1 Ongbulolo uwu iso e yi te mɛɛ: Gba onzu a gyi te lakwu utokeyi uwu ɔshɔshi de, a mulɛ ɛduma iyesheshi. 2 Utokeyi uwu ɔshɔshi lakwu onzu uwu bɔkɔ oo la wu kenzu mɛnwu mo, lakwu ɔnzɔnu uwu bɔkɔ e yi oko ukpɛnyi, lakwu onzu uwu bɔkɔ e wo amba efyefya mo, e yi ɛnwu wu kwuwo, enzu o lo wu mo, onzu uwu bɔkɔ a mwɔnyɛ iyi agboga inama, onzu uwu bɔkɔ a zɔ kiya ego, 3 lakwu onzu uwu bɔkɔ e to ɛnwu wu a ta la atɛ iwomo mo, lakwu onzu uwu anu mo, uwu ba lakwu onzu uwu egbo, lakwu onzu uri lɔɔmbu mo, lakwu ugyi eduwo mo. 4 Lakwu onzu uwu bɔkɔ a bɔ eyi mu enzu umba kwogba wu marimari bɔkɔ ɛmɛ wu o lo wu mo ba oo mbwalu iso wu. 5 (Gba onzu a bɔ eyi mu enzu umba kwogba wu ego mo, i zɛ te bɔkɔ a bɔ eyi mu ɔshɔshi uwu Ukpo ego? 6 La akwu onzu uwu bɔkɔ a na iso iyi Ukpo iyepo mo. Moo, ɛlɛ i shi wu e fulo ɛnwu mu kadu, akwɛyi Ukpo e lo wu inyashi kyamate bɔkɔ e lo onzu uwoyi inyashi tayi. 7 Lakwu onzu uwu bɔkɔ e yi ɛnyi iyeshi mbaa enzu umba bɔkɔ akwu wa mbwalu mo, kwuwongu kaa lo lowu eseye mo, kaa ba le fye mu kwuda ungwu onzu uwoyi mo.

8 Uwo ɛduma mu ɔshɔshi tete lakwu onzu uwu bɔkɔ e yi egbo iyeshi, lakwu onzu ongbulolo, lakwu onzu uwu bɔkɔ e to ɛnwu a ta la atɛ iwomo mo, ba lakwu uwo kwupapa ungwu eduwo mo, 9 lakwu enzu umba bɔkɔ o rala ongbulolo uwu iso iyi Ukpo laa egbo ikpɛnyi. 10 Lo pwa mba ma keyi dɛ, gba o ma ira ikpikpɛnyi te munyi mbo mo, ba lo shi mbo lo so wu mu ɛduma iyi Ukpo iwomo.

11 Tatayi gba eko mbo lo yi le tete, lo kwu eko umba o yi egbo iyeshi, la kwu eko umba ikyɛma mo, umba ba la kwu enzu umba egbo mɛzhi bɔkɔ enzu o fulo egbo mamba mu kiya ingyinangyina.

12 Uwo ɛduma mu ɔshɔshi la kwu onzu uwu bɔkɔ e yi oko ukpɛnyi, bɔkɔ e do te a bɔ eyi mu ɛmɛ wu mbala enzu umba kwogba wu marimari. 13 Wa wo ɛduma mu ɔshɔshi umba bɔkɔ o wo marimari awu enzu o lo mbo mo gyɔɔ akwɛyi o yi kenzu unga iso isomo mu opwu uwɔkwu mbaa enzu meka iyi ikwu idu ifulo mbo mu Ɔzhizɔsi Okrasi.

14 Mi gyi te la mi bo munyi ŋɔ afyi ɛlɛ, tetete mi ka ŋa kwupwu kwɔlɛ dɛɛ, 15 gba mi bo efya mo, kwupwu kwɔlɛ lakwu shi ŋɔ kaa yitu iyi bɔkɔ enzu lo wo mu ugu uwu Ukpo, uwu bɔkɔ akwu ɔshɔshi uwu Ukpo uwu bɔkɔ e yi lareyi, inyi gba akwu ope mbala ɔla uwu bɔkɔ u rala ongbulolo le. 16 Onzu ukpɛnyi te e do te e ri kambwu te iso iyi bɔkɔ Ukpo a wu yi a ta nzu awu akwu i yi kenzu iyama mo:

e to ɛnwu iyi onzu,

O zɔ wu te akwu ongbulolo,

Alɔgbulɔ umba Ukpo o ma wu.

O tanu iyi ilɔ iyesheshi wu la enzu munamuna,

O kwidu o fulo mawu munamuna mu kwudu kwɔlɛ.

O to wu mo o kawa moshi.