1 Sede a da a siki ntani Mirikisi anebi nsu yaruwa su ma a siki su, yomuna sua samu nsu male ni yaruwa a siki ku. De sua kokoyi ntani mbode ma gaskye ba nja sua yi musu shina Nsude butu su bila lepi, yi yomu yaa zo su ni seberi bebeta. 2 Ntani yowa sua biya turiki ni ali mbo kumnya de sua yi, yomuna sua sa ntani nyowa sua yi beta mumungu a kiya turiki gaskye. 3 Sobon ni opu nsu male yaruwa mu, sua sika ku ni kokongye yaruwa de su samu gyolo anya ku. Mirikisi rigye pala karishe alaka su wo, bebeta su yaa pekye su. 4 Mirikisi bila meleku worede su yi lepi ba, sede e kutiri su te a wuta, e domuna su ni serika a siki romu nsu dopuwa anya de sua pekye nana de Mirikisi yaa yi su shiriya; 5 Nde Mirikisi bila ntani durinya de bise a beyi ba, E saka su ni totolo riki de lende ntani nsu lepi, sede E sila ni Nuwu, yaa manki ni gangasi ni Mirikisi, nja worosu su ntani bokwe; 6 Nde Mirikisi suwuta totolo geri sodoma nja Gomora su ma busi, e sa su de su man misali ni mbode yaa paru nja worede mani ali yiri Mirikisi ba; 7 Nde Mirikisi butu Lotu, nseminji gangasi anya Mirikisi, Lotu geni beki siki ni zunwa ali dola mere biya doka Mirikisi de ntani mu sua yi. 8 Lotu nseminji gangasi na anya Mirikisi, sede e zunwa a siki mumungu ntani, leyi basi sobon mbo rebi de su ma yi sobon su ma ntani mere biya doka na. 9 Nde mbo mu ma yomu, Obagizi shina yiri de yaa sila ni ntani gangasi dege mbode ma mumungu nja de yaa domuna mungu ntani ari pekye nana shiriya. 10 Musama worede sua biya mumungu memeri nkiya su su ki biya yiko Mirikisi

Male ni yaruwa woromu su ma nsori dishiya nja dege kiya, ntani woromu su ma pauri geba ni basi meleku ni bisi ba; 11 Ko meleku, de su pi male ni yaruwa mu sori, meleku mu su taba yi beta mumungu ko basi su a geba Obagizi ba. 12 Sede male ni yaruwa woromu sua yi beta ni saba de su shina kiya yi ba. Su ma kankye nama bikiya, de su man tunani ba, sua yi mbode dishiya su gye su de su yi, nama bikiya de ntani sua ka su kisa, yomuna sua bebeta kankye nama sanwa. 13 Male yaruwa sa ntani a siki damuwa nyowa, osu ma du Mirikisi yaa biya su ni guru Genbeki de su ba ntani. su yi mbode dishiya su gye su de su yi sua yi ko nnana jaja, su ma nsu saba la, nsu so zunwa ni buki ni si mbosi nja sha mboyi nja ku. 14 A kwanki guru, su sika ni memeri kwana nja mata ni ntani, sua taba geji ni yi mbo mumungu ba, sua biya ntani de su ma mere sori a beigaskye de su puari, su ma nsu opu mbo, su ma lalasheshe. 15 Male ni yaruwa mu, su bila turiki gaskye de su ma biya turiki ni balamu yaa ni beyor, de yaa so riba gyolo ni mungu. 16 Sede su kwabe sobon ni mumungu mbo de yaa yi, de janki yi beta ni arishiya nsebiki de nana anebi yi mbo kankye somiya.

17 Male ni yaruwa mu su ma kankye ndan miya de kyekeri, su ma kankye a gidagida de agaguwa wula de nana riki pauri, gaskye ma ndandaa, Mirikisi rigye shiriya su anya zunwa su wo a siki dopuwa. 18 Ntani woromu, te yi mumungu beta ni banza, ni ali bila zunwa nki ni lepi, kokori su ma de su ja worede sila dege mbo mumungu de su yi ali mumungu de yaa sa su peri siki. 19 Male ni yaruwa mu, su yi su anikowori ni ba su yenshi, sede osu nkiya su su ma bunwa ni mbo mumungu de sua yi, sobon konse e ma bunwa ni kowoni mbode yaa yi. 20 Nde ntani sila dege mumungu mbo de ma a siki durinya ta turiki ni shina Obagizi Yesu Kiristi nsude e shiya ma nsu Sila mu, se a beyi su kuma te yi mbo mumungu de su bila adaa, mbo mumungu mu kuma shakiya su, su kuma yi mungu pi yiri de su ma dege pari de su beigaskye anya Obagizi. 21 Yiri ntani woromu yaa pi su de su shina turiki gangasi ni Mirikisi ba, nja de su shina yi na su kuma te biya turiki de ma mumungu nja su ma ozagbo ni doka Mirikisi de su kokoyi su. 22 Ashe mbode su yi mu ema gaskye la nja keri beta de su pala nkye: <<Kere kuma mbeyi te rishe buburiya yi>> nja <<Alede de su yi wonka e kuma te kwakwana a dola.>>