1 Te anya toree de su ma a siki ku, Ni meyi ologba ku yayiwa na, E ni du ni ma sheeda la ni Genbeki de Yesu sha nja Ni ma a siki worede sua keleba nani wuta ni dereja a nana de Yesu yaa pelesa: 2 Ku ma nsu kpanku timshiya ni Mirikisi de e la sa a nani ku, ku yi anki ni kamkiya, ba nkye sobon de su sa ku dole aba, sede ku yi anki mu ni yeda leyi, yiri de Mirikisi yaa bila de ku yi; kede kuma nsu yi anki mu sobon gyolo, sede sobon ku man memeri; 3 Kede ku ma nsu nana worede Mirikisi la sa ku a nani sori, sede ku ma mbode ntani worosu mu sua kokoyi anya ku. 4 Nde tolense nsu kpanku te pelesa, kwa keleba nani wuta ni dereja nsude yaa taba sopa ko sikwa ba.

5 Yomuna oku yaya sambari, ku beyi girima te nja toree de su sopa. guru aku, ku yi nkiya ku anki a siki bwala kiya ku, yiride e ma rubuta a siki beta Mirikisi nkye,

Mirikisi yaa yi geba nja nsu dege kiya

sede yaa nana aniyeri e yi te nja nsu bwala kiya

6 Sobon yomu, ku bwala kiya ku a lelenga nani ni Mirikisi nsu sori, de e dege ku a kwanki de ma kyawu. 7 Ku gye Mirikisi guru mbode kuma bila sobon Mirikisi yaa so ku soseyi.

8 ku ka kiya ku nja ku yi zunwa shiri. Sobon oboki geba ku obiri e ma zaga kankye zaki e ma bila nsude yaa saga suku. 9 Kede ku bila e yi, ku sakisi nsori a siki beigaskye ku, sobon ku shina nkye yayuwa ku nsubiya Yesu a durinya guru osu ma su ma sha yiri takaasi mu.

10 A beyi de ku sha takaasi ni kwanki piri, Mirikisi de nana ntani aniyeri, e shina e sukwa ku zo anya girima ni gbogbo gbogbo sobon zumunshi yi nja Kiristi, Mirikisi nkiya yi yaa sika ku ni aniyeriyi, yaa sakye sa ku sakisi nsori, yaa kapa tutiri de yaa zizika ba. 11 Guru sori te nja Mirikisi ari gbogbo gbogbo. Emayomu.

12 Ni rubuta ku takada piri mu ni sua nto ni Selasi, yayiwa nsu aminshi, nupi na la de ni ja ku sori guyam nja ni gye ku nkye nsum na e ma gaskye ni aniyeri Mirikisi. Ku sakisi nsori a siki e yi.

13 Nsubiya Yesu de su ma a kesa Babila, worede de Mirikisi zabi su yere nja ku, su ma geshe ku ku, yomuna yaa na Marikusu e shi ma e ma gesheku. 14 ku geshe nkiya ku ni runguma nkiya ku ni yiri so ni nsubiya Yesu.

Mma yi lepa de Mirikisi ba ku Selema yi guru aku de kuma a siki Kiristi.