1 Koko kaa lolo enzu te, lo mbwalu asu mbala enzu umbakɔ umba ogomineti, lo lo mbo mo, lo yi ɛnwu ma iyi ɛduma iyeshi iwomo. 2 Za mba te lo siso iyira iyi onzu mo, lo kwu enzu umba ovyo mo ba lo kwu enzu umba egbo mɛzhi midu iyi uwewe.

3 Za mba te, mekyi kinzu tete ki kwu erendo, ki lo iso iyi Ukpo ma mo. Ki nyama enzu o kyoro nzu mo, ki wo enzu enye umba ekweyi iyi apula iyinayina iyi bɔkɔ ɛnwu nzu i gyi. Kinzu ki ra la enzu mu akɔ ki gba ki wo rise ingyi esu, enzu o gyi nzu mo kinzu tete ki gyi esu mo. 4 Kwuye ungwu bɔkɔ Ukpo usama nzu ba e bo a ma eyembembyi nzu a gba e pwu idɛnyi iyi enzu, 5 akwɛyi a sa nzu ma. Ukpo e wo ɛlɛ akwu kwuwongu ɛduma iyesheshi iyi bɔkɔ ki wo le mo, akwu kwuwongu eyembembyi iyi enzu iyi bɔkɔ e yi yi le. Ukpo e shi nzu Kwundu uwu Ukpo kaa la gbɔ ingbomo nzu ma akwɛyi e shi nzu kwunyɔ ungwepo kaa la ki zɛ luzɛ undu lu she wu. 6 Ukpo e shi nzu Kwundu wu rɛshi kwuwongu Ɔzhizɔsi Okrasi usama nzu. 7 Ukpo e wo ɛlɛ kwuwongu esheshi wu, akwɛyi a ma nzu te ki kwu enzu umba ingbomo fo, kaa la ki kwu wa ri ogu uwu kwunyɔ ungwɔkpɔ ungwu bɔkɔ ki yi mu eyi ifulomo awu. 8 Iso iyi bɔkɔ mi so yi ele akwu iso iyi ongbulolo. Imi mi gyi te kaa so yi enzu shɛɛ, kaa enzu umba bɔkɔ o shi egbo mbo mu Ukpo awu lo bɔ kwuyi mu iyeshi iwomo. Ɛzɔ ɛlɛ, i sheshi ba i mbwama laa uwewe.

9 Uŋɔ mima mbaa kaambu unga erendo irimo, ku wa ɛdɔ iyi asɔkwu mo, ku tumo naa ewa ikirimo kwuwongu ɛrama iyi Omosisi mo, ɛlɛ te i bo la imbwama la uwewe mo, akwiyi umbwa. 10 Enzu umba bɔkɔ o bo la ikama, yi mbo mu alu izhepo te lo wo ɛlɛ mo, gba o pwa iyaŋa mo, de ba zɛ gboo mbala mba. 11 Mu iwomo mba ɛlɛ te ŋɔ yitu te enzu mbɔlɛ te o kpɛdɔma-a kwuwongu iyira iyi bɔkɔ o wo awu, akwu ɛkashi gba o yi mu iwomo le.

12 Kwuye ungwu mi lɔ Atima naa Otakiku mbaa ŋa, uŋɔ wo ekpasu kaa bo kaa du mi mu Onikopoli, kwuwongu mi ka amasa te mi yi mɔmɔ nzhii ba evya ela kwuyengwu okpakyi. 13 Kwuye ungwu bɔkɔ Ozina Oloya awu mbala Apɔlɔsi o bo fulomo awu, wo ekpasu ŋɔ, kaa shi mbo kiya ingyi bɔkɔ ki mbwa mba ma akwɛyi ba o yi kiya ingyinangyina ingyi bɔkɔ umba o gyi mu luzɛ mba. 14 Enzu nzu lo gyakpɔɔ mu iyeshi iwomo kwuyengwunanguna la enzu umba bɔkɔ o yi igɔ, kaa ɛmanyi nzu wa mbwalu mbɔlɛ lo ŋɔma iyi umbwa mo.

15 Enzu lɛɛbi umba bɔkɔ o yi mbala mi munɛ o ye ŋɔ mu ɛnyi igbɛlɛma. Uŋɔ ba gbɛlɛ wa mbwalu umba bɔkɔ o gyi nzu awu ɛnyi.

Esheshi iyi Ukpo li yi mbala yi lɛɛbi.