1 Takada butu anya Sima Biturusu, de ma bunwa nja yamanki Yesu Kiristi,

Te anya worede su samu gangasi ni Mirikisi mu nja nsu sila mu Yesu Kiristi de ba mu beigaskye nsu dereja yiri namu:

2 Bila de aniyeri Mirikisi nja selema yi ema nja ku teke te anya shina Mirikisi nja Yesu Obagizi mu.

3 Mirikisi a siki sori yi e ba mu guru mbode mua bila de mu yi zunwa de jima Mirikisi te turiki shina de e sukwa mu a siki dereja nja kyakyawu gangasi yi. 4 Te turiki mbo woromu naa e ba mu totolo kyawuta de e yi anikowori yi nsu dereja, sobon te turiki kyawuta mu la kwa sila dege mungu memeri de ma a siki durinya de mu yi zumunshi a siki nki yi ni Mirikisi.

5 Sobon delili mu, ku yi guru kokori aku de ku ja beigaskye ku ali kyakyawu; ali kyakyawu ku, ku ja yi shina Mirikisi; 6 a siki shina Mirikisi, ku ma nsu ka kiya ku, a siki ka kiya ku ma nsu takuwa a siki takuwa ku ma nsu ali yiri ni Mirikisi; 7 ali yiri ni Mirikisi, ku ma nsu so yayuwa ku; a siki so yayuwa, ku ja so ni ntani ni gaskye. 8 Nde ku mani ali mu teke, yaa taba sa ku de kuma nsu mere yaya kankye ntani ba nja mere girima a siki shina ku Obagizi Yesu Kiristi. 9 Sede nde nsude lesa ali mu, e ma kankye nsude yaa geni geba ba, e ma makapi la, nja e mosi nkye Obagizi Yesu Kiristi rigye shire lepi yi de bise.

10 Nkayomu, yayuwa na, se ku ja guru kokori de ku sa sukwa ku nja zabi ku e ma mbo keleba anya Mirikisi, sobon nde ku yi mbo mu, kwa taba pauri anya beigaskye ku ba, 11 yomuna Mirikisi yaa yi ku totolo naba a siki solota ni Obagizi mu Yesu Kiristi nsu sila mu.

12 Sobon yomu Na kuku turunwa ku kowoni nana a kiya mbo woromu, kode ku rigye shina su wo ku sakisi nsori a siki gaskye de ku keleba. 13 Ni geni e ma kyakya la de ni kuku turunwa ku tunde ni tuku man leyi a siki nki mu. 14 sobon Ni shina Ni kusa muntu wo, yiride Obagizi mu Yesu Kiristi rigye nana ni nshi sere. 15 Sobon yomu Na yi kokori na de ni geni nkye ko a beyi de ni bila ku kwa kuku turunwa ni mbo worosu mu a siki dishiya ku.

16 A kwanki de mu gye ku manki nabari kyakyawu a kiya Yesu Kiristi de nana sori ni zo yi, mu yi ku kokongye na ba ko mu yi ampani ni simi mu ba, sede ni ndani mu mu geni girima dereja yi. 17 Sobon e keleba girima nja dereja anya Mirikisi Adaa de mu zi murinya butu anya Mirikisi Nsu Girima ni Dereja, nkye, <<Da mu na e ma Yaa na, de mma so; Ni shi na dishiya na yaa yi peri siki>> 18 Omu nkiya mu mu zi murinya mu de zo butu a bisi de muma nja shi a ogbo nsuseki.

19 Muma tebeshi ni kelima ni mbode anebi pala, su nana mu nkye mbo woromu ema gaskye la, yaa yi kyawu de ku beyi dishiya ku a siki yi, kankye asikye nana a siki dopuwa, ari de anya kwa yi ema kankye asikye kemu a siki dishiya ku. 20 Sede npari, ku shina nkye ba manki beta Mirikisi de anebi daa pala de mani tunani dishiya su. 21 Ba manki Mirikisi de anebi beyi de ma sobon ni tunani dishiya ni nsebeki ba, sede ntani beyi manki ni dege anya Mirikisi yiri de Aworo Nsuseki sa su de su pala.