1 Enzu wa mbwalu Ɔzhizɔsi lɛɛbi umba bɔkɔ o kwu enye, lo lomo la ada umba kwogba mba ma kaa enzu lo zhi ɛnyi iyi Ukpo Edego-ala ma mo, kaa lɔ zɔ te ɛzu iyi ki zɔ le, akwu iso iyira mo. 2 Enye umba bɔkɔ ada umba kwogba mba o kwu wa mbwalu Ɔzhizɔsi, lɔ zhi mba ma kwuwongu o kwu wa mbwalu kyakya mo. Umba lala ifate lo gbo mbo rinye ɔnyɛ li kaa le kwuwongu ada umba kwogba mba o kwu wa mbwalu Ɔzhizɔsi mbala mba tete, o gba o pwu idɛnyi mbo kpɔ.

Apula ɛlɛ gba ŋɔ zɔ mba kaa lɔ mbwalu le.

3 Onzu uwunawuna uwu bɔkɔ a zɔ enzu ɛzu iyi angba iyi bɔkɔ i zɛ kya mbala iso iyi Ɔkwu nzu Ɔzhizɔsi Okrasi e so mo, mbala iso iyi bɔkɔ i shi enzu kaa lɔ zɛ luzɛ undu lu she la Ukpo mo, 4 onzu awu tayi e kwu ɛnwu le bi moo e yi kiya kinyinyi mo. Obe uwu onzu awu tayi gba akwu lɔmbwu irimo mbala itumo iyi bɔkɔ i bo la rise iwomo mbala ovyo iwomo, mbala iso iyi amba, mbala eyi ibɔma iyira mu onzu 5 mbala ovyo iwomo mbala esu ngbɛɛ. Egbo iyi enzu mbamba tayi i sheshi fo. Umba o do te ɔ zɔngɔma ongbulolo ma fo. Umba o mamate imbwalu Ukpo akwu ɔgwuzɛ uwu eduwo ifyama.

6 Ukpo imbwalu ma mbala ingbede kwuwongu kiya ingyi Ukpo e shi ŋɔ, gba akwu kule ungwɔkwu le. 7 Moo ki bo la kiya kinyinyi mu kwudu kwɔlɛ mo, kinzu ba ki to kiya kinyinyi mangwu mo. 8 Kwuwo kwɔngu, gba ki yi kiya ingyirimo mbala ekpayi iyi isemo, la ki ngbede la Ukpo. 9 Enzu umba bɔkɔ o gyi kpɔɔ te lo yi kiya ingyi kwuwo, gba ipwama idu mbo bwɛɛ, ɔ kɔ mu itama mo. O fye mu kwuda ungwu apula iyira iwomo iyi erendo mbala iyi bɔkɔ i lo mbo mu kumbɛ ungwu lukwu. 10 Moo ikpolukwu undu eduwo gba akwu undu uwu ira iyinayina le. Enzu umbafo umba bɔkɔ o gyi kpɔɔ te lo yi eduwo, o lafyima la ɔgwuzɛ uwu Ukpo imbwaluma akwɛyi o ka la ɛmba la ubugyi gyɔɔ.

11 Otimoti, uŋɔ ba ŋɔ kwu uwu Ukpo awu, zɛ gboo mbaa ɛlɛ te lɛɛbi. Gyakpɔɔ kaa mbwalu ototo, idu iyi Ukpo, ikwu idu fulo, idɛnyi, idukwɔku, iyi kyoo. 12 Uŋɔ kiri ewa kaa ra la ikwu idu fulo ŋɔ mu Ukpo ngiri. Ka fya kwunyɔ ungwɔkpɔ ngwu Ukpo e shi ŋɔ kwuye ungwu o ya ŋa ma akwɛyi ŋɔ so gedegede leyi iyenzu guruguru te ŋɔ mbwalu Ɔzhizɔsi ŋa awu, rangwu kpakiri. 13 Imi mi ta ŋa ɔkpa mu idu iyi Ukpo Edego-ala u shi kiya ingyinangyinakwunyɔ awu, mbala Okrasi Ɔzhizɔsi uwu bɔkɔ e to izɔgɔ iyesheshi midu iyi Ɔpɔtiyɔ Opayileti awu, te 14 mbwalu apula iyi bɔkɔ o so ŋɔ lɛɛbi kyorikyori, kaa onzu uwufo la fya ɔgwuzɛ uwu e shi ŋɔ kwungbɛ mo nzhii ba kwuyengwu Ɔkwu nzu Ɔzhizɔsi Okrasi a ba gbama. 15 Edego-ala, Ɔsu uwu Asu, Ɔkwu uwu Akwu, uwu mafyi wu gba aa zɔ kwuyengwu ɛlɛ lɛɛbi i bi wo le. 16 Iduma mbala ekpasu lɛɛbi akwiyi Edego-ala uwu bɔkɔ uwu kɛɛkyi gba e kpomo mo le, uwu bɔkɔ ɛbɛ iyɛku i fula wu ma iyi bɔkɔ onzu e do te e re kɛlɛ mbawu mo, uwu bɔkɔ onzu uwunawuna a da ma wu dɛ mo, ba onzu e do te a ma wu mo iyɔkpɔɔ. Li yi tayi.

17 Enzu umba bɔkɔ o yi kwuwo mu kwudu kwɔlɛ awu, ta mba ɔkpa te lo kwu ɛnwu mo ba lo fulo egbo mbo lɛɛbi mu kiya ingyi kwuwo mbo mo, moo ɛlɛ lɛɛbi i yi iyɔkpɔɔ mo. So mbo kaa lo fulo egbo mbo lɛɛbi mu Ukpo Edego-ala, moo uwu gba e shi nzu kiya ingyinangyina kaa la ki mwɔnyɛ le. 18 Ta mba ɔkpa kaa lo mbwama la enzu umba bɔkɔ o yi igɔ, lo wo ɛduma iyeshi la enzu, lo nyi kwunyi mo, lo wo rɛshi mu egbo mbo lɛɛbi. 19 Gba o wo tayi, o kpala ɛmba kiya ingyi kwuwo ingyɛkwuu moshi ingyi bɔkɔ aa kwamba ɔla uwu ɛkɔ ɔnuwu kwɔnyi kwɔlɛ la ɔnyɛ imwuma.

20 Otimoti, rima ngiri kaa wo ɛduma iyi bɔkɔ Ukpo e shi ŋɔ te wo. Ki shi alu mbaa iso iyira iyi umbwa iyi bɔkɔ enzu umbafo o so, ba i zɛ kya mbala ongbulolo uwu Ukpo mo. Enzu mbamba tayi, o to yi te ɛlɛ akwu iyitu, tetete, ɛlɛ akwu iyitu mo ndii. 21 Enzu umbafo ɔ mbwalu iso iyira ɛlɛ; gba i shi o lafya la ɔgwuzɛ ongbulolo uwu Okrasi le.

Esheshi li yi mbala yi lɛɛbi. l