1 Imi Ɔzhɔnu onzu uwakɔ uwu ɔshɔshi gba mi yi mu kwupu kwɔlɛ ikama le, laa umɛza uwu idu mi Ɔgayɔ, uwu mi pwu idɛnyi wu ireyi.

2 Umɛza uwu idu mi, mii lɛ Ukpo te le shi ŋɔ okpara uwu ɛnwu kaa fya ɔnyɛ ma mu kiya ingyinangyina ingyi bɔkɔ ŋɔ wo, mate bɔkɔ luzɛ ŋɔ mbala Ɔzhizɔsi lu yi ɔnyɛ awu tayi. 3 Mi mwɔnyɛ gyɔɔ kwuyengwu bɔkɔ ɛmɛnɛ wa mbwalu umbafo o bo munɛ akwɛyi o za mi tee ŋɔ yi mu ɔgwuzɛ uwu Ukpo imbwaluma marimari, Imi mi yitu tee, tayi gba ŋɔ yi mu iwomo le. 4 Kwuye ungwunanguna ɔnyɛ mi a ka ele ma mo, gba mi pwa te ɛmɛ mi o yi mu ɔgwuzɛ uwu ongbulolo ɔlɛ imbwaluma marimari.

5 Umɛza uwu idu mi, uŋɔ ŋɔ mbwama la ɛmɛnɛ wa mbwalu mu apula ikikɔ ikikɔ, agboga lala ŋɔ kyo ŋɔ mbwa mba ma tete, ɛlɛ i zɔ tee, ŋɔ kwu u mbwalu ureyi. 6 Enzu umbafo mbo, o za nzu kinzu umba ɔshɔshi munɛ tee, lunyi lu pwu idɛnyi iyi wa mbwalu ireyi. kwuyengwu bɔkɔ enzu mbɔlɛ o bo fulomo kaa lo so mu ese iyifo awu, shɔɔkɔ la lu mbwa mba ma mu egbo ikpɛnyi moo ɛlɛ gba Ukpo a gyi le. 7 Moo enzu mbɔlɛ o yi mu ese ifulama kwuwongu Ɔzhizɔsi Okrasi, ba o na kiya mbaa enzu umba bɔkɔ akwu wa mbwalu mo mo. 8 I fa tee kinzu wa mbwalu la ki sa igɔ iyi enzu mbɔlɛ te ma kaa kinzu la ki kyo la ki lo ewo kyaa mbala mba kaa la ki zɔ enzu ɛduma iyi ongbulolo.

9 Imi mi kakwupu mi ka la wa mbwalu mu kwuse yi mekyi, Odiyotirofi uwu bɔkɔ a gyi i to keyi iyi Ɔshɔshi awu ba, e towo iso mi imbwaluma. 10 Kwuwo kwɔlɛ, gba mi bo mu kwuse yi, iyi bɔkɔ Odiyotirofi e yi mu iwomo le, mi so yi Ɔshɔshi gedegede. E so iso nzu iyira midu iyi enzu. Akwu ɛlɛ kɛɛkyi mo, ɛmanyi nzu wa mbwalu lala a ana mba mo, akwɛyi enzu umba Ɔshɔshi umba bɔkɔ o gyi te lo na mba lala a nyi mba ma, umba bɔkɔ o na mba awu lala a ramba ma mu ɔshɔshi.

11 Umɛza uwu idu mi, uŋɔ ki nyama kaa vɔngɔ ari iyira mo, ari iyesheshi gba vɔngɔ mbaa enzu le. Onzu uwu bɔkɔ e wo iyeshi, i zɔ te onzu awu akwu umɛ Ukpo, onzu uwu e wo iyira ba, i zɔ te onzu awu e yi Ukpo mo ndii. 12 Enzu lɛɛbi o yi mu iso isomo iyesheshi iyi Ɔdimɛtirɔ luzɛ wu lala akwu longbulolo, ɛlɛ i zɔ te uwu akwu onzu uweshi. Kinzu tete ki yi mu iso wu isomo iyesheshi, lunyi lu yitu te iyi bɔkɔ ki so le akwu ongbulolo.

13 Imi mi yi apula gyɔɔ iyi mi gyi te la mi ka yi, Imi ba mi gyi te la mi ka ŋa mu kwupu mbala keshi mo. 14 Imi mi shi egbo te mi nyɔ munyi ŋɔ afyi ɛlɛ. Akwɛyi ki so iso mbala esu.

15 Ukpo le shi kaa ŋɔ mu oloto. Ɛmɛza ŋa mu ɔshɔshi munɛ lɛɛbi, o ye ŋɔ mu ɛnyi igbɛlɛma. Ɛmɛza nzu lɛɛbi, gbɛlɛ mba ɛnyi kɛnyi kɛnyi.