1 Imi Ɔpɔlu, mi kwu uzilɔ uwu Ɔzhizɔsi Okrasi mu inyama iyi Edego-ala. Ɔzhizɔsi a ŋa mi te kaa la mi so enzu te Ukpo e siso e shi mɛzhi te kinzu ki yi kwunyɔ ungwɔkpɔɔ mu Ɔzhizɔsi Okrasi. 2 Kwupu kwɔlɛ mi ka ŋa umɛ mi Otimoti:

Mi lɛ Ukpo ete nzu mbala Ɔzhizɔsi Okrasi Ɔkwu nzu te esheshi wu, eyembembyi wu mbala idigbomo wu li yi mbala ŋa.

3 Mi gbɛlɛ Ukpo ɛnyi uwu bɔkɔ imi mbala asɔkwu mi ki mbwalu la egbo ikpɛnyi awu. Mi gbɛlɛ wu ɛnyi ta bɔkɔ mi koko mi lolo ŋɔ mu Ukpo ilɛma mi, la utu la ɔnu. 4 Gba mi lolo oga uwu ŋɔ lo, mi gyi te la mi ma ŋa kaa ɔnyɛ mi la nyɔlɔma. 5 Mi lolo ikwu idu fulo ŋɔ ikpakara iyi ŋɔ yi yi awu, iyi bɔkɔ unyɔku ŋɔ Ɔlɔyisi mbala ɛnɛ ŋɔ Oyunisi o yi yi keyi dɛ awu. Mi nyama te uŋɔ ŋɔ yi yi tete. 6 Kwuwo ngwɔlɛ mi lolo ŋɔ kaa fya ɔyi uwu rɛshi ingyi ɛduma iyeshi ma ingyi bɔkɔ Ukpo e shi ŋɔ kwuyengwu bɔkɔ mi fulo ŋɔ ewo mu reshi awu. 7 Moo Ukpo e wo nzu te la ki kwu enzu umba o yi iyi mo, Ukpo ba e shi nzu ekpasu iyi kwundu wu kaa la ki yi idɛnyi i yi enzu kaa la ki yi ɛnwu nzu ma.

8 Kwuwo ngwɔlɛ ki wo lovya undu anu itama iyi Ɔkwu nzu Ɔzhizɔsi Okrasi mo, naa lovya unda mi, u gbo ugu ugyi kwuwongu Ɔzhizɔsi Okrasi mo. Uŋɔ ba kyo mbala mi mu wɔnu imama iyi anu itama iyi Ɔzhizɔsi Okrasi. Ukpo ee shi ŋɔ ekpasu kaa wo yi. 9 Ukpo a sa nzu ma akwɛyi a ya nzu ma kaa la ki kwu enzu wu wa sɛsɛ, akwu kwuwongu kiya ingyi bɔkɔ ki wo mo, akwu kwuwongu igyima wu mbala esheshi wu. Esheshi ɛlɛ i zɛ mu Ɔzhizɔsi Okrasi dɛ ishi Ukpo e wo kwudu kwɔlɛ le, 10 kekelele ba i ta nduu kwudu kwuwongu ibomo iyi Ɔzhizɔsi Okrasi usama nzu, uwu bɔkɔ a ngbɛ ekpasu iyi lukwu ma akwɛyi e shi nzu ɛnwu iyi bɔkɔ i kpomo mo kwuwongu ki nyama la Ɔzhizɔsi Okrasi. 11 Ukpo a ŋa mi kaa la mi kwu uzilɔ mbala u zɔ kiya wu kaa la mi zɛ ilɔ wu iyesheshi. 12 Akwu kwuwo ngwɔlɛ gba mi yi mu wɔnu imama le. Imi ba mi wo lovya mo, kwuwongu mi yitu iyi onzu uwu bɔkɔ mi fulo egbo ma wu, imi mi fulo egbo te Ukpo e do te e shi rito ingyi iso wu nzhii ba kwɔfyi ungwu Ɔzhizɔsi a ba gbama. 13 Ra la ongbulolo uwu bɔkɔ mi zɔ ŋɔ awu, kaa lakwu izɔma iyi bɔkɔ ŋɔ mbwalu yi mbala ikwu idu lu fulo mbala idɛnyi iyi Ɔzhizɔsi Okrasi e shi ŋɔ awu. 14 Mu ekpasu iyi Kwundu uwu Ukpo uwu bɔkɔ e yi ma nzu awu, gbo ilɔ iyesheshi iyi bɔkɔ o lo ŋɔ mu kwuwo awu ma.

15 Uŋɔ ŋɔ yitu te onzu uwunawuna uwu bɔkɔ e yi mu ɛzhi iyi Eshiya, ikyo Ofagelu mbala Amogeni o renya o shi mi. 16 Ukpo le shi kwogba ungwu Onesiforu iyeshi wu, kwuwongu a na mi ewo epo kwuyengwunanguna. E wo lovya kwuwongu o ta mi mu ugu ugyi mo. 17 Kwuye ungwunanguna ungwu bɔkɔ e bo mu Oromu, a kagyi mi ngbɛɛ nzhii ba e fye mi mo. 18 Ukpo la ma eyembembyi wu ɔnuwu kwɔfyi ungwu ombu izɔma wu! Uŋɔ ŋɔ yitu marimari iyeshi iyi bɔkɔ e wo mi mu Ɛfɛsɔ.