1 Otimoti, iyi kwonze mi gyi te, la lu lɛ Ukpo iyɛkɔkɔ la enzu lɛɛbi akwɛyi la lu gbɛlɛ Ukpo ɛnyi kwuwongu uwewe. 2 La lu kyo la lu lɛ Ukpo kwuwongu asu mbala enzu lɛɛbi umba bɔkɔ o ra la atu iyi ogomineti, kaa la ki ŋɔ mu oloto la egbo mɛzhi kaa la ki gbo Ukpo ɔya mu egbo ikpɛnyi akwɛyi ki wo kiya ingyi bɔkɔ Ukpo a gyi. 3 Iwomo ɛlɛ te ishoshi, akwu kiya ingyi ki shela Ukpo Edego-ala usama nzu, 4 uwu bɔkɔ akwu mu igyima wu te uwewe la fya isama kaa le yitu iyi ongbulolo. 5 Moo kinzu ki yitu te Ukpo akwu ukpɛnyi, u ri meka uwu Ukpo mbala enzu akwu ukpɛnyi, uwu gba a kwu Ɔzhizɔsi Okrasi le, 6 uwu bɔkɔ a ra la ɛnwu e shi kaa lo ngbɛ wu ma kaa uwewe la fya isama. Ukpo a zɔ nzu ɛlɛ mu kwuye yi. 7 Akwu kwuwongu ɛlɛ gba Ukpo a ŋa mi te la mi kwu uzilɔ mbala u tanu uwu rɛnu wu le. Iso iyi mi so yi ele akwu iso iyi ongbulolo, akwiyi imulo mo. Imi mi kwu u zɔ ɛzu uwu iso iyi ongbulolo la enzu umba bɔkɔ akwu Azhu mo.

8 Kwuwo kwɔlɛ, mi gyi te anzɔnu munamuna, luzɛ mba mu idu iyi Ukpo lakwu undu ɔpɛriri dɛ gba o yi ewo mbo mo moshi mu Ukpo ilɛma ma le, lakwu enzu umba amba naa enzu umba kaambu irimo mo.

9 Mi gyi te eko tete lo se ekpayi ɔnyɛnyɛ, iyi bɔkɔ i fa mamba akwɛyi ii shi enzu o lo mbo mo, akwu inyi ishimo iyi ari iwomo mo naa egolu ilomo naa esepo iyi alu naa ekpayi iyi abwa gyɔɔ mo. 10 Eko lakwu umba bɔkɔ oo wo ɛduma iyeshi mu idu iyi enzu, ɛlɛ gba ishoshi te lakwu iwomo iyi eko umba bɔkɔ akwu ɛmɛ umba Ukpo le.

11 Oko uwunawuna la ŋɔma kyoo la ngbɛ alu, la gba le lomo la onzu uwu bɔkɔ e yewu mu ɛzu izɔma. 12 Mi shi kapa la oko te la zɔ ɛzu mo nana lakwu u to keyi uwu anzɔnu mo. Eko lo kpala kenzu mo. 13 Moo Ukpo e wo Adɛmu keyi dɛ gba e bo wo Ivu le. 14 Kuyi ungopo gba akwu te, onzu uwoyi e kyoro Adɛmu ma mo, akwu Ivu gba e kyoro wu mo le akwɛyi akwu onzu uwu ingbomo. 15 Eko ba o fya isama mbaa Ukpo kwuwongu ɛmɛ imbama akwiyi gba o lafya la Ɔzhizɔsi imbwaluma mbala idɛnyi iyi enzu ipumo, mbala iŋɔma iyi ɔpɛriri mbala luzɛ undu esheshi mo.