1 Imi Ɔzhɔnu onzu uwakɔ uwu ɔshɔshi gba mi ka kwupu kwɔlɛ le laa ɛnɛ kwogba mbala ɛmɛ wu umba bɔkɔ mi pwu idɛnyi mba gyɔɔ awu. Akwu Imi kɛɛkyi mo, i kyo enzu lɛɛbi umba bɔkɔ o yitu iyi ongbulolo, o pwu idɛnyi ŋɔ, tete 2 kwuwongu ongbulolo awu e yi meka nzu ba ee yi mbala nzu iyɔkpɔɔ.

3 Ukpo ete nzu mbala Ɔzhizɔsi Okrasi Umɛ wu le shi nzu esheshi, mbala eyembembyi mbala idigbomo iyi ongbulolo mbala idɛnyi iyi esu.

4 Mi yi ɔnyɛ gyɔɔ bɔkɔ mi ma te ɛmɛ ŋɔ umbafo o yi mu luzɛ mu ongbulolo kyamate bɔkɔ Ada a ta nzu ɔkpa te la ki wo tayi. 5 Kwuwo ngwɔlɛ ɛnɛ uwu kwogba mi kpa ŋa ɛshɛku te: la ki gyi esu. Akwu wu ɔkpa uwepo gba mi ka yi le mo, akwu uwu bɔkɔ e yi ngbaa mu iyemo awu. Mi kpa yi ɛshɛku te la lu pwu idɛnyi iyi esu. 6 Idɛnyi gba i yi tee: la ki mbwalu ɔkpa wu, mate bɔkɔ lu pwa yi mu iyemo awu, ɔkpa wu gba akwu tee: la lu pwu idɛnyi iyi esu.

7 Enzu wa kyoro enzu mo riba riba umba bɔkɔ o nyama te Ɔzhizɔsi Okrasi e bo mu kwudu kwɔlɛ mu ɛnwu iyi onzu mo, o fu kwudu munamuna-a. Enzu mbɔlɛ te lɛɛbi akwu wa kyoro enzu mo mbala agewa umba Okrasi. 8 La lu ngbɛndu kaa ɛduma iyi Ukpo iyi lu wo awu la kwa yi ishi mo, kaa la lu na rigbɛ yi duduu. 9 Onzu uwunawuna uwu bɔkɔ e kyo iyawu ba a ra la ɛzɔ iyi Okrasi mo e yi Ukpo mo, onzu uwunawuna uwu bɔkɔ a ra la ɛzɔ ɛlɛ e yi Ada mbala Umɛ. 10 Kwuwo ngwɔlɛ onzu uwunawuna uwu bɔkɔ e bo mogba yi bɔkɔ ɛzɔ wu akwu ɛlɛ mo, la lu na wu kaa la lu shi wu mogba yi mo. 11 Onzu uwunawuna uwu bɔkɔ a na onzu ele te de ba e kyo mu ɛduma iyira wu ɛnyi tete.

12 Iso iyi bɔkɔ mi gyi te la mi so yi le i yi gyɔɔ, Imi ba mi gyi la mi ka yi mu kwupu mbala keshi mo. Mi shi egbo te mi nyɔ munyi yi, gba mi bomo ki ma eyi iyi esu akwɛyi ki so iso gba ɔnyɛ nzu a nyɔlɔma le.

13 Ɛmɛ umba umanyi okokpayi o ye yi mu ɛnyi igbɛlɛma ma.