1 Kwundu uwu Ukpo e so gedegede te, kwuyengwu imbwama enzu umbafo o lafya laa iso iyi Ɔzhizɔsi imbwaluma akwɛyi o mbwalu ɛndu iyi kwukyoro mbala ɛzɔ iyi eyo umbeyi. 2 Wa zɔ ɛzu ɛlɛ o wo kyamate umba o yi mu ongbulolo izɔma tayi, umba ba o yi mu imulo imuma, idu mba inzhirima kyamate onzu uwu bɔkɔ o ki wu kwoso ungwɔyi tayi. 3 O zɔ enzu te ishoshi te, ɔnzɔnu le to oko mo, okokpayi ba la ya ɔnu mo. O zɔ enzu te lo ri ewiri iyifo mo. Ewiri ɛlɛ ba Ukpo e wo yi kaa enzu umba bɔkɔ o mbwalu ongbulolo uwu iso iyi Ɔzhizɔsi lo ri la ɛnyi igbɛlɛma. 4 Moo kiya ingyinangyina ingyi bɔkɔ Ukpo e wo ki shoshi. Lo towo Kiya ingyinangyina ma mo, kiya ingyinangyina ba lo na ngyi ma laa ɛnyi igbɛlɛma, 5 kwuwongu iso iyi Ukpo mbala Ukpo ilɛma i shi ewiri ɛnyi i wuluma mbaa Ukpo.

6 Gba ŋɔ zɔ wa mbwalu apula ɛlɛ lɛɛbi, ŋɔɔ kwu umɛgba uwu Ɔzhizɔsi Okrasi uwu esheshi uwu bɔkɔ o yi wu o domo mu ongbulolo uwu ikwu idu lu fulo mu Ɔzhizɔsi Okrasi mbala ɛzɔ wu iyesheshi iyi bɔkɔ ŋɔ mbwalu awu. 7 Uŋɔ zɛ gboo mbaa iso iyi umbwa iyi bɔkɔ i du Ukpo ma mo. Uŋɔ ba zɔ ɛŋɔ ɔgwuzɛ uwu Ukpo. 8 Ɛnɛ inɛma kaa ɛnwu li fya ekpasu ma ishoshi, ɛduma iyi Ukpo ba ishoshi i ka le, kwuwogwu inyi gba imbwa la onzu ma le kwuyengwu e ye la reyi mbala kwuyengwu kwu yi mu inyɔma.

9 Ɛlɛ gba akwu ongbulolo uwu iso le, uwewe la nya yi ma. 10 Kwuwongwu ɔlɛ gba ki wo ɛduma iyɛkɔkɔ le, kwuwongu ki fulo egbo nzu mu Ukpo ureyi, uwu bɔkɔ akwu usama uwu enzu lɛɛbi, mbala umba bɔkɔ o kwidu o fulo ma wu shɛshɛ awu.

11 So mbo iso ɛlɛ mbala ɛzɔ ɛlɛ. 12 Uŋɔ ki shi onzu uwunawuna la zhi ŋɔ ma kwuwongu imɛshɛri ŋɔ mo. Uŋɔ ba kwu u mbwalu uwu bɔkɔ enzu o mondo wu mu iso ŋɔ, luzɛ ŋɔ, idɛnyi ipwumo ŋɔ, ikwu idu fulo ŋɔ mbala ɔpɛriri ŋɔ. 13 Gyakpɔɔ mu iso iyi Ukpo iwama gedegede mbala anu itama, mbala ɛzu izɔma nzhii ba la mi bi bo. 14 Uŋɔ ki zhi rɛshi ingyi kwundu ingyi bɔkɔ ki yi ma ŋa awu ma mo, ingyi bɔkɔ o shi ŋɔ kwuyengwu anukenzu o so iso akwɛyi watokeyi umba ɔshɔshi o fulo ŋɔ ewo mu reshi awu mo.

15 Ra la ɛŋɔ kaa shi apula ɛlɛ kaa enzu lɛɛbi lo ma i shekeyi ŋɔ. 16 Bɔ eyi mu luzɛ ŋɔ mbala ɛzɔ ŋɔ. Gyakpɔɔ mu apula ɛlɛ iwomo, kwuwongu gba ŋɔ wo yi, ŋɔ sa ɛŋɔ ma mbala enzu umba bɔkɔ o pwa ŋa.