1 उ समयमे महाराजा अगस्टस अपन सारा रोमी साम्राज्यक सक्कु मनैनके जनगणना लेना हुकुम देहल। 2 यी सुरुक जनगणना उ समयमे हुइल जब सिरिया प्रदेशके राजपाल कुरेनियस रहे। 3 सक्कु जाने जनगणनक लग अपन-अपन पुर्खनके नगरमे गैलाँ। 4 योसेफ फेन गालील प्रदेशके नासरत गाउँ ओहोँरसे यहूदिया प्रदेशके बेथलेहेम कना दाऊदके गाउँमे गैल। काकरेकी ऊ दाऊदके परिवार और वंशक रहे। 5 ऊ अपन संग ठकौनी हुइल लौँदी पैनाहाँ मरियमहे लेके जनगणनक लग गैलस। 6,7 जब ओइने बेथलेहेम गाउँमे रहल समयमे ओइन्के लग वहाँ रहक लग पाटीपौवामे कौनो ठाउँ नै रहिन। तबेकमारे ओइने घारीमे रलाँ। जब मरियमके लरका पैना समय आइल। तब ऊ अपन बरका छावाहे पाइल। ऊ अपन लरकाहे लुग्गक झेन्द्रामे सेहँरल, और उहिन्हे डोँरवामे सुतादेहल, जेम्ने मनै गोरुनहे सानि दरथाँ।

8 वहे ईलाकामे गोड्गात भेँरी चह्रुइया भेँरहुवन रहिँत, जेने डँरवामे बैठके रातके अपन भेँरीनके अख्वारी करिँत्। 9 प्रभुक एकथो स्वर्गदूत ओइन्के थेन देखा पर्लिन, और प्रभुक तेज ओजरार ओइन्के आँजरपाँजर चम्कलिन, और ओइने गजब डरागिलाँ। 10 पर स्वर्गदूत ओइन्हे कहल, "ना डराऊ, काकरेकी हेरो मै तुहुरिन्हे महा आनन्दके खुशीक खबर सुनैम, जोन सक्कु मनैनके लग हुई। 11 आज दाऊद रज्वक गाउँ बेथलेहेम गाउँमे तुहुरिन्के लग एकथो मुक्तिदातक जलम हुइल बा, जे ख्रीष्ट प्रभु हुइताँ। 12 तुहुरे एकथो लरकाहे लुग्गामे सेहँरल, और डोँरवामे सुताइल भेटैबो। यी चिन्हासे तुहुरे जानजिबो कि ऊ लरका के हो।" 13 तब् एकफाले वहे स्वर्गदूतके संग स्वर्गीय सेननके एकथो समूह देखा परल। परमेश्वरके स्तुति कर्ती ओइने कलाँ, 14 "स्वर्गमे परमेश्वरहे महिमा और पृथ्वीमे जोन मनैनसे ऊ खुशी बताँ, ओइन्हे शान्ति होए।"

15 जब स्वर्गदूतनके ओइन्से विदा होके स्वर्गमे गैलाँ, तब भेँरी चह्रुइया भेँरहुवन आपसमे कलाँ, "आऊ, हम्रे बेथलेहेममे जाई, और यहाँ हुइल बात और हम्रिहिन्हे प्रभुक बतैलक बात जाके हेरी।" 16 ओइने जुरतेहेँ गैलाँ, और मरियम, योसेफ और लरकाहे भर डोँरवामे सुतल भेटैलाँ। 17 जब भेँरी चह्रुइया भेँरहुवन यनहे देख्लाँ, तब ओइने जहाँ-जहाँ गैलाँ, वहाँ उ सक्कुहुनहे उ बात बतादेलाँ, जोन बात स्वर्गदूतनके उ लरकक बारेमे ओइन्हे कले रहिन। 18 भेँरी चह्रुइया भेँरहुवनके कहल बात सुनुइया सक्कु जहनहे अचम्म लग्लिन। 19 पर मरियम यी सक्कु बात अपन मनमे धारके सोँच्ती रहल। 20 जसिके स्वर्गदूतनके भेँरी चह्रुइया भेँरहुवनहे बताइल रहिँत। ओस्तेके सुनके और देख्के ओइने परमेश्वरके स्तुति और महिमा कर्ती फिर्ता घुमगिलाँ।

21 लरका येशूक जल्मलक अठौँ दिनमे जब लरकक खतना करना समय आइल, तब हुँकार नाउँ येशू धारगिलिन। यी नाउँ हुँकार गर्भमे अइनासे आघे स्वर्गदूत देहल रहे। 22-24 जब मोशक नियम कानुन अनुसार मरियमके चोखा हुइना दिन ओरागिलिन, तब योसेफ और मरियम यरुशलेम मन्दिरमे गैलाँ। ओइने वहाँ परेउनक दुईथो बच्चा बलि चह्राइक लग लैगिलाँ। यी परमप्रभुक मोशक नियम कानुनके पालन करक लग रहे। ओइने येशूहे लेके यरुशलेम शहरमे फेन गैलाँ ताकि हुँकिन्हे प्रभुक आघे समर्पण करे सेकिँत। काकरेकी प्रभुक नियम कानुनमे असिके लिखल बा, "प्रत्येक सुरुमे जल्मल छावाहे प्रभुक लग पवित्र हुइक लग अल्गे कराई परत।"

25 उ समयमे यरुशलेम शहरमे शिमियोन नाउँ रहल एकथो मनैया रहे। ऊ धार्मिक और परमेश्वरके भक्त रहे। ऊ ख्रीष्टके अइना असरा हेरतेहे, जिहिहे पठैना परमेश्वर वाचा कर्ले रहिँत। ताकि ऊ आँइत और इजरायलके मनैनहे सान्त्वना दिँत, और पवित्र आत्मा ओकर संग रहिस। 26 पवित्र आत्मा उहिहे बताइल रहिस कि ख्रीष्ट प्रभुहे नै देखतसम तैँ नै मुबे। 27 और वहे दिन पवित्र आत्मा ओकर अगुवाई करलाँ, और ऊ मन्दिरमे आइल। जब मरियम और योसेफ उ लरका येशूहे मोशक नियम कानुनके अनुसार करिँत कहिके मन्दिरके भित्तर नन्लाँ। 28 तब ऊ लरका येशूहे अपन कोनामे लेहल, और परमेश्वरहे धन्यवाद देके कहल:

29 "आब हे परमप्रभु अपन वाचक अनुसार अप्नि अपन दास महिन्हे शान्तिसे मुए दि। 30 काकरेकी मै उ मुक्तिदाताहे देख सेकल बतुँ, जिहिहे अप्नि सक्कु मनैनहे बँचाइक लग पठैले बती। 31 जिहिहे अप्नि सक्कु देशके मनैनके आघे तयार करल बती। 32 ऊ एकथो ओजरार हुइताँ, जे गैर-यहूदिनहे अप्निक डगर देखैहीँ। और वहे अप्निक जाति इजरायलहे महिमा करैहीँ।" 33 और येशूक दाईबाबाहे येशूक बारेमे शिमियोनके कलक बात सुनके अचम्म लग्लिन। 34 शिमियोन ओइन्हे आशीर्वाद देके हुँकार दाई मरियमहे कहल, "हेरो, यी लरका इजरायलमे बहुत्ते जहनके विनाश और मुक्तिक एकथो चेतावनीक चिन्हक रुपमे रही, जेकर विरोधमे बहुत बात हुई। 35 और बहुत्ते मनैनके मनमे दबाके धारल बात बाहेर निकरहीन। तब तुहिन्हे एकथो भयङ्कर दुःखके महसुस हुई, जसिके केऊ तोहाँर मनमे तरवाललेके गोझदेले बा।"

36 आशेरके खानदानमे फनुसलके छाई हन्ना नाउँक एकथो बुह्राइल अगमवादी रहे, जे कन्या अवस्थामे भोज करके सात साल किल अपन थरवक संग रहे भेटाइल। 37 और उ एकथो विधवा रहे। आब ओकर उमेर चौरासी साल होगिल रहिस। ऊ मन्दिरेमे पलिरहे, पर उपवास और प्राथनक संग आराधना रातदिन कर्ती रहे। 38 और ऊ वहे समयमे आके परमेश्वरहे धन्यवाद देहे लागल, और यरुशलेमके मनैनके मुक्तिक प्रतिक्षा करुइया उ सक्कु जहनहे ख्रीष्टके बारेमे बताइल, जेने ख्रीष्टहे पठैहीँ कहिके परमेश्वरके असरा हेरतिहिँत।

39 जब योसेफ और मरियम परमप्रभुक नियम कानुन अनुसार सक्कु काम करके ओरवैलाँ। तब् ओइने गालील प्रदेशके अपन गाउँ नासरतमे घुमगिलाँ। 40 लौँदा दिमाकसे भरपूर होके बहरती और बल्गर हुइती गैलाँ, और परमेश्वरके अनुग्रह हुँकार उप्पर रहिन।

41 येशूक दाई-बाबा निस्तार-तिहुवारमे प्रत्येक साल यरुशलेम शहरमे जाइँत। 42 जब येशू बाह्र सालके रहिँत, तबे येशू और हुँकार दाईबाबा तिहुवारके रीतिअनुसार यरुशलेम शहरमे गैलाँ। 43 तिहुवारके दिन ओराके सेकल ते येशू और हुँकार दाईबाबा घरे फिर्ता जाइतिहिँत। पर लौँदा येशू यरुशलेम शहरेमे रहिगिलाँ। यी बात भर हुँकार दाईबाबा पता नै पैलिन। 44 येशू यात्रा करुइयनके समूहमे कहुँ हुइहीँ कहिके ओइने दिनभर नेंग्लाँ। हुँकिन्हे ओइने अपन नातपाँत और चिन्हल जानल मनैनके बिच्चेम खोज्लाँ। 45 पर नै भेटैलाँ ते ओइने हुँकिन्हे खोज्ती फेनदोस्रे यरुशलेम शहरमे गैलाँ। 46 तीन दिन पाछे ओइने हुँकिन्हे मन्दिरके अंगनामे यहूदी कानुनके गुरुनके बिच्चेम बैठके ओइन्के बात सुन्ती और ओइन्हे प्रश्न पुँछ्ती भेटैलाँ। 47 सुनुइयन सक्कु जाने हुँकार बुद्धि और हुँकार जवाफ देहत देख्के अचम्म परतिहिँत। 48 हुँकिन्हे देख्के हुँकार दाईबाबाहे अचम्म लग्लिन, और हुँकार दाई हुँकिन्हे कलिन, "छावा, तैँ असिके काकरे कर्ले? हेर तोरिक बाबा और मै तुहिहे खोजत-खोजत हैरान होगिल बती।" 49 ऊ ओइन्हे कलाँ, "तुहुरे महिन्हे काकरे खोजतो? का मै अपन बाबक घरेम रना जरुरी बा कहिके तुहुरिन्हे पता नै रहे?" 50 पर येशूक कहल बातके मतलब ओइने नै बुझ्लाँ। 51 तब येशू अपन दाईबाबनके संग नासरत गाउँमे चलगिलाँ, और ओइन्के अधिनमे होके बैठ्लाँ। हुँकार दाई यी सक्कु बात अपन मनमे धरलिन। 52 और येशू बुद्धिमे, शरीरमे और परमेश्वर और मनैनके अनुग्रहमे बहरती गैलाँ।