1 Onzu uwunawuna uwu a nyama te Ɔzhizɔsi gba akwu Okrasi le, de ba onzu awu akwu umɛ uwu Ukpo. Onzu uwunawuna uwu bɔkɔ e pwu idɛnyi iyi Ada, de ba e pwu idɛnyi iyi umɛ wu tete. 2 Gba ki pwu idɛnyi iyi Ukpo akwɛyi ki wo iyi bɔkɔ a za nzu te la ki wo, ɛlɛ gba i zɔ nzu te ki pwu idɛnyi iyi ɛmɛ umba Ukpo le. 3 Ipwudɛnyi iyi Ukpo gba i yi te: la ki wo iyi bɔkɔ a za nzu te la ki wo. Iso wu imbwaluma lala i kɔma mo, 4 moo umɛ uwu Ukpo uwunawuna o shi wu ekpasu iyi bɔkɔ e do te e towo ira iyinayina iwomo. Ikwidufulo nzu mu Ɔzhizɔsi gba ii shi nzu ekpasu kaa la ki towo ira iyinayina iyi kwudu kwɔlɛ iwomo le. 5 Uwe bɔkɔ e do te e towo ira iyi kwudu kwɔlɛ iwomo? Onzu uwu bɔkɔ a nyama te Ɔzhizɔsi akwu umɛ uwu Ukpo, uwu kɛɛkyi gba e domo le.

6 Ɔzhizɔsi Okrasi gba e bo mu kwudu kwɔlɛ le, tabɔkɔ kwuye kwu bo, Ɔzhɔnu u wo obatisima e wo wu obatisima akwɛyi e kpomo, ɛnzhi wu o fumo mɛzhi. Akwu obatisima kɛɛkyi gba o wo wu le mo, e kyo e kpomo akwɛyi ɛnzhi wu o fu mo. Kwundu uwu Ukpo gba a zɔ nzu apula ɛlɛ lɛɛbi le te akwu ongbulolo, moo u wu gba akwu u zɔ enzu ongbulolo iyɔkpɔɔ le. 7 Izɔgɔ ɛla gba i zɔ le tee Ɔzhizɔsi akwu umɛ uwu Ukpo: 8 Kwundu uwu Ukpo mbala embyi mbala ɛnzhi; izɔgɔ ɛla ɛlɛ lɛɛbi i zɛ kyaa mbala esu. 9 Izɔgɔ iyi enzu lala ki nyama la yi; izɔgɔ iyi Ukpo ba i ka iyi enzu ma, u wu ba gba a zɔ izɔgɔ mu reshi ingyi umɛ wu le. 10 Onzu uwunawuna uwu bɔkɔ a nyama te Ɔzhizɔsi akwu umɛ uwu Ukpo, e yitu iyi apula ɛlɛ lɛɛbi. Onzu uwunawuna uwu bɔkɔ a nyama mo ba, e wo Ukpo u mwangba kwuwongu a nyama la izɔgɔ iyi Ukpo mu reshi ingyi Umɛ wu mo. 11 Izɔgɔ gba i yi te: Ukpo e shi nzu kwunyɔ ungwɔkpɔ-ɔ, kwunyɔ ungwɔkpɔ ngwɔlɛ ba kwu yi mu Umɛ wu. 12 Onzu uwu bɔkɔ a na Umɛ awu, de ba e yi kwunyɔ ungwɔkpɔ; onzu uwu bɔkɔ a na Umɛ uwu Ukpo awu mo ba e yi kwunyɔ ungwɔkpɔ mo.

13 Imi mi ka yi apula ɛlɛ lɛɛbi lunyi umba bɔkɔ lu nyama la Umɛ uwu Ukpo awu, kaa la lu yitu tee lu yi kwunyɔ ungwɔkpɔ. 14 Kiya ingyi bɔkɔ ki ka nzu ɛnwu ma kwuyengwu ki ka mu idu iyi Ukpo la kwɔya ungwu kiya igagyima ingyinangyina gba i yi tee: aa pwa kwɔya nzu gba ki nda kiya ingyi bɔkɔ ki zɛ kyaa mbala iyi egbo wu. 15 Kwuwongwu aa pwa kwɔya nzu, ki yitu te kii fya kiya ingyinangyina ingyi bɔkɔ ki nda wu.

16 Gba onzu uwufo meka yi a ma umɛnɛ mu ingbomo iyi bɔkɔ i bo la lukwu mo, de ba la lɛ Ukpo kwuwo wu kaa la wa laa umɛnɛ awu ma, akwɛyi Ukpo a sa wu ma kego. Mi so le akwu meka iyi enzu umba bɔkɔ ingbomo mbo akwiyi bɔkɔ i bo la lukwu mo, moo ingbomo iyifo i bo la lukwu. Mi zɔ te lɔ lɛ Ukpo meka iyi ingbomo ɛlɛ te mo. 17 Ira iwomo iyinayina akwu ingbomo, tetete akwu ingbomo iyinayina gba i bo la lukwu le mo.

18 Onzu uwu bɔkɔ akwu umɛ uwu Ukpo, e ngbomo kwuyengwunanguna mo, kwuwongu Ɔzhizɔsi Okrasi, Umɛ uwu Ukpo e gbo wu mo akwɛyi onzu uwoyi e do te e wo wu kiya kinyinyi mo. 19 Ki yitu te kinzu ki kwu ɛmɛ umba Ukpo, onzu uwoyi gba ba a ra la enzu umba bɔkɔ o yitu iyi Ukpo mo le. 20 Kinzu ki yitu kpɔ tee, Umɛ uwu Ukpo e bo mu kwudu kwɔlɛ akwɛyi e shi ki yi iyitu iyi Ukpo ongbulolo. Kinzu ki yi mbala wu kwuwongu Ɔzhizɔsi Okrasi, Umɛ wu. Uwu gba akwu Ukpo ongbulolo uwu bɔkɔ ee shi enzu kwunyɔ ungwɔkpɔ le.

21 Ɛmɛ mi, la lu zɛ gboo mbaa eshi ibyima.