1 Uŋɔ ki kpa onzu uwakɔ ɛyi zhazha mo, uŋɔ ba so wu iso kyamate akwu ada ŋa tayi. Akolobiya ba wo mbo mate akwu ɛmɛnɛ ŋɔ tayi, 2 enzu umbakɔ ekokpayi wo mbo kyamate umbɛnɛ ŋɔ tayi, emesheko ba wo mbo kyamate ɛmɛnɛ ŋɔ ekokpayi tayi la egbo iruwu.

3 Bɔ eyi mu eko wa kpo anuma umba bɔkɔ ugɔ a kpamba ma awu marimari. 4 Akwiyi gba oko uwu bɔkɔ e kpo ɔnu ma ba e yi ɛmɛ naa eye, umba mbɔlɛ lo zɔ te o kwu wa mbwalu Ukpo mu eyi ibɔma mu enzu mbo keyi dɛ, mu iwomo ɛlɛ te umba o wa kwokpa la enzu umba kwogba mba, moo Ukpo a gyi ɛlɛ te. 5 Oko u kpo ɔnu ma uwu bɔkɔ ugɔ akpa wu ma akwu uwu bɔkɔ e yi enzu fo, uwu ba e shi egbo wu mu Ukpo ba a lɛ Ukpo lutu lɔnu kaa Ukpo la mbwa wu ma. 6 Oko u kpo ɔnu ma uwu bɔkɔ a ŋɔ ya wu mu ugyɔ uwu kwudu irimo, e yi la reyi le bi mo akwu ukpɛzhi. 7 Enzu mbamba ta mba kaza kɛlɛ tete kaa enzu umbafo mba lo fya mbaa bɔkɔ o bɔ mba kenzu mɛnwu mo. 8 Onzu uwunawuna uwu bɔkɔ a bɔ enzu wu eyi mo, ba iyi agba wu i ka le mo, onzu awu a mbwalu Ɔzhizɔsi fo onzu awu a ka rigɔ la onzu uwu akwu u mbwalu mo.

9 Oko u kpo ɔnu ma uwu bɔkɔ lɔri wu lu pika lɔri uwo ɛkpɛrɛnyi ma mo, uwu bɔkɔ a ya ɔnu ukpɛnyi mo lo ka ɛnyi wu ma mo. 10 Oko ele te lo yitu wu te ee wo ɛduma iyi esheshi kyamate, ɛmɛ iyimo, agboga inama, a gbɔ atakɛzhi iyi wa mbwalu ma, aa mbwama la enzu umba inyashi, e kyo a ra la ɛnwu e shi la ɛduma iyeshi iwomo.

11 Eko wa kpo anuma ɛmɛshɛri ki ka ɛnyi mba ma mo, moo kwuyengwu bɔkɔ ekweyi iyi ɛnwu i bi ga mba ma akwɛyi o bɔ idu mu Okrasi fo, o gyi te o ya anu ŋa, 12 Gba o wo ɛlɛ te Ukpo e lo mbo inyashi, moo iyi bɔkɔ umba o so te o wo awu, o wo yi mo. 13 I kyo kadu iyi ɛlɛ, o fye mu iŋɔma shaa akwɛyi o kpɛvyɛ magba magba; O vindɔ wa fembu tete, o lo kenzu mu iso iyi bɔkɔ akwu iya mba mo, iso iyi bɔkɔ akwiyi so mo gba o so le. 14 Kwuwongwu ɔlɛ eko wa kpo anuma ɛmɛshɛri mi ta mba amasa te, lo ya anu lo mba ɛmɛ, kaa lo bɔ eyi mu agba mba kaa enzu umbeyi lo fya kapa iyi o so iyira mba mo. 15 Moo umbafo o shi Ukpo ɔsu-a, akwɛyi o mbwalu onzu uwoyi ŋa.

16 Okokpayi uwunawuna uwu bɔkɔ akwu u mbwalu Ɔzhizɔsi uwu bɔkɔ e yi eko wakpanuma mogba wu, la mbwa mba ma, moo lo fulo ɔshɔshi ewulo mo, kaa ɔshɔshi la mbwama laa eko wakpanuma umba bɔkɔ ugɔ akpa mba ma shɛ awu.

17 Enzumbakɔ umba bɔkɔ o bɔ eyi mu ɛshɔshi marimari awu la lu lo mbo mo gyɔɔ, umba bɔkɔ ɛduma mba akwu anu itama mbala kiya izɔma awu, ilomo mbo mbala imbwama mba li ka le. 18 Moo kwokpo ungwu Ukpo kwu zɔ te, <<Endo uwu bɔkɔ e yi mu awa ilɔma lo ma wu kenzu ma mo. Onzu uwu ɛduma ba e do rigbɛ wu ma.>> 19 Uŋɔ ki na ombu uwu bɔkɔ o fu o lo onzu uwakɔ bi mo, azɔgɔ lo yi wepo naa wala dɛ. 20 Enzu umba bɔkɔ o ngbomo, lo tu mbo mo leyi iyi enzu gedegede kaa enzu umba bɔkɔ o shimo lo riyi.

21 Kwuwongwu Ukpo mbala Okrasi Ɔzhizɔsi mbala alɔgbulɔ umba Ukpo umba bɔkɔ a ŋa mba awu, mi kpa ŋa ɛshɛku te bɔ eyi mu kaza kɛlɛ, ki zɔ kusɛ mo ba ki zɔ iyitu iyi onzu meyi mo.

22 Uŋɔ ki fulo onzu kwuwo kpara mo, ki kyo mu ingbomo iyi enzu umbafo mo. Uŋɔ ba zɛ gboo mbaa ingbomo.

23 Uŋɔ ki wo embyi umba uta kɛɛkyi fo, wo embyi umba imuma iyi uwɛyi uwu owanyi bwɛ. Kwuwongwu ubu ɛnyi ŋɔ mbala efya wɔwɔ ɛnyi.

24 Ingbomo iyi enzu umbafo invyemo mo, i to mbo keshi keyi nzhii ba mu riyi ingyi ombu; iyi enzu umbafo ba i mbwalu mba kembo. 25 Tatayi ɛduma iyeshi i nvyemo mo, iyi bɔkɔ akwu iyeshi mo ba i nvyemo mo tete.