1 Kwupwu kwɔlɛ kwu ngyi mbaa mi, Imi Ozhudu, umɛgba uwu Ɔzhizɔsi Okrasi, umanyi wu Ozhemisi.

Mi ka yi, lunyi umba bɔkɔ Ukpo a ya yi ma, umba bɔkɔ Ada Ukpo Edego-ala e kpo lukwu yi, bɔkɔ Ɔzhizɔsi Okrasi e ye yi mu igbomo awu:

2 Eyembembyi mbala egbo inɔma mbala idɛnyi lakwu iyayi gyɔɔ.

3 Ɛmɛza mi umba idɛnyi mi, mi wo ekpasu gyɔɔ kaa la mi ka yi kwupwu mekeka iyi isama iyanzu ɛlɛ, akwɛyi mi ma tee i shoshi kaa la mi ka yi kwupwu efyefya kaa la mi ka yi ɛnwu ma kaa la lu gbo ikwu idu lu fulo ɛlɛ ma, iyi bɔkɔ Ukpo e shi enzu wu lɛɛbi izhikpɛnyi bi awu. 4 Moo enzu umbafo umba bɔkɔ luzɛ mba akwu undu Ukpo mo, o fye mo kyokyokyo mɛka nzu-o, enzu umba bɔkɔ o tutu ɛlɔgbulɔ mɛka iyi esheshi iyi Ukpo nzu mo te kaa lo nvye ɛgwuzɛ iyira mba ma, umba bɔkɔ o towo Ɔzhizɔsi Okrasi, Adakwogba nzu mbala Ɔkwu nzu mo awu. Ikpɛdɔma mba o ka yi ma mu kwokpo ungwu iso iyi Ukpo diridiri-e.

5 Lunyi lu yitu iyi ɛlɛ lɛɛbi-e, tetete mi gyi tee la mi lolo yi kpɔ tee Ɔkwu a walaa enzu umba Izirɛ ma mu ɛzhi iyi Izhipiti, tetete mizhikembo iyi ɛlɛ, a ngbɛ umba bɔkɔ o kwu idu lu fulo mo awu ma. 6 La lu lolo tee alɔgbulɔ umba Ukpo umba bɔkɔ o wo ɛduma iyi bɔkɔ o shi mbo tee lo wo mo ba ɔ lafya laa riyi ingyi iŋɔma mba: Ɔkwu a gba mba akyi mu ɛyɛ iyɔkpɔɔ ba ɔkpɔɔ akwɛyi e fu mbo mu kizɛ ingyi ipwu mɛzhi mɛmi, mbaa bɔkɔ Ukpo e shi mbo kaa lɔ rigbo Kwɔfyi ungwɔkwu kwɔngu bɔkɔ ɔ bɔ ngbɛ mba ombu uwoyi. 7 La lu lolo Ɔsɔdɔmu mbala Ogomora mbala ese iyi bɔkɔ i fula yi ma iyi bɔkɔ enzu mbo o wo kyamate alɔgbulɔ umba Ukpo mbamba o wo akwɛyi o ralaa ɛmba o shi iyama mbala apula iyi kashi iwomo: ese ɛnyi o lo mbo inyashi iyi ɔyi uwɔkpɔɔ kaa lakwu izɔma laa uwewe.

8 Tatayi, enzu wawolondo mbɔlɛ o mbwalu ondo mba akwɛyi oo ralaa ɛnwu mba oo shi ingbomo; umba o zhi idomo iyi Ukpo ma akwɛyi o siso iyira mu reshi ingyi alɔgbulɔ umba Ukpo moshi. 9 Ɔsu uwu alɔgbulɔ umba Ukpo uwu o ya wu te Ɔmakɛlu awu lala e wo ɛlɛ te mo. kwuyengwu e yi mu kaambu irimo mbala onzu uwoyi meka yi ukpɛzhi uwu Omosisi, Ɔmakɛlu e so onzu uwoyi iso iyira mbala aripemo mo, uwu a za wu tee, <<Ŋɔ ma kwuwo ungwu Ɔkwu!>> bi. 10 Enzu mbɔlɛ ba kiya ingyinangyina ingyi bɔkɔ umba o zɔngɔma ngyi ma mo, umba o pyingyi mo; o bi egbo kyamate izɔfyi tayi, iyinayina iyi egbo mbo i so mbo gba o wo le akwɛyi o ka laa ɛmba ɛdɔ ingbɛma. 11 Enzu mbɔlɛ inyashi iyɛku gba i rigbo mbo le! O mbwalu ɔgwuzɛ uwu bɔkɔ Okenu a mbwalu. Kwuwongwu eduwo, o ralaa ɛmba o shi ingbomo iyi bɔkɔ Obalamu e ngbo. O towo Ukpo mo kyamate bɔkɔ Okora e towo Ukpo mo awu, akwɛyi o kpɛdɔma mate uwu tayi tete. 12 Enzu mbɔlɛ o yi kyamate apula iyi ɛnyinyi iyi bɔkɔ i nvyemo mu kiya ingyi irimo ingyi ɛlu ikpalama yi. Umba oo fye ɛmba kɛɛkyi. Umba o yi kyamate amu iyi bɔkɔ kwokpo kwuu ga yi ŋanga ba i bo la embyi mo tayi. O yi kyamate ɛwɛyi iyi bɔkɔ mu kwuye yi lala, i muma mo, iyi bɔkɔ o wuyi mo la akpa la akpa-a akwɛyi i kpomo-o ndii tayi. 13 Umba o yi kyamate agba iyembyi umba risu iyi bɔkɔ i wo ovyo pwate awu, o kwɛnwu mu apula iyi lovya kyamate kwɔnzhɛ tayi. Umba o yi kyamate elovyo iyi bɔkɔ i lafya la riyi yi akwɛyi i kpɛvyɛ shaa, iyi bɔkɔ Ukpo e shi yi riyi mu kizɛ ingyi bɔkɔ ki ka ipwu le lɛɛbi iyɔkpɔɔ ba ɔkpɔɔ awu.

14 Akwu Ɛnɔki, uwu bɔkɔ akwu ɛdɔ iyi orowo i ye mu Adɛmu gba e so le ngbaa diridiri mɛka mba tee: <<Yese! Ɔkwu a nyɔ mbala alɔgbulɔ wu umba ɔkɛrikɛri umba riba edubu guruguru 15 kaa la zɔ uwewe ombu, kaa la zɔ wɔnu wu la umba bɔkɔ o wo apula iyi ira mbala iso iyi irayira iyi bɔkɔ enzu wayi Ukpo mo o so mu reshi wu!>>

16 Enzu mbɔlɛ o za anu iyɔkpɔɔ mbala enzu kwungbɛ ishimo; oo mbwalu ira iyi egbo mbo; o pwɔ ɛmba ma akwɛyi o pwɔ enzu umbafo ma te kaa lɔ fya iyi bɔkɔ umba o gyi.

17 Ɛmɛza mi, lunyi ba la lu lolo iyi bɔkɔ wa zɛ ilɔ umba Ɔkwu nzu Ɔzhizɔsi Okrasi o so yi mekyi. 18 Umba o za yi tee, <<kwuyengwu bɔkɔ afyi iyi ibomo iyi kwuye i bo, enzu o wɔ umba bɔkɔ o wo yi ɛnɛ, umba bɔkɔ o mbwalu iyi bɔkɔ egbo mbo i gyi iyi bɔkɔ akwiyi Ukpo mo.>> 19 Enzu mbɔlɛ gba o bo laa ikama mekeka yi le, egbo mbo gba i so mbo iyi bɔkɔ lo wo le kwuwongu o yi Kwundu uwu Ukpo mo. 20 Ɛmɛza mi, lunyi ba la lu so wu mu imbwama laa esu mu ikwu idu lu fulo yi ɛlɛ iyi bɔkɔ i ka kɛrikɛri le awu. La lu lɛ Ukpo mu ekpasu iyi Kwundu uwu Ukpo, 21 la lu rima ngiri mu idɛnyi iyi Ukpo kaa lu rigbo Ɔkwu nzu Ɔzhizɔsi Okrasi kaa le shi yi kwunyɔ ungwɔkpɔ ba ɔkpɔɔ kwuwongu eyembembyi wu.

22 Enzu umba o yi egbo epo, la lu zɔ mba eyembembyi; 23 la lu walaa umbafo ma mu ɔyi kaa la lu sa mba ma; umbafo ba la lu ma eyembembyi mbo, tetete la lu ngbɛndu, lunyi ba la lu wo anya iyi ekpayi iyi kashi mba iyi bɔkɔ ari iyira mba i tutu yi mo awu.

24 La lu du Ukpo ma uwu bɔkɔ e do tee a rayi kaa la lu tama mo awu, akwɛyi a nya yi sɛkɛnɛ midu iyi inzumbɛku wu laa ɔnyɛ uwakwuu, 25 uwu bɔkɔ uwu kɛɛkyi gba akwu Ukpo Usama nzu le, mu Ɔzhizɔsi Okrasi Ɔkwu nzu, inzumbɛku mbala igba mbala ekpasu mbala idomo akwu iyawu lɛɛbi ngbaa mu iyemo iyi ɔyi uwu u kama awu mbala uwu kekelele mbala uwɔkpɔɔ ba ɔkpɔɔ! Li yi tayi.