1 तबेकमारे हे मोरिक प्रिय भैयो, मै तुहुरिन्हे बहुत माया करथुँ, और तुहुरिन्से भेँटा करना आसरा हेरतुँ। तुहुरे मोरिक आनन्द और मोरिक मुकुट हुइतो। हे मोरिक प्रिय भैयो, अपन विश्वासमे बल्गर पलिरहो। 2 मै इयोदिया और सुन्तुखे दुनु जहनहे अनुरोध करतुँ कि ओइने एकदोसुर जहनमे एकतामे रहिँत। 3 हे सच्चा सहकर्मी, मै तुहिन्हे फेन अनुरोध करतुँ, कि तुँ उ जन्नी मनैनहे एकदोसुर जहनके संग एकतामे रहक लग सहायता करो। काकरेकी ओइने मोरिक संगसंगे खुशीक खबर फैलैना काममे क्लेमेसके संग और मोरिक दोसुर सहकर्मीनके संग मिलके मेहनत कर्ले बताँ। जेनके नाउँ जीवनके किताबमे बतिन।

4 प्रभुमे सदादिन आनन्दित रहो; मै फेनदोस्रे कहतुँ, आनन्दित रहो। 5 सक्कु जाने तुहुरिन्के कोमल स्वभावहे देखिँत। प्रभु झत्तेहेँ आइतताँ। 6 कौनो फेन बातके चिन्ता ना करो; पर हरेक परस्थितिमे तुहुरिन्के निवेदनहे प्राथना और बिन्तीक माध्यमसे धन्यवादके संग परमेश्वरके आघे धारो। 7 तब परमेश्वर तुहुरिन्हे शान्ति दिहीँ, यी उ शान्ति हो जिहिहे मनै बुझे नै सेक्थाँ। और यी शान्ति तुहुरिन्के मन और तुहुरिन्के विचारहे येशू ख्रीष्टमे सुरक्षित धारल रही।

8 तबेकमारे, हे मोरिक विश्वासी भैयो, अन्त्यमे जोन-जोन बात सच्चा बा। और जोन-जोन बात आदरणीय बा। और जोन-जोन बात धार्मिक बा। और जोन-जोन बात सुग्घुर बा। और जोन-जोन बात प्रशंसा करना लायकके बा। और जोन-जोन चिज महा मजा बा। और असिन चिज जेकर मनै सम्मान करथाँ। यहे सक्कु बातमे तुहुरिन्के मन लागल पलिरहे। 9 तुहुरिन्हे उ पाठके अभ्यास कर्ती रहे परी, उ निर्देशनके फेन जोन तुहुरिन्हे महिन्से मिलल बा। और उ नमूनक जोन मै अपन बात बत्वाके और कामके माध्यमसे तुहुरिन्हे देखैले बतुँ। तब शान्तिक परमेश्वर तुहुरिन्के संग रहिहीँ।

10 मै प्रभुमे गजब आनन्दित बतुँ, कि आब अतरा धेउर दिन पाछे मोरिक लग पहुँरा पठाके तुहुरे यी देखाइल बतो कि तुहुरे मोरिक बारेमे सोँच्थो; मै जन्थुँ कि यकर बारेम तुहुरे सुरुएसे सोँचतोहो। पर तुहुरिन्हे मौका नै मिलल रहे। 11 मोरिक थेन उ चिजके कमि बा, ज्या चिजके महिन्हे जरुरी बा कहिके मै यी नै कहथुइतुँ। पर जोन परस्थितिमे रलेसे फेन सन्तुष्ट रहे परत कहिके मै सिखसेकल बतुँ, तबेकमारे मै असिके कहतुँ। 12 थोरचे रलेसे फेन मै रहे सेकदरथुँ, और सक्कु चिज रलेसे फेन मै रहे सेकदरथुँ। और मोरिक थेन मोरिक जरुरीक सक्कु चिज रलेसे फेन या जब मोरिक थेन मोरिक जरुरीक चिज नै रलेसे फेन मै यी सक्कु परस्थितिमे रहे सिखलेहल बतुँ। 13 ख्रीष्टमे मै सक्कु चिज करे सेक्थुँ, जे महिन्हे शक्ति देहत। 14 तभुन फेन महिन्हे पहुँरा पठाके तुहुरे मोरिक दुःखमे शामिल हुइल बतो, और यी तुहुरे मजा काम करलो। 15 तुहुरे फिलिप्पीन अप्निहीँ फेन जन्थो, कि खुशीक खबरके सुरुमे मै माकेडोनिया प्रदेशमेसे विदा हुइबेर, देना और लेना काममे, तुहुरिन्हे बाहेक कौनो मण्डली शामिल मोरिक संग नै हुइल रहे। 16 अस्तेके जब मै थेसलोनिके शहरमे रहुँ, तब फेन तुहुरे मोरिक जरुरी पूरा करक लग तुहुरे एकचोसे धेउरचो मोरिक लग पैँसा पठैलो। 17 मै आर्थिक सहायता भेटाइक लग असिके नै कहथुइतुँ, बेन मै चहथुँ कि तुहुरिन्हे उ दयक लग ईनाम मिले, जोन दया तुहुरे देखैले बतो। 18 जोन सहायता तुहुरे इपाफ्रोडिटसके माध्यमसे पठैलो, उहिसे मै सक्कु चिज भेटागिनु। और जतरा महिन्हे भेटाई परना रहे, मै उहिसे फेन धेउरे भेटाइल बतुँ। यी मोरिक लग प्रशस्त बा, और तुहुरिन्के यी पहुँरा असिन बा जसिके कि तुहुरे परमेश्वरहे दान चह्रैले बतो, जोन मीठ बास देहत। परमेश्वर यिहिहे स्वीकार करथाँ, और यिहिसे परमेश्वर गजब खुशी हुइथाँ। 19 और मोरिक परमेश्वर फेन अपन उ सम्पतिसे तुहुरिन्के हरेक कमिहे पूरा करहीँ, जोन सम्पत्ति महिमासुन्धे येशू ख्रीष्टमे बा। 20 हमार परमेश्वर बाबक महिमा सदासर्वदा हुइती रहे। आमेन! (यकर मतलब हुइत, अस्तेहेँ होए।)

21 ख्रीष्ट येशूमे परमेश्वरके सक्कु पवित्र मनैनहे मोरिक ओहोँरसे नमस्कार कहिदेऊ। जोन विश्वासी भैयन मोरिक संग बताँ, ओइन्के ओहोँरसे फेन तुहुरिन्हे नमस्कार। 22 परमेश्वरके सक्कु पवित्र मनैनके ओहोँरसे विशेष करके महाराजक महलके विश्वासीनके ओहोँरसे तुहुरिन्हे नमस्कार बा। 23 हमार प्रभु येशू ख्रीष्टके अनुग्रह तुहुरिन्के संग रहे।