1 Ɛmɛ umba idɛnyi mi, mi kakwupu kwɔlɛ mi ka yi kaa la lu ngbomo mo. Akwiyi gba onzu e ngbomo, ki yi onzu uwu bɔkɔ a kpa Ada ɛshɛku kwuwo nzu. Uwu gba ba akwu Ɔzhizɔsi Okrasi onzu uwu ototo awu le. 2 Okrasi awu mafyi wu gba akwu ɔgwuzɛ uwu bɔkɔ ingbomo nzu o gba yi o kpa nzu le, akwu ingbomo nzu kɛɛkyi mo, ingbomo iyi uwewe tete. 3 Gba ki wo kiya ingyi Ukpo a gyi, de ba i zɔ te ki yitu wu. 4 Onzu uwunawuna uwu bɔkɔ a zɔ te, <<Mi yitu wu,>> uwu ba a mbwalu ɔkpa uwu Ukpo mo, akwu u mulo, ongbulolo ba e yi ma wu mo. 5 Onzu uwunawuna uwu bɔkɔ ba a mbwalu iso iyi Ukpo, de i zɔ te e pwu idɛnyi wu, mu iwomo ɛlɛ te gba ki yitu marimari te ki yi mawu le. 6 Onzu uwunawuna uwu bɔkɔ a zɔ te e yi mawu, akwu mega kaa la zɛma kyamate Ɔzhizɔsi tayi.

7 Ɛmɛza mi, akwu ɔkpa uwepo gba mi ye yi mu ikama le mo, uwekyi uwu bɔkɔ lu yi wu ngbaa mu iyemo awu gba a ŋa wu. Ɔkpa uwekyi ele gba akwu ilɔ iyesheshi iyi bɔkɔ lu pwa yi awu. 8 Tetete, iso iyepo i yi mu ɔkpa awu. Ongbulolo awu o ma wu mu Okrasi mbala luzɛ yi, kwuwongu ipwu i yi mu ipikama-a akwɛyi ɛbɛ iyi ongbulolo ba i yi mu ilemo-o.

9 Gba onzu a zɔ te e yi mu ɛbɛ uwu ba e wo anya iyi umanyi wu u mbwalu, de ba e degbo mu ipwu bɛnɛ. 10 Onzu uwunawuna uwu bɔkɔ e pwu idɛnyi iyi umanyi wu u mbwalu de ba e yi mu ɛbɛ, uwu ba e yi kiya kikpikpɛnyi te ingyi bɔkɔ ki shi wu kaa la tama mo. 11 Onzu uwunawuna uwu bɔkɔ e wo anya iyi umanyi wu u mbwalu de ba e yi mu ipwu, uwu ba e yi mu igɔma mu ipwu bɛnɛ; Uwu ba e yitu mbaa bɔkɔ e yi mu isheyimo mo, kwuwongu ipwu i se wu eyi mo.

12 Ɛmɛ umba idɛnyi mi, mi ka mi ka yi kwupu kwɔlɛ

kwuwongu ingbomo yi o gba yi o kpa yi-e kwuwongu ɛnyi iyi Ɔzhizɔsi.

13 Mi ka ɛlɛ mi ka yi lunyi umbada,

kwuwongu lu yitu wu ngbaa mu iyemo.

Mi ka ɛlɛ mi ka yi alugbaga,

kwuwongu lu byi onzu uwoyi awu ma-a.

Mi ka ɛlɛ mi ka yi lunyi ɛmɛ mi lɛɛbi,

kwuwongu lu yitu iyi Ada-a.

14 Mi ka ɛlɛ mi ka yi lunyi umbada,

kwuwongu lu yitu wu, uwu bɔkɔ e yi ngbaa mu iyemo.

Mi ka ɛlɛ mi ka yi lunyi alugbaga, kwuwongu lu yi ekpasu,

iso iyi Ukpo ba i yi ma yi,

akwɛyi lu byi onzu uwoyi awu ma-a.

15 La lu pwu idɛnyi iyi kwudu kwɔlɛ naa apula iyi bɔkɔ i yi mu kwudu kwɔlɛ mo. Akwiyi gba onzu e pwu idɛnyi iyi kwudu kwɔlɛ, idɛnyi iyi Edego-ala i yi mawu mo. 16 Moo apula lɛɛbi iyi bɔkɔ i yi mu kwudu kwɔlɛ, kyamate apula iyi bɔkɔ ɛnwu iyi onzu i gyi, apula iyi enzu o ma akwɛyi ekweyi i wo mbo mo te lo yi yi mbala apula lɛɛbi iyi bɔkɔ i yi mu kwudu kwɔlɛ ba enzu o kwɛnwu ma yi. Apula ɛlɛ lɛɛbi i ngyi mbaa Edego-ala mo, i wɔ mu kwudu kwɔlɛ. 17 Kwudu kwɔlɛ mbala apula iyi bɔkɔ i yi ma ngwu awu lɛɛbi i yi mu ipyikama, onzu uwu bɔkɔ e wo iyi Ukpo a gyi ba e yi kwunyɔ ungwɔkpɔ.

18 Ɛmɛ mi, ibomo iyi kwuye i bomo kɛlɛ-ɛ! Kyamate bɔkɔ lu pwa te ogewa uwu Okrasi e yi mu inyɔma awu, kekelele lala agewa riba riba umba Okrasi o bo-o. Mu iwomo mbo ɛlɛ te gba ki yitu te kwuye kwu mbwambwa kwu bo-o le. 19 O wɔma mekeka nzu, kwuwongu umba o kwu umba nzu mo. Moo umba lakwu umba nzu, lo bo yi mbala nzu; Iwɔma mba i zɔ te onzu ukpukpɛnyi mba te akwu uwanzu mo.

20 Lunyi ba onzu Ɔkɛrikɛri e shi yi Kwundu wu Ɔkɛrikɛri akwɛyi lɛɛbi yi lu yitu iyi ongbulolo. 21 Mi ka ɛlɛ mi ka yi akwu kwuwongu lu yitu iyi ongbulolo mo le mo, Imi ba mi ka ɛlɛ mi ka yi kwuwongu lu yitu yi, kwuwongu lunyi tete lu yitu te imulo iyi mu ongbulolo mo. 22 Uwe ba akwu u mulo? U mulo akwu onzu uwu bɔkɔ a zɔ kwu zɔ ungwu Ɔzhizɔsi te akwu Okrasi mo. Onzu awu tayi gba akwu ogewa uwu Okrasi le, a zɔ kwu zɔ ungwu Ada mbala Umɛ. 23 Onzu uwu bɔkɔ a zɔ kwu zɔ ungwu Umɛ de ba a na Ada ma mo; onzu uwunawuna uwu bɔkɔ a nyama la Umɛ, a nyama la Ada tete.

24 Iyi bɔkɔ lu pwa mu iyemo awu la lu ra yi. Akwiyi gba lu ra yi, de ba lunyi lu kyo mbala Umɛ mbala Ada tete. 25 Ɛlɛ gba akwiyi bɔkɔ e so e shi mɛzhi kwuwo nzu le, te ee shi nzu kwunyɔ ungwɔkpɔ.

26 Mi ka apula ɛlɛ lɛɛbi mi ka yi kwuwongu enzu umba bɔkɔ o yi mu ibɔkpɔ te kaa lo kyoro yi mo awu. 27 Lunyi ba Kwundu uwu Ukpo e yi ma yi-e awu, lu yi ugɔ iyi onzu awa la gba la zɔ yi fo. Kwuwongwu Kwundu uwu Ukpo e ye yi mu apula lɛɛbi izɔma-a, moo kiya ingyi a zɔ yi awu akwu ongbulolo mo akwu imulo mo, kwuwo kwɔngu la lu rima mu Okrasi kyamate bɔkɔ a zɔ yi awu.

28 Kekelele ɛmɛ mi, la lu ŋɔ mu Okrasi kaa kwuyengwu bɔkɔ a ba gbama awu, lu fya ɛnwu ɛɛkɔ akwɛyi lovya lu wo yi mo ɔnuwu a ba gbama awu mo.

29 Akwiyi gba lu yitu te, uwu akwu ototo, de ba yitu te onzu uwunawuna uwu bɔkɔ e wo ongbulolo, akwu umɛ uwu Ukpo.