1 Yese, Edego-ala e pwu idɛnyi nzu gyɔɔ akwɛyi a ya nzu te ki kwu ɛmɛ wu!. Tegba ba ki yi le !. Enzu umba kwudu kwɔlɛ o yitu nzu mo kwuwongu bɔkɔ o yitu iyi Ukpo mo le. 2 Ɛmɛza umba idɛnyi mi, kekelele te ki kwu enzu umba Ukpo, iyi bɔkɔ ki bi yi mu keyi ki du yitu mo bɛnɛ. Kinzu ba ki yitu te kwuyengwu bɔkɔ Okrasi a ba gbama awu kii yi kyamate uwu te, moo ki ma wu ta bɔkɔ e yi le. 3 Onzu uwunawuna uwu bɔkɔ e yi eyi ifulomo ɛlɛ a gbɔ ɛnwu ma sɛsɛsɛ, kyamate bɔkɔ uwu e yi sɛsɛsɛ tayi.

4 Onzu uwunawuna uwu bɔkɔ e koko e ngbomo e fo ɛrama ma; ingbomo gba akwu ɛrama ifomo shɛ le. 5 Lunyi ba lu yitu te Okrasi e bo kwuwongu ingbomo nzu.Uwu ba e yi ingbomo mo. 6 Onzu uwunawuna uwu bɔkɔ e yi mu Ɔzhizɔsi a ŋɔ mu ingbomo mo. Onzu uwunawuna uwu bɔkɔ a ŋɔ mu ingbomo, i zɔ te a da ma Okrasi nana e yi wu mo.

7 Ɛmɛ umba idɛnyi mi, onzu le kyoro yi mo mo. Onzu uwu bɔkɔ ee wo kiya ingyi ototo akwu onzu ototo, kyamate Ukpo bɔkɔ akwu ototo tayi. 8 Onzu uwu bɔkɔ a ŋɔ mu ingbomo, akwu uwu iyo uwoyi, moo iyo uwoyi e gwola ingbomo ngbaa mu iyemo. Umɛ uwu Ukpo ba e bo te kaa le tutu ɛduma iyi iyo uwoyi awu ma. 9 Onzu uwu bɔkɔ akwu umɛ uwu Ukpo a ŋɔ mu ingbomo e sheyimo mo, moo Ukpo e yi mu egbo wu-o, kwuwo ngwɔlɛ a ŋɔ mu ngbomo e sheyimo mo, moo akwu umɛ uwu Ukpo-o. 10 Mu ɔgwuzɛ ɔlɛ te gba ki yitu iyi enzu umba bɔkɔ o kwu ɛmɛ umba Ukpo mbala umba bɔkɔ o kwu ɛmɛ umba iyo uwoyi le: Onzu uwunawuna uwu bɔkɔ e wo kiya ingyi ototo mo ; nana a gyi umanyi wu mo akwu umɛ uwu Ukpo mo.

11 Kwuye ungwu bɔkɔ lu na iso i yi Ukpo kenze awu lu pwa yi te, kinzu wa mbwalu la ki gyesu. 12 La lu yi kyamate Okenu tayi mo uwu bɔkɔ akwu uwu onzu uwoyi bɔkɔ a ngbɛ umanyi wu ma awu. Kimbe ki shi bɔkɔ a ngbɛ umanyi wu ma? Akwu kwuwongu bɔkɔ ɛduma wu akwiyira, iyi umanyi wu ba akwiyi ototo le mo re?. 13 Ɛmɛnɛ mi, akwiyi gba enzu umba kwudu kwɔlɛ o wo anya yi, la kwa yi kiya ingyi kenzu iyama mo. 14 Ki yitu te ki pika lukwu ma ki yi kwunyɔ ɔ, kwuwongu ki pwu idɛnyi iyi ɛmanyi nzu wa mbwalu. Onzu uwu bɔkɔ e yi idɛnyi mo, e degbo e yi kyamate ukpɛzhi bɛnɛ. 15 Onzu uwunawuna uwu bɔkɔ e wo anya iyi umanyi wu akwu u ngbɛ onzu, lunyi ba lu yitu te u ngbɛ onzu uwunawuna a fya kwunyɔ ungwɔkpɔ mo.

16 Okrasi e kpomo kwuwo nzu, mu ɛlɛ gba ki yitu iyi idɛnyi le. Kinzu ba i fa te kaa la ki kpomo kwuwongu ɛmanyi nzu tete. 17 Akwiyi gba onzu e yi kiya ingyi kwuwo akwɛyi a ma umanyi wu te ugɔ a kpa wu ma ba a mbwa wu ma mo, onzu awu tayi idɛnyi iyi Ukpo i yi mawu mo? 18 Ɛmɛ mi, la ki so mu kenzu byi te ki pwu idɛnyi mo, la ki zɔ yi mu iwomo nzu mbala ongbulolo.

19 Mu ɛlɛ gba ki yitu te ki kwu enzu umba ongbulolo le, akwɛyi ki shi egbo nzu mɛzhi midu wu. 20 Gba egbo nzu i za nzu te ki kwu enzu umba ingbomo lala, ki yitu te iyitu iyi Ukpo i ka iyi egbo nzu mo ba e yitu iyi kiya ingyinangyina.

21 Ɛmɛza mi, gba ki yitu mu egbo nzu te ki kwu enzu umba igbomo mo, ki wiyi kwuyengwu ki lɛ Ukpo mo, 22 akwɛyi ki na kiya ingyinangyina ingyi bɔkɔ ki nda munyi wu, kwuwongu ki mbwalu okpa wu akwɛyi ki wo ingyi bɔkɔ a gyi. 23 Okpa wu ba akwu tee: la ki nyama la Umɛ wu Ɔzhizɔsi Okrasi, akwɛyi la ki gyesu mate bɔkɔ uwu a ta nzu okpa tayi. 24 Enzu umba bɔkɔ o mbwalu ɔkpa uwu Ukpo o yi mawu, Ukpo ba e yi mu egbo mbo. Mu ɛlɛ gba ba ki yitu te Ukpo e yi mu egbo nzu le: Ki yitu iyi ɛlɛ kwuwongu Kwundu uwu Ukpo uwu bɔkɔ e shi nzu awu.