1 Ɛmɛza mi, kwupwu kwɔlɛ akwu ungwopo ungwu mi ka mi ka yi le. Mu epu epepo iyi mi ka mi ka yi awu, mi lolo yi iyi apula ɛnyi kaa li mbwa yi ma kaa la lu byi egbo ɔnyɛnyɛ. 2 Mi gyi te la lu lolo iso iyi bɔkɔ anukenzu umba Ɔkɛrikɛri o so mekyi mbala ɛzɔ iyi Ɔkwu nzu usama iyi bɔkɔ wa zɛ ilɔ o zɔ yi awu.

3 Iyi kwonze, akwu mega kaa la lu yitu te, mu afyi iyi mbwambwa enzu umbafo umba bɔkɔ o wo kiya ingyi idu mbo bi gyi, o nyɔ oo wo yi ɛnɛ. 4 O yo yi kwuyo te, <<Mate e so e shi mɛzhi te uwu a gbama lo, e bo-o? Ngbaa ta bɔkɔ umba asɔkwu nzu o kpomo le, iyinayina te gba i yi le ngba mu iyemo iyi kwudu kwɔlɛ le.>> 5 O ka la kwuleyi ungwu iyayigbɛ te, oshi u yi ngbaa mekyi. Ukpo a ta ɔkpa akwɛyi ɛzhi i wɔ mu embyi akwɛyi e shi ɛzhi i wɔ mekeka iyi embyi. 6 Akwu mu ilomo iyi embyi mbɔlɛ tete gba Ukpo akwu kwudu ungwekyi ma le. 7 Mu ɔkpa uwu Ukpo ele tete gba oshi mbala ɛzhi iyi kekelele o shiyebyi la ɔnuwu ombu, kaa lo pwu yi mo mɔyi mbala enzu umba bɔkɔ o yi Ukpo mo le. 8 Ɛmɛza umba idu mi, lunyi la lu kalakwuleyi ungwu iso ɛlɛ mo: Midu iyi Ukpo, kwɔfyi kwukpɛnyi kwu yi kyamate lɔri odubu tayi, lɔri odubu ba lu yi kyamate kwɔfyi kwunyi tayi. 9 Akwu te Ukpo e kiri ɛnwu iyi kaa le wo kiya ingyi bɔkɔ e so e shi mɛzhi kyamate bɔkɔ enzu umbafo o ka mu egbo mbo mo awu mo. E yi mu idu iyimo mbala yi, kwuwongu a gyi te onzu ukpukpɛnyi te le kpo ɛdɔma mo. A gyi te onzonzu le kwira wu ɔsu.

10 Kwɔfyi ungwu Ɔkwu ba kwu nyɔ kyamate i nyɔma iyi uwɛlɔ tayi. Kwuye kwɔngu anu iyɛkuu ii wɔ, akwɛyi oshi u tomo, apula iyi bɔkɔ i yi moshi lɛɛbi i pwumo akwɛyi i kpo ɛdɔ ma, akwɛyi kwudu kwɔlɛ mbala apula lɛɛbi iyi bɔkɔ i yi ma ngu i tomo ndii.

11 Tabɔkɔ apula lɛɛbi i kpo ɛdɔma mu ɔgwuzɛ ɔlɛ te le, i fa te la lu ngbɛndu mu luzɛ yi, lunyi la lu yi egbo iyesheshi kaa la lu zɛ luzɛ undu lu she la Ukpo. 12 Tabɔkɔ lu rigbo la kwɔfyi ungwu bɔkɔ Ukpo a ka te a gbama, la lu gyakpɔɔ kaa la lu shi ngwu la kwu bo efyefya. Mu kwɔfyi kwɔngu Ukpo e pwu oshi ma akwɛyi apula lɛɛbi iyi bɔkɔ i yi moshi awu i wolomo minaa. 13 Kinzu ba ki rigbo i yi bɔkɔ Ukpo e so e shi mɛzhi te ee shi nzu oshi uwepo mbala ɛzhi iyepo iyi bɔkɔ akwu kwogba ungwu ototo.

14 Kwuwo kwɔlɛ ɛmɛza umba idu mi, mate bɔkɔ lu rigbo kwɔfyi kwɔngu awu, la lu gyakpɔɔ kaa la lu yi sɛsɛsɛ mbaa Ukpo kaa la lu yi kwuto mo ba lo la yi kenzu mɛnwu mo, lunyi ba la lu yi iŋɔma iyi oloto mbala Ukpo. 15 La lu yitu te idu iyimo iyi Ɔkwu nzu Ɔzhizɔsi Okrasi akwu kwuwongu bɔkɔ a gyi te la sa enzu ma le, kyamate bɔkɔ umanyi nzu Ɔpɔlu Ukpo e shi wu ilukwu akwɛyi a kakwupu a ka yi awu. 16 Ɛlɛ gba akwiyi bɔkɔ e so le mu epu wu lɛɛbi iyi bɔkɔ a ka. Iso iyifo iyi bɔkɔ a ka, i kɔma mu izɔngɔma. Enzu umba bɔkɔ o yi kiya mo mbala enzu umba bɔkɔ o ki alɛ ma mɛzhi mo, o luyima mu ɔgwuzɛ owa, kyamate bɔkɔ o wo mbala ekpo iyi iso iyi Ukpo iyifo tayi awu. Ɛlɛ gba ba i shi Ukpo a ngbɛ mba ɛdɔma le. 17 Kwuwo ngwɔlɛ ɛmɛza umba idu mi, mate bɔkɔ lu yitu iyi ɛlɛ-ɛ awu, la lu rima ngiri kaa enzu mbɔlɛ umba bɔkɔ o lomo la iso iyi Ukpo mo awu, lo shi yi kaa la lu lafya la ɔgwuzɛ uwu isama ɔlɛ mo. 18 Lunyi ba la lu kwo bulɔma mu esheshi mbala ilukwu iyi Ɔkwu nzu mbala u sa ma nzu Ɔzhizɔsi Okrasi uwu bɔkɔ e yi inzumbɛku iyɔkpɔɔ awu! Li yi tayi.