1 Imi, Ɔpɔlu, gba mi ka kwupu kwɔlɛ le. Ɔzhizɔsi Okrasi gba a ŋa mi le te la mi kwu umɛgba wu mbala uzilɔ wu le. A ŋa mi te la mi mbwama la enzu umba bɔkɔ Ukpo a ŋa, kaa ikwidufulo mbo mu Ɔzhizɔsi, mbala iyitu mbo mu iso iyi Ukpo li kyomo akwɛyi ɔ zɛ luzɛ undu Ukpo a gyi. 2 Ikwidufulo mbala iyitu ɛlɛ, i ri mu eyifulomo iyi kwunyɔ ungwɔkpɔ moshi mbaa Ukpo. Ɛlɛ gba Ukpo e so e shi mɛzhi le tee ee wo le dɛ ishi e be wo kwudu kwɔlɛ le. Ukpo ba a mulo mo. 3 Tabɔkɔ kwuye wu kwu wo mo, akwɛyi Ukpo a wa la iso ɛlɛ a ta yi kwudu ndunduu akwɛyi enzu o pwa yi. Ukpo gba e shi anu itama iyi ilɔ ɛnyi le, iyi bɔkɔ Ukpo, usama nzu a manda e shi mi te la mi wo.

4 Kwupu kwɔlɛ, mi ka ŋa, Ɔtayitɔ. Uŋɔ ŋɔ yi kyamate umɛ mi tayi kwuwongu kinzu wepepo nzu ki kwu wambwalu Ɔzhizɔsi Okrasi.

Imi mi lɛ Edego-ala mbala Ɔzhizɔsi Okrasi usama nzu, te le shi ŋɔ esheshi wu mbala egbo inɔma.

5 Ɔtayitɔ, Imi mi lu ŋɔ afyima mu Okiriti te kaa mbwa ɛduma iyi ishimo mɔmɔ iwomo le. Ɛduma iyi bɔkɔ ishimo gba akwu enzu itomo ka lɔ kwu enzu umbakɔ umba ɔshɔshi mu kwuse ungwunanguna le. Uŋɔ ka lolo iyi bɔkɔ mi za ŋa te wo, te, 6 onzu uwu bɔkɔ ŋɔɔ ŋa wu kaa lakwu onzu uwakɔ mu ɔshɔshi, lakwu onzu uwu bɔkɔ e wo rara mo, lakwu ɔnu uwu oko ukpɛnyi ba a yama mo, ɛmɛ wu akwu wa mbwalu, lakwu ɛmɛ umba ishi mo, o lomo la umbete mbo mbala umbanyimba. 7 Utokeyi uwu ɔshɔshi gba akwu u bɔ eyi mu ɛduma iyi Ukpo le. Kwuwo kwɔngu, lakwu u wo rara mo, lakwu onzu uwu bɔkɔ a gyi te iyawu gba li fye le iyɔkpɔɔ mo, ba lakwu u wo amba efyefya mo le to ɛnwu le shi atɛ, ba lakwu u wo ovyo mo, la kwu u ri ɔzawu mo. 8 Utokeyi uwu ɔshɔshi i fa te lakwu onzu uwu bɔkɔ a na agboga ewo epo, a gyi iyeshi iwomo iyɔkpɔɔ, e yi ɛnwu kwuwo iyɔkpɔɔ, e yi ɛnwu wu ma iyɔkpɔɔ, luzɛ wu akwu lu sɛsɛ, akwu u mbwalu ototo. 9 La kwu onzu uwu a ra la ɛzɔ iyi Ɔzhizɔsi a zɔ awu gbagiri kaa uwu tete la ka enzu ɛnwu ma kaa lo mbwalu ɛzɔ etoto kaa enzu umba bɔkɔ o towo yi mo awu, lɔ zɔngɔma te umba o ngbomo.

10 Umba bɔkɔ o gyi te lo lo watekeyi ma mo oyi gyɔɔ. Umba akwu wa zɔ ɛra-a akwɛyi o kyoro enzu mo te lo mbwalu yi. Enzu mbamba tayi gyɔɔ o wɔ mu uzhi uwu enzu umba bɔkɔ o zɔ te u mbwalu uwunawuna la zɛ ɛsɔ ma. 11 Ki shi enzu mbamba tayi kapa kaa lɔ zɔ wa mbwalu ɛzu mo, moo ɛzɔ mba ɛlɛ gba i yi mu ikwu idu lu fulo iyi enzu gyɔɔ itutumo le. Ɛzɔ iyi bɔkɔ enzu mbamba o zɔ awu, o zɔ te kaa lɔ fya eduwo iyi o za wu le bi. 12 Anukenzu mba ukpɛnyi lala e so dɛ-ɛ, tee, <<Enzu umba Okirita akwu wa mulo iyɔkpɔɔ. O yi ira kyamate izɔfyi umbira tayi, akwu asuwa ba o yi kwuri ungwu ubwu.>> 13 Iso iyi bɔkɔ anukenzu mba uwufo e so awu ba, te gba i yi le. Kwuwo kwɔngu, wa mbwalu Ɔzhizɔsi umba bɔkɔ o mbwalu iso iyi angba ɛnyi, tu mbo mo iyɛkɛkɔ kaa lɔ mbwalu iso iyi ongbulolo iyi Ɔzhizɔsi Okrasi, akwɛyi o kɔ ma mu Ɔzhizɔsi imbwaluma. 14 Ɛlɛ ii shi mbo o shi alu mba esepo iyi bɔkɔ Azhu ɔ ta awu fo, ba ɔ mbwalu ɛrama iyi enzu umba bɔkɔ o towo ototo imbwaluma awu fo. 15 Enzu umba bɔkɔ o yi egbo sɛsɛ, kiya ingyinangyina akwu kɛ sɛsɛ munyi mbo. Enzu umba bɔkɔ egbo mbo akwiyira, ba akwu wa mbwalu Ɔzhizɔsi mo, kiya ingyinangyina ingyi bɔkɔ o wo, aakwu kɛ sɛsɛ mo. Egbo mbo ibyima akwiyira iyɔkpɔɔ. 16 Umba o so te o yitu iyi Ukpo, ɔbulɛ luzɛ mba ba lu ri kaambu yi. Ukpo e wo kashi unga enzu mbamba tayi. O lo Ukpo mo mo. Umba o do kiya ingyesheshi kikpikpɛnyi iwomo mo.