1 येशू जैतूनके पहाड़मे* गैलाँ। 2 येशू सक्करहीँ मन्दिर ओहोँर गैलाँ, और सक्कु मनै हुँकार थेन अइलाँ। तब ऊ बैठ्गिलाँ, और ओइन्हे शिक्षा देहे लग्लाँ। 3 जब येशू बोलतिहिँत, तब्बेहेँ यहूदी कानुनके गुरुन और फरिसीनके व्यभिचारमे पक्राऊ परल एकथो जन्नीहे नन्लाँ, और उहिहे सक्कुहुनके आघे ठरह्वैलाँ। 4 ओइने येशूहे कलाँ, "गुरुजी, यी जन्नी व्यभिचारके काममे पक्राऊ परल। 5 मोशक नियम कानुनमे असिन काम करुइयनहे पठरालेके मुवादरहो कहिके हम्रिहिन्हे आज्ञा देगिल बा। अप्नि यकर बारेमे का कहती?" 6 पर ओइने येशूहे फँसाइक लग और हुँकारमे आरोप* लगाई सेकजाइत कि कहिके असिक कहल रहिँत। पर येशू लिहुरगिलाँ, और अपन अंग्रीलेके भुइयाँमे लिखे लग्लाँ। 7 जब ओइने येशूहे घनिघनी पुँछे लग्लाँ ते येशू सोझे ठरह्याके ओइन्हे कलाँ, "तुहुरिन्केमेसे जे अभिनसम कौनो पाप नै कर्ले हो, वहे सक्कुहुनसे सुरुमे उ जन्नीहे पठरालेके मारे।" 8 तब् फेनदोस्रे लिहुरके येशू भुइयाँमे अपन अंग्रीलेके लिखे लग्लाँ। 9 जब ओइने यी बात सुन्लाँ, तब् ओइने भारीसे लेके सुरु करके छुटीसम् सक्कु जाने एक-एक करके वहाँसे चलगिलाँ। काकरेकी ओइन्हे पता रहिन कि पाप नै करुइया केऊ नै हो। तब येशू और उ जन्नी किल वहाँ रहिगिलाँ। 10 येशू सोझे ठरह्यैलाँ, और उ जन्नीहे हेरके कलाँ, "ए नारी, ओइने कहाँ चलगिलाँ? का केऊ तुहिन्हे दण्ड नै देहल?" 11 उ जन्नी मनैया येशूहे कहल, "प्रभु, केऊ नै देहल।" येशू कलाँ, "मै फेन तुहिन्हे दण्ड नै देहम। आब तुँ अपन घरे चलजाऊ, और आबसे फेनदोस्रे पापमे अपन जीवन ना बितैहो।"

12 येशू फेनदोस्रे ओइन्हे कलाँ, "मै वहे हुइतुँ, जे संसारहे ओजरार देहत। मोरिक पाछे लगुइया अंधारमे नै नेगी, पर ऊ उ ओजरार भेटाई, जोन ओजरार जीवन देहत।" 13 तब् फरिसीनके हुँकिन्हे कलाँ, "तुँ अपने बारेमे गवाही देहतो। तोहाँर गवाही सच्चा नै हो।" 14 येशू जवाफ देलाँ, "मै अपने बारेमे गवाही देथुँ, तभुन फेन मोरिक गवाही सच्चा बा। मै जन्थुँ कि मै कहाँसे अइनु, और कहाँ जाइतुँ। पर तुहुरे नै जन्थो कि मै कहाँसे अइथुँ या कहाँ जाइतुँ। 15 तुहुरे मनैनके मुह हेरके ओइन्के न्याय करथो। मै केक्रो न्याय नै करथुँ। 16 मै न्याय कर्नु कलेसे फेन, मोरिक न्याय सच्चा ठहरत। काकरेकी न्याय करुइया मै एक्केली नै हुइतुँ। पर मै बतुँ और महिन्हे पठुइया मोरिक बाबा बा। 17 मोशक नियम कानुनमे फेन दुईथो मनैनके गवाही सच्चा ठहरत कहिके लिखल बा। 18 आब मोरिक बारेमे गवाही देहुइया एकथो मै हुइतुँ, और मोरिक बारेमे गवाही देहुइया दोसर महिन्हे पठुइया मोर बाबा हो।" 19 ओइने हुँकिन्हे कलाँ, "तोहाँर बाबा कहाँ बा?" येशू जवाफ देलाँ, "तुहुरे ना महिन्हे चिहिन्थो ना ते मोरिक बाबाहे। तुहुरे महिन्हे चिहिन्तो कलेसे मोरिक बाबाहे फेन चिहिन्तो।" 20 यी बात येशू मन्दिरके अंग्नामे शिक्षा देहेबेर दान चह्रैना ठाउँ थेन ठरह्याके कले रहिँत। तब् केऊ फेन हुँकिन्हे नै पक्रल, काकरेकी हुँकार दुःख सहना और मुना समय अभिन नै आइल रहिन।

21 येशू ओइन्हे फेनदोस्रे कलाँ, "मै चलजिम तब तुहुरे महिन्हे खोज्बो और अपन पाप बिना माफ हुइले तुहुरे मुजिबो। जहाँ मै जैम, वहाँ तुहुरे आई नै सेक्बो।" 22 यहूदी दलके नेतन कलाँ, "यी आत्म-हत्या ते ना करक लग बताँ? काकरेकी यी ‘जहाँ मै जैम तुहुरे वहाँ आई नै सेक्बो’ कहिके कहतताँ।" 23 तब् येशू ओइन्हे कलाँ, "तुहुरे यहाँ तरे संसारमे जल्मल रहो, पर मै उप्पर स्वर्गमेसे अइनु। तुहुरे यी संसारके हुइतो। मै यी संसारके नै हुइतुँ। 24 मै तुहुरिन्हे कनु, ‘अपन पाप बिना माफ हुइले तुहुरे मुजिबो,’ काकरेकी मै वहे हुइतुँ कहिके तुहुरे विश्वास नै करबो कलेसे तुहुरे मुजिबो और तुहुरिन्के पाप माफ नै हुई।" 25 यहूदी दलके नेतन येशूहे पुँछ्लाँ, "अप्नि के हुइती ते?" येशू ओइन्हे कलाँ, "मै जबसे उपदेश देना सुरु कर्नु तब्बेहेँसे मै तुहुरिन्हे कती आइल बतुँ कि मै के हुइतुँ। 26 तुहुरिन्के न्याय करक लग महिन्हे बहुत बात कना बा। पर महिन्हे पठुइया सच्चा बा, और ओकर थेनसे मै ज्या सुन्नु, वहे बात मै संसारके मनैनहे कथुँ।" 27 ओइने अभिन फेन नै बुझ्लाँ कि येशू ओइन्से परमेश्वर बाबक बारेमे बात बत्वाइतिहिँत। 28 तबेकमारे येशू ओइन्हे कलाँ, "जब तुहुरे मै, मनैयक छावाहे क्रूसमे टँगैबो, तब मै वहे हुइतुँ कहिके तुहुरे पता पैबो। और मै अपने इच्छासे कुछु नै करथुँ, पर मै बाबक सिखाइल बात बोल्थुँ कहिके तुहुरे जन्बो। 29 महिन्हे पठुइया मोरिक संग बा। ऊ महिन्हे एक्केली नै छोरल हो, काकरेकी मै जबफेन वहे करथुँ, जेम्नेसे उहिहे खुशी मिल्थिस।" 30 बहुत्ते मनै जे-जे येशूक बत्वाइल बात सुन्लाँ, ओइने हुँकारमे विश्वास करलाँ।

31 येशू अपनमे विश्वास करुइया यहूदी दलके नेतनहे कलाँ, "यदि तुहुरे मोरिक वचन पालन कर्ती रबो कलेसे तुहुरे जात्तिकमे मोरिक चेला हुइतो। 32 तब् तुहुरे सच्चाई का हो कहिके जन्बो कलेसे सच्चाई तुहुरिन्हे स्वतन्त्र कराई।" 33 ओइने हुँकिन्हे जवाफ देलाँ, "हम्रे अब्राहामके सन्तान हुइती, और अभिनसम हम्रे केक्रो दास नै बनल हुइती। ‘तुहुरे स्वतन्त्र होजिबो’ कहिके अप्नि कसिके कहिदेली?" 34 येशू ओइन्हे जवाफ देलाँ, "जात्तिके, मै तुहुरिन्हे कहतुँ, पाप करुइया प्रत्येक जाने पापके दास हुइँत। 35 दास सदादिन घरेम नै रहत, पर छावा भर सदादिन घरेम रहत। 36 तबेकमारे छावा तुहुरिन्हे स्वतन्त्र कराइल कलेसे तुहुरे पक्कै फेन स्वतन्त्र हुइबो। 37 मै जन्थुँ कि तुहुरे अब्राहामके सन्तान हुइतो। पर तुहुरे महिन्हे मुवाइक खोज्थो, काकरेकी मोरिक शिक्षाहे तुहुरे स्वीकार नै करथो। 38 मै वहे बात बत्वाइतुँ, जोन बात मै देख्नु, जब मै अपन बाबक संग रहुँ। तुहुरे फेन वहे करथो, ज्या तुहुरे अपन बाबक मुहसे सुनल बतो।" 39 ओइने येशूहे कलाँ, "हमार पुर्खा ते अब्राहाम रहे।" येशू ओइन्हे कलाँ, "तुहुरे अब्राहामके सन्तान रतो कलेसे, अब्राहाम ज्या काम करल, वहे काम तुहुरे फेन करतो। 40 मै परमेश्वरके ओहोँरसे सुनल सच्चा बात तुहुरिन्हे कहल बतुँ। पर तुहुरे ते अब्राहाम ज्या करल, वहे करक छोरके महिन्हे मुवैना कोशिस करतो। 41 तुहुरिन्के बानी तुहुरिन्के बाबके हस बा।" यी बातमे ओइने हुँकार विरोध करके कलाँ, "हम्रे व्यभिचारमे जल्मलक नै हुइती! हमार बाबा एक्केथो बा, ऊ परमेश्वर हुइँत।"

42 येशू ओइन्हे कलाँ, "परमेश्वर तुहुरिन्के बाबा रहत कलेसे तुहुरे महिन्हे प्रेम करतो। काकरेकी मै परमेश्वरके थेनसे अइनु, और अब्बे मै यहाँ बतुँ। मै अपने इच्छासे नै अइनु, पर ऊ महिन्हे पठाइल। 43 मोरिक कलक बात तुहुरे काकरे नै बुझ्थो? काकरेकी मै ज्या बोल्थुँ, उहिहे तुहुरे स्वीकार करे नै चहथो। 44 तुहुरे अपन बाबा शैतानके हुइतो, और तुहुरे अपन बाबक इच्छा पूरा करना चहथो। ऊ ते सुरुएसे हत्यारा रहे, और सच्चाइसे ओकर कौनो मतलब नै हुइतिस। काकरेकी ओकरमे सच्चाई कना चिज कुछु नै हुइतिस। जब ऊ झूँट बोलत, ऊ अपने स्वभाव अनुसार बोलत। काकरेकी ऊ झूँटा हो, और झुँटके बाबा हो। 45 मै सच्चा बोल्थुँ, पर तुहुरे महिन्हे विश्वास नै करथो। 46 तुहुरिन्मेसे के महिन्हे पाप कर्लक दोष लगाई सेकी? यदि मै सच्चा बोल्थुँ कलेसे, काकरे तुहुरे मोरिकमे विश्वास नै करथो? 47 जे परमेश्वरके हो, ऊ परमेश्वरके बोली सुनत। तुहुरे परमेश्वरके नै हुइतो, तबेकमारे तुहुरे यी बोली नै सुन्थो।"

48 यहूदी दलके नेतन येशूहे कलाँ, "का हम्रे ठिक नै कहथुइति, कि तुँ एकथो सामरी हुइतो और तुहिन्हे भूत्वा लागल बा?" 49 येशू ओइन्हे जवाफ देलाँ, "महिन्हे भूत्वा नै लागल हो, पर मै अपन बाबक आदर करथुँ, और तुहुरे मोरिक अनादर करथो। 50 पर मै अपने आदर नै चहथुँ, पर एकथो बा, जे चाहत कि मोरिक महिमा होए, और न्याय करुइया वहे हो। 51 जात्तिके मै तुहुरिन्हे कहतुँ, यदि केऊ मोरिक वचन पालन करी कलेसे उ कबु नै मुई।" 52 यहूदी दलके नेतन येशूहे कलाँ, "आब हम्रिहिन्हे पक्का पता होगिलस कि तुहिन्हे भूत्वा लागल बा। अब्राहाम मुगिल, और अगमवक्तन फेन मुगिलाँ। पर तुँ कहतो, ‘केऊ मोरिक वचन पालन करी कलेसे उ कबु नै मुई।’ 53 का तुँ हमार पुर्खा अब्राहामसे भारी हुइतो? हुँकार मृत्यु होगिलिन, और अगमवक्तन फेन मुगिलाँ। तुँ अपनहे का समझ्थो?" 54 येशू जवाफ देलाँ, "यदि मै अपन आदर करम कलेसे मोरिक आदर व्यर्थ होजाई। महिन्हे आदर देहुइया मोरिक बाबा बा, जिहिहे तुहुरे कथो कि ऊ हमार परमेश्वर हो। 55 तुहुरे उहिहे नै चिन्हल हुइतो, पर मै उहिहे चिन्थुँ। मै उहिहे नै चिन्थुँ कहम कलेसे मै तुहुरिन्के हस झूँटा ठहरजिम। पर मै उहिहे चिन्थुँ, और ओकर आज्ञा पालन करथुँ। 56 तुहुरिन्के पुर्खा अब्राहाम मोरिक दिन देखक लग बरे आशा करल रहे, और ऊ देखल और रमाइल।" 57 तब यहूदी दलके नेतन येशूहे कलाँ, "तोहाँर उमेर अभिन पचास साल नै हुइल हो, और का तुँ अब्राहामहे देखल बतो?" 58 येशू ओइन्हे कलाँ, "जात्तिके मै तुहुरिन्हे कहतुँ, अब्राहामके जलम हुइनासे आघेसे मै बतुँ।" 59 असिक कलक कारणसे ओइने येशूहे मारक लग पठरा उठालेलाँ। पर येशू चुप्पेसे मन्दिरमेसे बाहेर निकरगिलाँ।