1 Ɔtayitɔ, uŋɔ ba zɔ kiya ingyi bɔkɔ ki zɛ kiya mbala ɛzɔ iyi Ɔzhizɔsi Okrasi. 2 Zɔ enzu umbakɔ anzɔnu te lo yi ɛnwu mba ma kaa enzu lo lo mbo mo, lo ngbɛndu mu iso isomo mbo mbala iwomo mbo. Lo rima gbagiri mu Ɔzhizɔsi imbwaluma mbala ipwudɛnyi mbala idu kwɔku.

3 Enzu umbakɔ ekokpayi tete, uŋɔ zɔ mba kaa lo wiyi iyi Ukpo mungyemungye, umba lo kwu wa tutu enzu ma mo ba lo rala ɛmba lo shi atɛ iwomo mo, umba ba lo zɔ ɛzu iyi bɔkɔ i zɛ kya mbala ɛzɔ iyi Ɔzhizɔsi Okrasi. 4 Akwɛyi umba o do te o zɔ eko umba anu ɛmɛshɛri kaa lo gyi anu mba mbala ɛmɛ mba, 5 kaa lo yɛmba kwuwo kaa lo ŋɔ sɛsɛ, kaa lo wo ɛduma iyi kwogba mba, kaa lo kwu eko umbeshi kaa lo lomo la anu mba, kaa enzu lo zhi iso iyi Ukpo ma mo.

6 Ɔtayitɔ, uŋɔ za la akolobiya kaa lo yi ɛnwu mba ma tete. 7 Luzɛ ŋɔ lakwu marimari mungyemungye kaa umba lo vɔngɔ iyeshi iwomo munyi ŋɔ. Bɔ shɛ mu kiya ŋa izɔma laa egbo ikpɛnyi. 8 Siso iyi kwuyi iyi bɔkɔ enzu o do te o towo yimo mo, akwɛyi umba bɔkɔ o nyama mbala ŋa mo awu o fya kiya ingyira ingyi bɔkɔ o so meka nzu fo, akwɛyi lovya lu wo mbo mo.

9 Za la enye te lo lomo laa akwu mba mu ɔgwuzɛ uwunawuna, lo wo ngyi bɔkɔ ada umba kwogba mba o gyi, lo ri kaambu mbala adakwogba mba mo. 10 Za mba te lo wu akwu mba ɛlɔ mo, umba ba lɔ zɔ te o kwu enzu umba bɔkɔ o fulo idu mamba, umba lo wo kaa iso iyi Ukpo uwu bɔkɔ a sa nzu ma awu, li lu enzu eyi mu ɔgwuzɛ uwunawuna. 11 Moo esheshi iyi Ukpo iyi bɔkɔ i bo la isama le i wɔ gedegede la uwewe-e. 12 Esheshi ɛnyi i zɔ nzu te, la ki lafya la ɔgwuzɛ uwu bɔkɔ akwu uwu Ukpo mo mbala ekweyi iyi kwudu kwɔlɛ, te la ki yi ɛnwu nzu ma, te la ki bɔ shɛ, te la ki zɛ mu ɔgwuzɛ uwu Ukpo mu kwudu kwɔlɛ, 13 mate bɔkɔ ki yi mu eyifulomo iyi kwɔfi ungwu esheshi kwɔngu, mɔnu mawu gba inzumbɛku iyi Ukpo mbala usama nzu Ɔzhizɔsi Okrasi i wɔ ndundu le. 14 Ɔzhizɔsi a ra la ɛnwu wu e shi te kaa la wa nzu ma mu ira lɛɛbi, kaa la ra nzu le wo enzu wa kɛrikɛri lɛnwu umba bɔkɔ o gyi iyeshi iwomo. 15 Ɛlɛ gba akwiyi ŋɔ zɔ wa mbwalu mɔmɔ lɛɛbi le, mu ekpasu iyi ŋɔ yi yi awu, ka mba ɛnwu ma kaa gba yi mbo mu alu mu idomo ŋɔ lɛɛbi. Ki nyama te onzu la zhi ŋɔ ma mo.