1 Mekyi anukenzu umba angba o kyo o yi meka iyi enzu umba Ukpo, kyamate bɔkɔ wa zɔ kiya umba angba o ŋɔɔ yi meka yi tayi. Ɛzu iyi angba ɛlɛ i ngbɛ enzu umba bɔkɔ o nyama la yi ɛdɔma. Enzu mbɔlɛ lala ɔ zɔ te o yitu iyi Ɔzhizɔsi Okrasi uwu bɔkɔ a wamba ma mu rinye awu mo. Iwomo mbo ɛlɛ, ii shi Ukpo a ngbɛ mba ɛdɔma efyefya. 2 Enzu wa mbwalu gyɔɔ ɔ vɔngɔ ari iyira mba ɛlɛ akwɛyi ii shi enzu o siso iyira iyi ɔgwuzɛ uwu ongbulolo ɔlɛ. 3 Wa zɔ ɛzu iyi angba mbɔlɛ akwu enzu umba ekweyi, oo kyoro yi mo mu esepo ibama iyi bɔkɔ umba o ka mu afyi mba kaka kaa lo fya eduwo munyi yi. Ukpo a ka mu egbo wu mekyeki te e lo mbo inyashi, uwu a ŋe wo yi tayi mega.

4 Lunyi lu yitu te, mekyi kwuyengwu bɔkɔ alɔgbulɔ umba Ukpo o fo ɛrama wu ma awu, Ukpo a zeyi e lo mbo tayi mo, a ta mba mu kwumbɛ ungwu ipu mbaa bɔkɔ ee fu enzu umbira lɛɛbi. Ukpo ee shi mbo mu kwumbɛ ungwu ipu tayi nzhii ba ɔnuwu bɔkɔ e be fu mbo ombu. 5 Lunyi lu yitu tee, mekyi enzu o lomo la iso iyi Ukpo mo, Ukpo ba a zeyi e lo mbo mu iyira iyi bɔkɔ umba o yi mu iwomo tayi mo, kwuwo kwɔlɛ e shi embyi o ri mbo mo. Onowa u tanu uwu iso iyi ototo mbala enzu umbafo werewo ba Ukpo a sa mba ma. 6 Ukpo a ngbɛ enzu umba ese iyi Ɔsɔdɔmu mbala Ogomora ɛdɔma akwɛyi e shi ɔyi u pwu ese ɛnyi ma nzhii ba akwu kwulɔ. E wo ɛlɛ te kaa la zɔ enzu te, ɛlɛ gba ii du enzu umba bɔkɔ o lo wu mo mo le. 7 Ukpo a sa Ɔlɔtu onzu ototo ma, kwuwongu ubwu wu e tutumo gyɔɔ kwuwongu ira iyi enzu umba Ɔsɔdɔmu kwuwongu o lomo la iso iyi Ukpo mo. 8 Onzu ele e yi mbala enzu umbira mbɔlɛ, kwɔfyi kwɔfyi a ma apula iyira iyi bɔkɔ umba o wo, a pwa iso iyira iyi bɔkɔ umba o so, akwɛyi ɛlɛ kpɛkpɛyi i tutu wu egbo mo gyɔɔ kwuwongu akwu onzu ototo. 9 Kwuwo kwɔlɛ, Ukpo e yi ɔgwuzɛ uwu bɔkɔ a sa enzu umba bɔkɔ o wiyi wu kwuyengwu bɔkɔ ipwama i du mbo, akwɛyi enzu umbira ba e yi mbo kwuwo akwɛyi e lo mbo inyashi nzhii ba ɔnuwu ombu izɔma. 10 Enzu umba bɔkɔ o wo apula iyira iyi bɔkɔ ɛnwu mba i gyi te li wo akwɛyi i ngbɛ ɛnwu mba ɛdɔma, akwɛyi o towo ɛrama wu imbwaluma awu, Ukpo e lo mbo inyashi i ka le.

Wa zɔ ɛzu iyi angba mbɔlɛ o wiyi iyi kiya ingyi bɔkɔ umba o ka mu egbo mbo te oo wo mo ba o to ɛmba o fulo kadu, alɔgbulɔ umba Ukpo ba o ga mba ari ikpama mo. 11 Alɔgbulɔ umba Ukpo umba bɔkɔ o ka wa zɔ ɛzu iyi angba ekpasu ma lala, oo kpa wa zɔ ɛzu iyi angba mbɔlɛ ari mu idu iyi Ɔkwu mo. 12 Enzu mbɔlɛ ba o so iso iyira iyi Ukpo mu iso iyi bɔkɔ o zɔngɔma yi ma mo. O yi mate izɔfyi umba o byi egbo mo tayi, umba o mbwalu iyi bɔkɔ egbo mbo i so mbo byi, o mba mba te kaa lo yi mbo kaa lo ngbɛ ma bi. Enzu mbɔlɛ Ukpo a ngbɛ mba ɛdɔma mate bɔkɔ enzu ɔ ngbɛ izɔfyi tayi.

13 Kwuwongwu bɔkɔ o lo enzu inyashi awu, Ukpo e lo mbo inyashi iyɛku tete. Wa zɔ ɛzu iyi angba mbɔlɛ ba o ma te a kwamba ɔnyɛ te kaa lo ri lo wo gyɔɔ mu ɔnɔnda gedegede. Kwuye ungwu bɔkɔ o yi mu kiya irimo mbala yi, ii shi mbo ɔnyɛ te kaa lo wo ɛlɛ. Kwuwo ngwɔlɛ, iwomo mbo ɛlɛ i ngbɛ ɛnyi yi ɛdɔma akwɛyi i ka yi la lovya mbala eseye. 14 Kwuye ungwunanguna egbo mbo i yi mbaa eko kaa lo nɔ mbala mba; umba o nyama te lo lafya la ira iwomo gbee mo; umba oo kpa ida la enzu umba bɔkɔ o kɔma mu Ɔzhizɔsi imbwaluma mo kaa lo kpa mɛzhi mu Ɔzhizɔsi imbwaluma. Enzu mbɔlɛ akwu enzu umba ekweyi gyɔɔ; Ukpo a ta mba kenzu-o! 15 Enzu mbɔlɛ o lafya la ɔgwuzɛ ongbulolo akwɛyi o le mu apula iyira iwomo kyamate Obalamu umɛ uwu Ɔbɛyɔ e wo tayi. Obalamu ele a gyi eduwo gyɔɔ akwɛyi e wo iyinayina e kaa la fya yi byi. 16 Akwɛyi o kpa wu ɛyi kwuwongu ira iyi bɔkɔ e yi mu iwomo awu, ɔzɛki uwu bɔkɔ e siso kego mo awu, e siso mate onzu tayi akwɛyi a nyi anukenzu Obalamu ira iwomo kwuye kwɔngu.

17 Wa zɔ ɛzu iyi angba mbɔlɛ o yi kya mate anga iyi ɛwuru tayi mu embyi, o yi kyamate kubwu ungwu kwu kpo embyi mo tayi, o gba o yi kyamate amu iyi bɔkɔ kwokpo kwu pya yi ma tayi. Kwuwo kwɔlɛ, kizɛ ingyi ipwu kpakiri gba Ukpo e shembo le. 18 Moo iyi bɔkɔ o zɔ enzu i yi kyamate iso iyeshi tayi, munɛ ba akwu iso iyi umbwa, o za la enzu te lo wo apula iyi lovya iyi bɔkɔ ɛnwu mba i gyi iwomo, iso mbo ɛnyi akwu kyamate kwuda la enzu umba bɔkɔ o kwira ɔsu iyepo. 19 Oo za la enzu te, lu kwu enye fo, munɛ ba umba akwu enye umba apula iyira iwomo. Moo onzu akwu unye uwu kiya ingyinangyina ingyi ki to wu egbo mo ndii. 20 Akwiyi gba enzu mbɔlɛ o lafya la apula iyira iyi kwudu kwɔlɛ iyi i tutu enzu mo, akwɛyi o na Ɔkwu mbala usama nzu Ɔzhizɔsi Okrasi, akwɛyi kekelele o gba la apula iyira ɛnyi iwomo nzhii ba iyira ɛnyi i to mbo egbo mo ndii, iyimo iyi enzu mbɔlɛ mu imbwama yi, i ka ira la iyekyi ma. 21 I bi shoshi i ka le gba enzu mbɔlɛ lo yitu iyi ɔgwuzɛ uwu ototo mekyi mo, bɔkɔ o yitu wu dɛ akwɛyi o lafya la ɛrama iyi Ukpo iyi bɔkɔ o zɔ mba imbwaluma. 22 Aba ɛlɛ i zɛ kya mu reshi mbo te,<<Izu a gba la iko wu ilɛma,>> mbala, <<Orisu uwu bɔkɔ o wo wu mo, a gba a ke fye mu ɔtɔtɔ kpɔ.>>