1 Otimoti, mi gyi te kaa yitu te: Inzumbira iyɛku i nyɔ kwuyengwu ibomo iyi kwudu kwɔlɛ. 2 Kwuye kwɔngwu enzu oo kwu wa gyi ɛmbɛmba kɛɛkyi, oo kwu wa kpoluku undu eduwo, mbala ibɔma, mbala ɛnwu ikwumo, mbala ari ikpama, enzu o lo umbete mbo mbala umbanyimba ma fo, enzu o ngbede mo, o lo iso iyi Ukpo mo mo. 3 Enzu o yi idɛnyi iyi enzu umbafo fo, o gbayi o kpa enzu mo, akwu wa tutu enzu, o yi ɛnwu mba ma kego mo, enzu o yi ira, o gyi iyeshi mo, 4 enzu oo kwu wa rutu uwesu, oo kwu wa kakara, oo kwu enzu umba ibɔma, oo gyi ɔnyɛ o ka Ukpo ma, 5 O zɔ te o yi Ukpo, ɔbulɛ o towo ekpasu wu mo. Zɛ gboo mbaa enzu mbamba tayi.

6 Enzu mbɔlɛ te gba o fye mu agba iyi enzu kyokyokyo kaa lo kyoro ekokpayi erendo umba bɔkɔ ingbomo i nyɔlɔ mba ma awu mo. 7 Eko mbɔlɛ te iyɔkpɔɔ o yi mu iyinayina ivɔngɔma, tetete, o zɔngɔma ototo mbala angba ma mo. 8 Kyamate Ozhenesi mbala Ozhambirisi o towo iso iyi Omosisi ma mekyi awu, tatayi gba enzu mbɔlɛ o towo ongbulolo mo le. Egbo mbo akwiyira, o kyo mbo o wama mu kwogba ungwu Ukpo mo. 9 Tetete, o do te o re shaaru la luzɛ mba ndɔlɛ mo. Iyi bɔkɔ i du Ozhemisi mbala Ozhambirisi mekyi awu gba i du enzu mbɔlɛ le tete; o re shaaru dɛ mo, akwɛyi onzu uwunawuna a da erendo mbo ma.

10 Otimoti, uŋɔ ba ŋɔ yi ɛzu iyi bɔkɔ mi zɔ lɛɛbi, ŋɔ yi luzɛ mi, ŋɔ yi egbo mi, ŋɔ yi ikwu idu fulo mi, mbala idu iyimo mi, mbala idɛnyi ipwumo mi, mbala idu kwɔku mi, 11 mbala inyashi imama mi, mbala apula ikikɔ ikikɔ iyi bɔkɔ i du mi mu Atiyɔki mbala Ikɔniyɔ mbala Olisitira, inyashi iyi bɔkɔ mi ma mɔmɔ. Tetete, Ukpo a wa mi ma ma yi lɛɛbi. 12 Ee, onzu uwunawuna uwu bɔkɔ a gyi te la zɛ luzɛ undu bɔkɔ Okrasi Ɔzhizɔsi a gyi, o lo wu inyashi, 13 enzu umbira mbala wakyoro enzu ba ira mba iwomo i kyomo. Ɔ gyakpɔɔ mu enzu ikyoromo, umba tete enzu o kyoro mbo mo. 14 Otimoti, apula iyi ŋɔ vɔngɔ akwɛyi ŋɔ nyama la yi awu ba, ra yi kpakiri tayi, moo ŋɔ yi enzu umba bɔkɔ o zɔ ŋɔ yi awu moo? 15 Uŋɔ ŋɔ yitu te ngbaa kwuyengwu ŋɔ kwu umɛshɛri gba ŋɔ yitu iyi iso iyi Ukpo le, te onzu uwu akwu idu wu e fulo mu Ɔzhizɔsi Okrasi gba Ukpo a sa wu ma le. 16 Iso iyi Ukpo lɛɛbi akwu ɛnyɔ iyi bɔkɔ e fu mu egbo iyi enzu umba bɔkɔ ɔ ka iso ɛnyi awu. Inyi gba o ra yi kaa lɔ zɔ enzu ongbulolo le, kaa lo tu mbo mo, lɔ nɔngɔ mba ma kwuyengwu o ngbomo, kaa lo kyo lɔ zɔ mba luzɛ undu toto undu lu she la Ukpo le, 17 kaa onzu u mbwalu Ukpo la fya iyitu mbala ekpasu kaa le wo ɛduma iyeshi iyinayina iyi Ukpo a gyi.