1 Imi Ɔpɔlu, uwu bɔkɔ mi yi mu ugugyi kwuwongu Okrasi Ɔzhizɔsi awu, mbala umanyi nzu Otimoti gba ki ka ŋa kwupu kwɔlɛ le,

Ɔfilimɔ umɛza nzu mbala onzu wopo nzu uwu ɛduma, 2 mbala ɔshɔshi uwu bɔkɔ a kpala ɛlu mogba ŋa awu, mbala umanyi nzu okokpayi Afiya, mbala Akipu uwu bɔkɔ ki wo ɛduma iyi Ɔkwu kyaa awu:

3 Ukpo Ete nzu mbala Ɔzhizɔsi Okrasi le shi yi esheshi mbala idigbomo.

4 Umɛnɛ mi Ɔfilimɔ, kwuyengwunanguna bɔkɔ mi lɛ Ukpo, mi to rinyi ŋɔ, akwɛyi mi gbɛlɛ Ukpo mi ɛnyi. 5 Moo mi pwa mate bɔkɔ ŋɔ pwu idɛnyi iyi enzu umba Ukpo mbala ikwu idu lu fulo iyi ŋɔ yi yi mu Ɔkwu Ɔzhizɔsi. 6 Mi lɛ Ukpo tee ikpakya nzu iyi kinzu wa mbwalu li bo laa ikyomo mu izɔngɔma iyi esheshi iyinayina iyi bɔkɔ bɔkɔ ki fya mu luzɛ nzu mbala Okrasi. 7 Umɛnɛ mi, idɛnyi ŋɔ i shi mi ɔnyɛ mbala ɛnwu ɛkɔ gyɔɔ! Ŋɔ ka enzu umba Ukpo lɛɛbi ɛnwu ma.

8 Kwuwongwu ɔlɛ mi do te mii ta ŋa ɔkpa ka wo kiya ingyi i fa te kaa wo, kwuwongu mi kwu umɛnɛ ŋɔ meka iyi Okrasi. 9 Imi ba kwuwongu mi pwu idɛnyi ŋɔ le gba mi mate i shemi woshi i ka le awu tee la mi kpa ŋa ɛshɛku le. Imi Ɔpɔlu uwu bɔkɔ mi kwu Ɔsukpo uwu Okrasi Ɔzhizɔsi, bɔkɔ mi yi mu ugu ugyi kwuwo wu kekelele awu. 10 Kwuwongwu ɔlɛ mii kpa ŋa ɛshɛku kwuwongu Onisimo, uwu bɔkɔ akwu umɛ mi meka iyi Okrasi; moo kwuyengwu bɔkɔ mi yi mu ugugyi awu mi kwu ete wu meka iyi kwundu. 11 Kwuye kwukpɛnyi e yi ogbo eshi ŋɔ mo, kekelele ba e yi ogbo e shi ŋɔ mbala mi.

12 Mii gba mi lɔwu mi ka ŋa kekelele, egbo mi ba i yi mbala wu. 13 Mi gyi tee la ŋɔ mbala mi munɛ, mate bɔkɔ mi yi mu Ugugyi kwuwongu ilɔ iyesheshi ɛlɛ, kaa la mbwa mi ma kunzu ŋɔ. 14 Tetete, mi gyi tee la mi kpaŋa mɛga kaa mbwami ma mo; mi gyi tee wo yi mu inyama iyi egbo ŋɔ. Kwuwo kwɔlɛ, mi wo kiya kinyinyi te mo, ŋɔ nyama dɛ.

15 Igbomo Onisimo a lu ŋɔ afyima kwuye bwɛ kwuwongu kaa la gba le bo munyi ŋɔ kaa le yi mbala ŋa iyɔkpɔ le. 16 Kekelele akwu unye bi fo. a ka unye mo ŋa: akwu umɛnɛ uwu idɛnyi meka iyi Okrasi. Imi mi pwu idɛnyi wu gyɔɔ! Uŋɔ ba pwu idɛnyi wu ka, moo akwu unye a gba akwu umɛnɛ meka iyi Ɔkwu!

17 Kwuwongwu ɔlɛ akwiyi gba ŋɔ to mi tee ki kwu enzu umba ɛduma kya, de ba uŋɔ gba wu la i nama kyamate bɔkɔ ŋɔ na mi tayi. 18 Akwiyi gba e wo ŋɔ kiya ingyira nana e ri kwokpa ŋa, Imi gba mi wa le. 19 Imi Ɔpɔlu gba mi ka ɛlɛ le mafyi mi tee, Imi mi wa ŋa kwɔkpa ma. (I fa te la mi lolo ŋɔ ilolomo mo te uŋɔ mafyi ŋɔ ngyɔɔ ŋɔ ra la kwokpa mi.) 20 Kwuwongu ɔlɛ, umɛnɛ mi shɔkɔ wo mi iyeshi ɛlɛ ma kwuwongu Ɔkwu; kwuwongu ki kwu imɛnɛ meka iyi Okrasi awu, kaa ka mi ɛnwu ma!

21 Imi mi yitu tee, iyi bɔkɔ mi ka ŋa yi ele, uŋɔ ŋɔ wo yi tayi, Imi mi yitu tee uŋɔ lala ŋɔ wo iyi bɔkɔ i ka ɛlɛ ma. 22 Kekelele te, mi gyi te nɔngɔ ugu kaa she mi, moo mi shi egbo te Ukpo a pwa ɛshɛku ikpama yi lɛɛbi akwɛyi oo wa mi ma mu ugu ugyi o shi yi.

23 Epafarasi, uwu bɔkɔ e yi mu ugu ugyi mbala mi munɛ kwuwongu Okrasi Ɔzhizɔsi awu, a gbɛlɛ ŋɔ ɛnyi, 24 Omaki, mbala Arisitaku, mbala Odimasi, mbala Oluku umba bɔkɔ ki wo ɛduma kyaa le, o gbɛlɛ ŋɔ ɛnyi tete.

25 Esheshi iyi Ɔkwu nzu Ɔzhizɔsi Okrasi li yi mbala yi lɛɛbi.