Žalmi 96

1 Giľaven le RAJESKE nevi giľi!

Giľav le RAJESKE, caľi phuv!

2 Giľaven le RAJESKE, lašaren leskro nav,

sako džives vakeren pal leskro spaseňje!

3 Vakeren le narodenge pal leskri slava,

pal leskre zazraki savore manušenge.

4 Bo o RAJ hino baro a hodno savora chvalake,

lestar kampel te daral buter sar savore devlendar.

5 Bo savore devla andral aver narodi hine ča modli,

ale o RAJ stvorinďa o ňebos.

6 O baro šukariben the e slava hine anglal leste,

leskro Sveto than hino zoralo the igen šukar.

7 Den le RAJESKE, savore manušale pre phuv,

den le RAJESKE e slava the e zor!

8 Den le RAJESKE e slava hodno leskre naveske!

Anen e obeta a aven andre leskro Chramos!

9 Banďon tele anglo RAJ, angle leskro sveto šukariben!

Izdra lestar, caľi phuv!