1 Kwuwo ngwɔlɛ uŋɔ Otimoti umɛ mi, kɔma mu esheshi iyi Ɔzhizɔsi Okrasi. 2 Apula iyi bɔkɔ ŋɔ pwa mi siso meka yi mu eyi iyi enzu riba, zɔ yi enzu umba kwuyi umba bɔkɔ o domo te ɔ zɔ yi enzu umbafo tete. 3 Yidu mu inyashi imama mbala mi kyamate osozha uwu Okrasi Ɔzhizɔsi tayi. 4 Onzu uwu bɔkɔ akwu osozha e kyo mu ɛduma iyi onzu uwu bɔkɔ akwu asozha mo mo kwuwongu a gyi te le wo iyi bɔkɔ adakwogba wu a gyi. 5 Tete, gba onzu e yi mu kenzu itumo unga enya irima, a fya rigbɛ ingyirimo mo gba a mbwalu ɛrama iyi enya irima ɛnyi mo. 6 Ɔnɛgba uwu kuyi gba ishoshi te lakwu onzu uwu kwonze uwu bɔkɔ e ri kule ungwu ewiri iyi utu wu le. 7 Otimoti, ngbɛndu mu iso iyi bɔkɔ mi ye ŋɔ mu isomo le, Ukpo le shi ŋɔ kaa zɔngɔma iso mi ɛlɛ ma.

8 Uŋɔ Otimoti, koko kaa lolo te Ukpo e yi Ɔzhizɔsi Okrasi mo mu kuvɔ, Ɔzhizɔsi ele a wɔ mu ɛdɔ iyi Ɔsu Odevidi. Ɛlɛ gba akwu ilɔ mi iyeshi iyi mi koko mi so yi le. 9 A kwu kwuwo yi gba mi yi mu inyashi imama nzhii ba o lo mi ɛyɛ kyamate mi wo iyira tayi le. Iso iyi Ukpo ba i yi mu ɛyɛ mo. 10 Kwuwo kwɔlɛ, mi bɔ ɛmi kepo midu te mi yidu mu inyashi iyinayina imama kwuwongu enzu umba bɔkɔ Ukpo a ŋa mba kaa umba tete lo nyama la Ɔzhizɔsi Okrasi akwɛyi o fya isama ma akwɛyi o fya inzumbɛku iyi bɔkɔ akwu iyɔkpɔɔ.

11 Iso ɛlɛ akwu iso iyi ongbulolo te:

Gba ki kpomo mbala Ɔzhizɔsi Okrasi,

kinzu tete ki gba la iyimo mbala wu;

12 gba ki yidu iyi inyashi imama kwuwo wu,

kinzu tete ki rɛsu mbala wu.

Gba ba ki towo wu mo,

uwu tete e towo nzu mo;

13 Gba ki wo iyi bɔkɔ a zɔ te la ki wo mo,

uwu ee wo iyi bɔkɔ a zɔ te ee wo nzu, kwuwongu uwu a mu angba mo.

14 Otimoti, uŋɔ koko kaa lolo wa mbwalu ɛzu ɛlɛ. Za mba te kwuwongu Ukpo, lo ri kaambu mu iluma iyi iso mo; moo kaambu kɛlɛ ke yi kwuyi mo, ka ngbɛ enzu umba bɔkɔ o yi mu alu ingbɛma ɛdɔma. 15 Bɔ kuyi mu ɛduma iwomo kaa zɔ ɛŋɔ mu idu iyi Ukpo te ŋɔ kwu onzu uwu bɔkɔ Ukpo a nyama la wu, onzu u wo ɛduma uwu lovya lu wo wu mo mo, onzu u zɔ ɛzu iyi ongbulolo. 16 Ki kyo mu eza ibama iyi umbwa mbala enzu mo, kwuwongu eza ɛlɛ te i shi enzu o lafya la ɔgwuzɛ uwu Ukpo. 17 Iso mbo ɛnyi i yama kyamate kwɔshinakpa ungwu kwu shi ɛnwu kpɛkpɛyi i pwofya tayi. Enzu wepo umba bɔkɔ o zɔ ɛzu ɛlɛ te gba akwu Amɛniyɔ mbala Ofiletu le. 18 Enzu mbɔlɛ o lafya la ongbulolo, o zɔ te Ukpo e yi wa mbwalu Ɔzhizɔsi mo mu kwuvɔ-ɔ, kwuwo ngwɔlɛ o shi wa mbwalu umbafo o lafya la Ɔzhizɔsi imbwaluma. 19 Tetete, ɔla uwu Ukpo ba u rima ngiri. O ka ɛzu mawu te: <<Ukpo e yitu iyi enzu umba bɔkɔ akwu umba wu,>> <<Onzu uwunawuna uwu bɔkɔ akwu u mbwalu Ɔzhizɔsi, mega a lafya la ira iwomo.>>

20 Mu kwogba ungwu onzu uwakwu o fya apula ikikɔ ikikɔ, iyifo o wo yi mu egolu, iyifo ba o wo yi mu ɛwɛyi, iyifo tete o wo yi mu lo mbo; iyifo o wo ɛduma iyesheshi ma yi, iyifo ba o wo ɛduma iyi umbwa ma yi. 21 Gba onzu a sɛ ɛnwu ma mu apula iyinayina iyi bɔkɔ akwiyi ira, onzu awu e yi kyamate apula iyi bɔkɔ o wo ɛduma iyi kwuyi ma yi, onzu awu akwu onzu ɔkɛrikɛri, akwɛyi ada uwu kwogba wu e wo ɛduma mawu akwɛyi o du wu te e yi ɛnwu ma iyi ɛduma iyeshi iyinayina byi ŋa.

22 Uŋɔ Otimoti rima mbaa apula iyira iyi bɔkɔ ekolobiya o wo yi, uŋɔ kpapyi mu iyeshi iwomo, uŋɔ kwu onzu uwu bɔkɔ enzu o kwidu o fulo mawu, pwu idɛnyi iyi enzu akwɛyi ŋɔ mu oloto mbala enzu mbala enzu umba bɔkɔ o gbo Ukpo oya la egbo mbo pɛriri. 23 Uŋɔ ki ri kaambu unga umbwa mbala erendo mbala enzu mo, kwuwongu ŋɔ yitu te kaambu irimo kɛlɛ te ke bo la itumo. 24 Onzu uwu e wo ɛduma iyi Ukpo ba e tumo mo; i shoshi te lakwu onzu uwu egbo mɛzhi mbala uwewe, onzu uwu e do enzu ɛzu izɔma ɔnyɛnyɛ, onzu uwu bɔkɔ e yidu mbala uwewe. 25 Enzu umba bɔkɔ a nyama la iso wu mo, la zɔ yi mba bɛbɛtɛ, igboshimo mu iwomo wu tayi Ukpo ee shi mbo kapa te lo ta mɛzhi akwɛyi ii shi o zɔngɔma ongbulolo mo. 26 Akwɛyi i shi mbo o byi egbo ɔnyɛnyɛ ŋa akwɛyi o ta mu kwuda ungwu onzu uwoyi fo, uwu bɔkɔ e yi mbo mo akwɛyi a ramba e wo enye wu kaa lo wo iyi bɔkɔ uwu a gyi awu.