असभ्य और अनियंत्रित तरिकासे व्यवहार करैना कारण बनजाइत। बेन, पवित्र आत्माहे अपनहे नियन्त्रण करे देऊ। 19 जब तुहुरे पवित्र आत्मक अधिनमे रबो कलेसे तुहुरे असिके कर्बो: जब तुहुरे एक्के थेन जमा हुइबो, तब तुहुरे भजन और पवित्र आत्मक देलक गीत गैबो। और अपन-अपन मनमे प्रभुक आघे गीत गैती स्तुति कर्बो। 20 और जोन कुछ हमार प्रभु येशू ख्रीष्ट कर्ले बताँ, ओकर कारण जबफेन हमार परमेश्वर बाबाहे हर बातके लग धन्यवाद देऊ। 21 और हम्रे येशू ख्रीष्टमे भक्ति कर्लक कारण एकदोसर जहनके अधिनमे रही।

22 हे जन्नी मनै, तुहुरे अपन-अपन थरवक अधिनमे बैठो, जसिके तुहुरे प्रभुक अधिनमे रथो। 23 काकरेकी थरवा जन्नीक कपार हो, जसिके ख्रीष्ट मण्डलीक कपार हुइँत; और ख्रीष्ट मण्डलीक मुक्तिदाता हुइँत, जोन कि हुँकार अपन शरीर हुइतिन। 24 जसिके मण्डली ख्रीष्टके अधिनमे बा, ओस्तेहेँके जन्नीनके फेन हरेक बातमे अपन-अपन थरवनके अधिनमे रहिँत।

25 हे थारु मनै, तुहुरे अपन-अपन जन्नीनहे प्रेम करो, जसिके ख्रीष्ट फेन हम्रे मण्डलीहे प्रेम करके हमार लग अपन जीवन दैदेलाँ, 26 ताकि ऊ मण्डलीहे पवित्र बनाइँत। ऊ मण्डलीहे परमेश्वरके वचनसे चोखा बनैलाँ। 27 ऊ अपन मण्डलीक लग फेन मुलाँ, ताकि ऊ अपन सक्कु मनैनहे सिद्ध बनाई सेकिँत। और हम्रिहिन् सक्कु जहनहे अपन हाजिरीमे नाने सेकिँत, जेनकेमे कौनो दोष या पाप या कौनो फेन मेरिक खराब बात ना रहिन; बेन ओइने पवित्र और सिद्ध होजाइँत।

28 अस्तेहेँके थारु मनै फेन अपन-अपन जन्नीनहे अपन शरीर हस प्रेम करिँत। जे अपन जन्नीहे माया करत ऊ अपनहे प्रेम करत। 29 काकरेकी कौनो मनैया कबु फेन अपन शरीरहे घृणा नै करत। बेन ओकर कदर करके पालपोष करत जसिके ख्रीष्ट मण्डलीक रेखदेख करथाँ। 30 काकरेकी हम्रे सक्कु जाने एक्के शरीरके अङ्ग हुइती, और उ शरीर ख्रीष्टके मण्डली हो। 31 जसिके पवित्र शास्त्रमे लिखल बा, "थारु मनैया अपन दाई-बाबाहे छोरके अपन जन्नीक संग एक्के होजाई, और उ दुनु जाने एक्के शरीर होजिहीँ।" 32 यी एकथो किम्ती और गम्भीर शिक्षाहे हम्रे बुझे सेक्थी। और मोरिक ओहोँरसे, मै यकर तुलना ख्रीष्ट और हुँकारमे विश्वास करुइयनसे करतुँ। 33 पर यी शिक्षा तुहुरिन्केमे फेन लागू हुइत; तुहुरे सक्कु जाने अपन-अपन जन्नीनहे अपन हस प्रेम करो, और जन्नी मनै फेन अपन-अपन थरवक आदर करिँत्।