1 विश्वासमे कमजोर रहल मनैयाहे ओकर मान्यतक बारेमे कौनो फेन शंखा बिना कर्ले स्वीकार करो, और उहिहे का करे परत या का नै करे परत कहिके उहिसे बहस ना करो। 2 काकरेकी एकथोहे सक्कु चिज खाई सेकजाइत कहिके विश्वास बतिस, पर जे विश्वासमे कमजोर बा, ऊ सागसब्जी किल खाइत।

3 सिकार खउइया मनैया सिकार नै खैना मनैयाहे निच ना माने, और सिकार नै खउइया मनैया सिकार खैना मनैयाहे दोष ना लगाए। काकरेकी परमेश्वर दुनु जहनहे स्वीकार करथाँ। 4 उ मनैया प्रभुक सेबक हो, तबेकमारे तुँ परमेश्वरके कौनो फेन सेबकहुँक्रिहिन्के न्याय ना करो। ऊ मजा काम करल या नै करल उ सक्कु चिजके सम्बन्ध ओकर मलिक्वासे बतिस। और यदि ऊ मजा काम करल कलेसे उहिहे मजा काम ओकर प्रभुए करवैलिस।

5 अस्तेहेँके और यदि कौनो मनैया एकथो दिनहे औरे दिनसे धेउर महत्त्व देहत। और कौनो मनैया भर सक्कु दिनहे बराबर मानत: हरेक मनैनहे अपन मनमे पक्का विश्वास हुई परत कि ऊ ज्या सोँचता उ ठिक सोँचता। 6 जोन मनैया कौनो दिनहे विशेष महत्त्व देहत कलेसे ऊ यहे कारणसे करत, ताकि ऊ परमेश्वरहे सम्मान देहे सेके। जे सिकार फेन खा लेहत कलेसे ऊ प्रभुक लग खाइत। काकरेकी ऊ परमेश्वरहे धन्यवाद देहत। और जे सिकार नै खाइत कलेसे ऊ प्रभुक लग नै खाइत और परमेश्वरहे धन्यवाद देहत।

7,8 हम्रे सक्कु जाने परमेश्वरके हुइती। तबेकमारे हमारमेसे केऊ फेन अपन लग किल नै जिए परत, और यदि हमारमेसे केऊ मुअत कलेसे ऊ अपन लग किल नै मुअत। 9 ख्रीष्ट यहे कारणसे मुलाँ, और जित्ती फेन होगिलाँ। काकरेकी ख्रीष्ट वहे हुइँत, जिहिहे जित्ती और मुअल दुनु मनै प्रभुक रुपमे स्वीकार करथाँ।

10 तुँ अपन विश्वासी भैयाहे काकरे दोष लगैथो? अथवा अपन विश्वासी भैयाहे काकरे निच मन्थो? काकरेकी हमार सक्कु जहनके न्याय परमेश्वर करहीँ। 11 जसिके पवित्र शास्त्रमे लिखल बा,

"प्रभु कथाँ, ‘मै तुहुरिन्से वाचा करे सेक्थुँ कि हरेक जाने मोरिक आघे ठेहुनी टेक्हीँ।

और हरेक मनै परमेश्वरहे स्वीकार करहीँ।’"

12 तबेकमारे हम्रे सक्कु जहनहे अपन कर्लक कामके जवाफ परमेश्वरहे देहे परी। 13 तबेकमारे आबसे हम्रे दोसुर जहनहे दोष नै लगाई। और तुहिन्हे निर्णय करे परत कि कौनो फेन तोहाँर विश्वासी भैया तोहाँर कारणसे परमेश्वरहे विश्वास करना ना छोरे।

14 मै जन्थुँ, और प्रभु येशूकमे महिन्हे पक्का रुपमे पता बा, कि कौनो फेन खाना खैना गलत नै हो। पर जे उ खानाहे अशुद्ध मानत, ओकर लग ते उ खाना अशुद्धै हो। 15 यदि तोहाँर विश्वासी भैया तोहाँर कारण उदास हुइत कलेसे तुँ प्रेममे नै चल्थो; यदि तोहाँर खानक कारण तोहाँर विश्वासी भैया आब परमेश्वरके आज्ञा पालन नै करत कलेसे तुँ उ खानाहे ना खाऊ। काकरेकी ख्रीष्ट ओकर लग फेन मुअल रहिँत।

16 तबेकमारे यदि कौनो फेन चिज हमार नजरमे मजा बा। पर यिहिसे हमार विश्वासी भैयाहे समस्या हुइथिस कलेसे हमार असिके नही करल मजा हुई ताकि दोसुर जाने हमार आलोचना ना करिँत। 17 काकरेकी परमेश्वरके राजमे खाना पिना महत्त्वपूर्ण नै हो। पर महत्त्वपूर्ण ते यहे बातके बा कि परमेश्वरके संग सही जीवन जिना, और पवित्र आत्मामे विश्वासी संघरियनके संग शान्ति और आनन्दमे रना।

18 जे फेन यहे तरिकासे ख्रीष्टके सेवा करत कलेसे, ऊ परमेश्वरहे खुशी बनाइत, और दोसुर मनै ओकर बारेमे मजा बात बत्वैहीँ।

19 तबेकमारे हम्रे जबफेन वहे काम करना कोशिस करे परत, जोन कामसे मनैनहे शान्ति मिल्थिन। और एकदोसर जहनहे परमेश्वरकेमे विश्वास पक्का करक लग सहयोग करे परत। 20 खैना चिजके लग परमेश्वरके कामहे नाश ना करो; कौनो फेन खाना खैना गलत नै हो, पर असिन खाना खैना गलत हो, जिहिसे दोसुर मनैया परमेश्वरमे विश्वास करना छोरदेहत।

21 मजा ते यम्नेहेँ हुई कि तुँ ना सिकार खाऊ, और ना ते जाँर-दारु पिओ, और ना ते तुँ असिन कौनो फेन काम करो, जिहिसे तोहाँर विश्वासी भैया परमेश्वरहे विश्वास करना छोरदेहे।

22 तुँ विश्वास करे सेक्थो कि तुँ ज्या करतो उ गलत नै हो, पर यी बात तुँ अपन और परमेश्वरके बिच्चेम किल धर्ले रहो। धन्यके हो उ मनैया जे अपन कर्लक कामहे ठिक मानत, और अपनहे अप्निहीँ दोषी नै ठहराइत। 23 पर यदि हमार मनमे कुछु फेन खैना चिजके बारेमे शंखा बा, और तभुन फेन हम्रे उहिहे खालेली कलेसे हम्रे दोषी बती। काकरेकी हमार मनमे जोन विश्वास बा, ओकर अनुसार हम्रे नै कर्ली। काकरेकी हम्रे ज्या फेन कर्थी, यदि उ काम हम्रे अपन प्रभुमे बिना विश्वासके कर्थी कलेसे उ हमार लग पाप हो।