1 Iso iyi bɔkɔ ki ta yi anu yi ele gba akwu meka iyi Ɔzhizɔsi uwu bɔkɔ e yi dɛ gba o wo kwudu kwɔlɛ le awu. Kinzu ki pwa iso wu, ki ma wu mu eyi nzu, ki gba ki pwu wu afyi mu ewo nzu. Uwu gba akwu iso iyi Ukpo iyi bɔkɔ ii shi kwunyɔ le. 2 Ukpo a wa wu a zɔ wu nzu; kinzu ki ma wu, gba ki ye yi mu isomo le te uwu gba ee shi kwunyɔ ungwɔkpɔ le. Uwu gba e yi mbala Edego-ala le ngbaa mekyi. 3 Kinzu ki ta yi anu iyi kiya ingyi ki ma ba ki pwa, kaa lunyi tete la lu kyo mbala nzu mu iyinayina iwomo; moo kinzu tete ki kyo mbala ete nzu Ukpo mbala Ɔzhizɔsi Okrasi Umɛ wu, mu kiya ingyinangyina iwomo. 4 Ki ka yi apula ɛlɛ lɛɛbi kaa ɔnyɛ nzu la nyɔlɔma kwuwongu lu kyo mbala nzu.

5 Ɛlɛ gba akwu ɛlɔgbulɔ iyi bɔkɔ ki pwa mbaa wu le, tee: Ukpo akwu ɛbɛ; ipwu ba i yi mawu mo ndii. 6 Gba ki zɔ te ki kyomesu mbala wu, ba ɔ gba ɔ ma nzu mu apula iyira iwomo iyɔkpɔɔ, de ba ki mulo, ongbulolo e yi ma nzu mo. 7 Gba kinzu ba ki zɛ luzɛ undu ɛbɛ iyi Ukpo, kyamate bɔkɔ Ukpo mafyi wu akwu ɛbɛ awu, de ba ki kyo mbala esu, akwɛyi ɛnzhi umba Umɛ wu, Ɔzhizɔsi Okrasi a gbɔ ingbomo nzu ma lɛɛbi.

8 Gba ki zɔ te kinzu ki yi ingbomo mo ndii, de ba ki kyoro enzu ma, ongbulolo ba e yi ma nzu mo ndii. 9 Tetete, gba ki nyama te kinzu ki ngbomo, Ukpo aa gba la ingbomo nzu a kpa nzu akwɛyi a wulu nzu ma sɛsɛ mbaa luzɛ undura izɛma. Ukpo e wo tayi kwuwongu akwu u wo iyeshi iyɔkpɔɔ; iyinayina iyi bɔkɔ e so, e wo yi. 10 Gba ki zɔ te ki di ngbomo dɛ mo, de ba ki wo Ukpo u mwangba, iso wu ba i yi ma nzu mo ndii.