इपाफ्रोडिटसहे प्रशंसा
25 मै इपाफ्रोडिटसहे तुहुरिन्के थेन पठैना जरुरी सम्झनु। जे मोरिक भैया और सहकर्मी और सिपाही-संघरिया और तुहुरिन्के पठाइल हुलाकी और जरुरी बातमे मोरिक सेवा करुइया मनैया हो। 26 मै उहिहे यी कारणसे फेन पठाइतुँ। काकरेकी तुहुरे सक्कुहुनसे भेँटा करक लग उहिहे गजब मन लागल रहिस। और ऊ बेमार बा कना बात तुहुरे सुनलेले बतो कहिके ऊ चिन्ता करतेहे। 27 और ऊ जात्तिके बेमार होगिल रहे, यहाँसम कि ऊ मुना हस फेन होगिल रहे। पर परमेश्वर उहिहे चोख्वैलाँ; ओकरमे किल नै, पर महिन्हे फेन परमेश्वर दया देखैलाँ ताकि मै उहिसे धेउर आकुर दुःख ना उठाऊँ, जत्रा दुःख मै पैलेहेँसे उठाइतुँ।