1 Kwuwongwu Ukpo mbala Ɔzhizɔsi Okrasi uwu bɔkɔ a ba zɔ ombu uwu enzu umba bɔkɔ o yi la reyi mbala umba bɔkɔ o kpomo-o awu, uwu bɔkɔ a ba gbama kwuyengwu ɛsu irimo wu awu, mi ta ŋa okpa te: 2 Rima mu anu itama iyi iso ɛlɛ ma marimari lutu lɔnu; gba onzu e wo ɔnyɛ mo, nɔngɔ wu ma, kpa wu ɛyi, ka wu ɛnwu ma. Zɔ wu ɛlɛ lɛɛbi mu egbo mɛzhi. 3 Moo kwuye kwu yi mu inyɔma ungwu bɔkɔ enzu o shi kwɔlu mu ɛzɔ iyi kwuyi fo. Akwɛyi o wo iyi bɔkɔ egbo mbo i gyi, o kpala wa zɔ kiya ribariba ɛlu la ɛmba akwɛyi o so mbo iyi bɔkɔ umba o gyi te lo pwa le. 4 O to alu mba ma mbaa ongbulolo akwɛyi o shi alu mba mbaa ɛza iyi ɛdɔ mba. 5 Otimoti, uŋɔ ba yi ɛŋɔ kwuwo kwuyengwunanguna, yidu mu kinɔ imama, uŋɔ wo ɛduma iyi onzu u tanu, wo ɛduma iyi Ukpo bɔkɔ e shi ŋɔ le lɛɛbi.

6 Moo mi ra la kwunyɔ mi mi shi kyamate embyi mba isabɔ tayi-e; kwuyengwu mi lafya la kwudu kwɔlɛ kwu ndama fo. 7 Mi kiri ewa marimari-a, mi ri ɛnya mi mbwama-a, mi ra la iso iyi Ukpo nzhii ba mi mbwa ɛduma mi ma. 8 Kekelele te, rigbɛ ingyi bɔkɔ o shi onzu uwu a zɛ luzɛ undu ototo ingyi ɛnuma ri rigbo mi, Ɔkwu uwu bɔkɔ akwu u zɔ ombu uwu ototo awu e shi mi le mɔnu mawu, akwu Imi kɛɛkyi mo, e kyo e shi enzu lɛɛbi umba bɔkɔ o ri gbo la igbama wu tete.

9 Otimoti gyakpɔ ka bo ka du mi efyefya, 10 Moo Odimasi a lu mi afyima a ka mu Otesalonika kwuwongu bɔkɔ a nyangba iyi apula iyi kwudu kwɔlɛ ma. Ɔkirisɛsi ba a ka mu Ogalatiya, Ɔtayitɔ ba a ka mu Odamatiya. 11 Oluku kɛɛkyi gba e yi mbala mi munɛ le. Omaki la zɛ mbala ŋa ka le bo, moo a mbwa mi ma gyɔɔ mɔgɔ wu ɛduma mi. 12 Mi lɔ Otakiku ma mu Ɛfɛsɔ. 13 Kwuye ungwu ŋɔ nyɔ, za mi la origa uwu okpaki uwu bɔkɔ mi lu wu afyima mba Okapusu mu Oturowa awu, mbala ekpo iyi abwa iyi mi ka ɛzu ma yi awu.

14 Alɛkizanda onzu u ndo kwondo awu e wo mi iyira gyɔɔ. Ukpo a wa wu kwusa ma mu iyi bɔkɔ e wo awu. 15 Uŋɔ tete gboshoshi mbala wu, moo a gyi iso iyi Ukpo mo gyɔɔ.

16 Kwuye ungwu mi ka mbaa ombu ifumo mu Oromu iyi kwonze awu, onzu ukpɛnyi te a kama mbala mi kaa lakwu u uzɔgɔ mi mo, enzu lɛɛbi o lu mi afyima. Ukpo la gba yi la kpa mba. 17 Ɔzhizɔsi ba a mbwa mi ma akwɛyi e shi mi ekpasu akwɛyi mi mbwa ɛlɔgbulɔ ɛlɛ izɛma la enzu umba bɔkɔ o kwu Azhu mo lɛɛbi. Ɔzhizɔsi ba a wa mi ma mu kenzu unga abaga mbɔlɛ. 18 Ɔzhizɔsi Okrasi a wa mi ma mu ira iyi i gyi te li du mi lɛɛbi akwɛyi a wa mi ma e re mi mu kwogba wu moshi mu oloto. Iduma la kwiyi Ukpo iyɔkpɔɔ ba iyɔkpɔɔ. Ami.

19 Gbɛlɛ Opirisila mbala Akwila mbala enzu umba kwogba ungwu Onesiforu ɛnyi. 20 Erasitu e yi mu Ɔkɔrɛti, Otirofimu ba mi lu wu afyima mu ɔmilɛtu. 21 Gyakpɔ kaa bo munɛ dɛ ishi kwuyengwu okpakyi lakwu bo. Oyubulu mbala Ɔpudɛ mbala Olayinu mbala Okilawudiya mbala ɛmɛ umbɛnɛ lɛɛbi o ye ŋɔ mu ɛnyi igbɛlɛma.

22 Ɔkwu Ɔzhizɔsi Okrasi le yi mbala ŋa. Ukpo le shi ŋɔ iyeshi.