1 यरुशलेम शहरमेसे अइलक फरिसी दलके मनै और यहूदी कानुनके गुरुनके येशूक थेन आके कलाँ, 2 "अप्निक चेलनके बाबापुर्खनके चलन काकरे भङ्ग करथाँ? काकरेकी यने खैनासे आघे अपन हाँथ नै धुइथाँ।" 3 येशू ओइन्हे कलाँ, "तुहुरे फेन काकरे अपन परम्परक लग परमेश्वरके आज्ञा भङ्ग करथो? 4 काकरेकी परमेश्वर कले बताँ, ‘अपन दाईबाबाहे आदर करो, जे अपन दाईबाबाहे श्राप दि उहिहे मुवा दरना हो।’ 5 पर तुहुरे मनैनसे ओइने अपन दाईबाबाहे यी कहिँत कना चहथो, ‘महिन्हे माफ करो, मै तुहुरिन्हे सहयोग करे नै सेकम। काकरेकी ज्या मै तुहुरिन्हे देना रहे, उ मै परमेश्वरहे देना वाचा कर्ले बतुँ।’ असिके तुहुरे मनैनहे ओइन्के दाईबाबाहे सहयोग करे नै देथो। 6 जसिके तुहुरे अपन चलनहे कायम करक लग परमेश्वरके आज्ञाहे बेकामके बनाइल बतो। 7 ओस्तेके परमेश्वरके अगमवक्ता यशैया तुहुरे कपटीनके बारेमे यी ठिक भविष्यवाणी करल बा, जसिके पवित्र शास्त्रमे लिखल बा, 8 ‘यी जाति महिन्हे ढेबरलेके किल आदर करत, पर ओइन्के मन महिन्से दूर बतिन। 9 ओइने बेकारमे मोरिक आराधना करथाँ। पर ओइन्के शिक्षा मनैनके सिखाइल नियम किल हुइतिन।’"

10 येशू मनैनहे अपन थेन बलैलाँ और ओइन्हे कलाँ, "सुनो और बुझो। 11 ज्या मुहेँसोज जाइत, उ मनैनहे अशुद्ध नै बनाइत। पर ज्या मुहेँसोज निकरत, उ मनैनहे अशुद्ध बनाइत।" 12 यकरपाछे चेलनके आके हुँकिन्हे कलाँ, "का अप्निहे पता बा, फरिसीनके अप्निक बात सुनके धिकल बताँ?" 13 पर ऊ कलाँ, "स्वर्गमे रहुइया मोरिक बाबक नै लगाइल हर टेलवा उँखारजाजाई। 14 ओइन्हे रहेदेऊ, ओइने आँधर अगुवा हुइताँ। आँधर मनैया दोसुर आँधर मनैयाहे नेगाई कलेसे, उ दुनु जाने गड्ढामे परजिहीँ।" 15 पत्रुस हुँकिन्हे कहल, "हम्रिहिन्हे यी दृष्टान्तके मतलब बतादी।" 16 ऊ कलाँ, "का तुहुरे अभिन फेन नै बुझ्लो? 17 का तुहुरिन्हे पता नै हो, जोन खाना हम्रे खैथी, उ पेटमे चलजाइत, और बाहेर निकरजाइत? 18 पर जोन बात मुहेँमेसे बाहेर अइथाँ, उ मनमेसे निकरथाँ। और ओइनेहेँ मनैनहे अशुद्ध बनैथाँ। 19 काकरेकी मनमेसे खराब विचार, हत्या, दोसुर जहनके जन्नीक थेन जैना, व्यभिचार, चोरी, झूँटा गवाही और निन्दा बाहेर निकरथाँ। 20 यी बात भर मनैनहे अशुद्ध बनैथाँ। पर हाँथ बिना धुइल खैलेसे उहिहे अशुद्ध नै बनाइत।"

21 तब् येशू वहाँसे निकरगिलाँ, और टुरोस और सीडोनके ईलाका ओहोँर गैलाँ। 22 उ ईलाकामेसे एकथो कनानी जन्नी मनैया आके चिल्लाके कहे लागल, "हे प्रभु, दाऊदके छावा, मोरिकमे दया करो। मोरिक छाइहे भूत्वा गजब सताइल बतिस।" 23 येशू उहिहे कुछु जवाफ नै देलाँ। हुँकार चेलनके आके हुँकिन्हे अनुरोध करलाँ, "यिहिहे विदा करदी, काकरेकी उ चिल्लैती हमार पाछे लागल बा।" 24 ऊ कलाँ, "मै इजरायलके मनैनके लग किल पठागिल बतुँ, जेने हेराइल भेँरीनके हस बताँ।" 25 पर उ जन्नी आके हुँकार आघे लम्पसार होके हुँकार गोरा पकरके कहे लागल, "हे प्रभु, महिन्हे सहायता करी।" 26 येशू कलाँ, "लरकनके रोटी लेके कुकरीनहे दारदेना ठिक नै रहत।" 27 ऊ जन्नी कहल, "हाँ प्रभु, पर कुक्कुर फेन ते अंगनामे अपन मलिक्वक बच्का खैथाँ।" 28 तब् येशू उहिहे जवाफ देलाँ, "ए नारी, तोहाँर विश्वास भारी बा। तोहाँर इच्छा करल हस तुहिन्हे होए।" ओकर छाई तब्बेहेँ चोखागिलिस।

29 येशू वहाँसे निकरके गालील समुन्दरके आँरितिर-तिर गैलाँ, और पहाड़के उप्पर चहुँरके वहाँ बैठ्लाँ। 30 तब् मनैनके बर-बर भीड़ हुँकार थेन अइलिन। और ओइने अपन संग नानल नाँगर, लुल, आँधर, लाट और बहुत्ते जहनहे नानके हुँकार गोरातिर धारदेलाँ। तब् ऊ ओइन्हे चोख्वादेलाँ। 31 यहाँसम कि, लाट मनै बोलल, लुल मनै चोखाइल, नाँगर मनै नेगत और आँधर मनैनके आँखी खुलल देख्के मनै अचम्ममे परगिलाँ। और ओइने इजरायलके परमेश्वरके महिमा करलाँ।

32 तब् येशू अपन चेलनहे अपन थेन बलाके कलाँ, "यी भीड़हे देख्के महिन्हे सोग लागता। काकरेकी यने मोरिक संग रलक आज तीन दिन होगिल बतिन। और यनके थेन खाइक लग कुछु नै हुइतिन। यनहे भुँख्ले पठैना मै नै चहथुँ। यदि मै यनहे बिना खवैले भुँख्ले घरे पठैम कलेसे यने डगरमे बेहोस होजिहीँ।" 33 चेलनके हुँकिन्हे कलाँ, "अतरा भारी भीड़हे यी सुनसान ठाउँमे खवाइक लग हम्रे अतरा धेउर रोटी कहाँसे भेटाबी?" 34 येशू ओइन्हे पुँछ्लाँ, "तुहुरिन्के थेन कैथो रोटी बा?" चेलनके जवाफ देलाँ, "सातथो रोटी और थोरचे छुटी-छुटी मच्छी बताँ।" 35 तब् येशू मनैनहे भुइयाँमे बैठे कलाँ। 36 ऊ सातथो रोटी और मच्छी लेलाँ। और परमेश्वरहे धन्यवाद देके रोटीहे खन्टैलाँ। और मनैनहे बाँटक लग चेलनहे देलाँ। तब् चेलनके मनैनहे बँट्लाँ। 37 ओइने सक्कु जाने खैलाँ, और अघागिलाँ। ओकरपाछे खन्टैलक उब्रल रोटी ओइने सात छिट्वा उठैलाँ। 38 जन्नी मनै और लरकन छोरके खउइयन चार हजार थारु मनै रहिँत। 39 तब् भीड़हे विदा करके सेकके ऊ लाउमे बैठ्लाँ, और मगादानके ईलाका ओहोँर गैलाँ।