1 Takada butu anya Biturusu, yamanki ni Yesu Kiristi,

Te anya ntani de Mirikisi zabi, worede su ma bakwe a durinya, de su yaapi a guru kesa Pontu, Galatiya, Kapadokiya, nja Asiya, nja Bitiniya, 2 Oku de Mirikisi Adaa zabi ku te anya shina yi, de e wonkye ku sere sa keteri te anya Aworo yi, de su ba Yesu Kiristi girima nja ku samu moriya ni yaapi zini yi.

Mirikisi e ba ku aniyeri nja selema nyowa.

3 Yobo te anya Mirikisi Adaa Obagizi mu Yesu Kiristi! sobon nyowa toseyi e ba mu sabuwa leyi a siki zunwa mu ni sa dishiya te anya dege ni Yesu Kiristi a kumsha, 4 de mu samu anabirika ni gado de yaa taba bebeta ba, ko rubu ko yaa ba de Mirikisi la sa ku nshi a bisi, 5 oku worede Mirikisi tengele ku ni totolo sori yi sobon ku beigaskye anya yi, e shi yaa sigeba ni keyi ku ari a karishe de kwanki de nsu sila nku yaa pelesa. 6 Sobon ni mbo mu guru, ku yi peri siki, kode kwanki piri mu ku kadishiya a siki beki siki a kiya yiri gwada de ku kua sha kuzukam. 7 E man tebeshi de beigaskye ku de pi zinari dereja, kode nkye zinari yaa bebeta, yomuna sua gwada beigaskye ku kode e pi zinari dereja sobon beigaskye ku yaa ja ku yobo, dereja, girima a nana de Yesu Kiristi kuma mbayi zo a durinya. 8 Kode nkye ku taba geni Yesu Kiristi ba, sede ku so yi; kode nkye kuma geni yi kuzukam ba, ku beigaskye nja shi nja ku sa dishiya ni totolo peri siki de baki nsebeki yaa yiya pala ba. 9 Sobon ku samu sila ni leyi, de e shiya ema delili beigaskye aku a siki Yesu.

10 A kiya sila mu, anebi su yi beta a kiya ni aniyeri de mua samu, su bila ankeli a siki takada Mirikisi de su shina yiride Mirikisi yaa sila mu. 11 Su yi kokori de su shina kwanki de mbo mu yaa paru nja yiride sua ma, sede Aworo ni Kiristi de ma a siki asu pelesa gye su Genbeki de Kiristi yaa sha nja dereja de Mirikisi yaa beyi a geba. 12 Mirikisi pelesa gye anebi woroni nkye anki amu de su meyi ema na su naba, sede na ku la, de su yi beta a kiya mbode mua gye ku kuzukam a baki worede su beyi manki kyakyawu te anya ku te anya Aworo Nsuseki dege bisi. ko meleku de su ma a bisi su yi memeri de su shina mbo worosu mu.

13 Nkayomu, ku gyala dishiya ku sobon ni anki kyakyawu, ku ma nsu ka kiya ku; ku sa dishiya ku a siki aniyeri de sua ba ku a nana de Yesu Kiristi yaa pelesa. 14 Ku ba Mirikisi girima, yiride yaya sua ba nsu adaa su girima, kede ku yi memeri yi mbo mumungu kankye a kwanki beyi de ku shina Mirikisi ba. 15 Sede Mirikisi de sukwa ku ema nsuseki la, sobon yomu oku ma kuma nsuseki a siki guru mbode kwa yi; 16 sobon ema rubuta a siki beta Mirikisi nkye: <<Kuma nsuseki, sobon Eni mma nsuseki.>>

17 Tunde ku ma yi lepa kwa sukwa Mirikisi, <<Adaa>>. Nsude yaa yi konwawa shiriya de ema nana bombom ba, ku yi zunwa ku kankye bakwe a durinya a siki womba Mirikisi. 18 Sobon ku shina nkye ba ni mbode yaa bebeta ni wopi de nsu adatoloku bila ku nshi na Mirikisi sila nku ba. Ba mbode yaa lalashe kankye nsu aziripa ko zinari; 19 sede ni zini Kiristi nsu dereja, kankye timshiya de mani dola ko suwo ba. 20 Mirikisi zabi yi kapi de su yi durinya, sede e pelesa yi a kwanki ni karishe sobon oku. 21 Te anya Yesu la ku beigaskye nja Mirikisi, de dege yi a kumsha e beyi girima, sobon yomu na beigaskye ku nja sa dishiya ku ma a siki Mirikisi.

22 Kuzukam de ku wonkye dishiya sere te anya biya gaskye de kuma nsu so yayuwa ku, se ku sigeba ni so nkiya ku ni dishiya daa. 23 Sobon su yapu ku, ba te anya nki nsu bebeta ba, sede te anya sabuwa leyi te kelima ni Mirikisi de man leyi de yaa taba yaba. 24 Sobon su rubuta a siki beta Mirikisi nkye,

<<Guru ntani su ma kankye sanwa la

guru dereja asu ma kankye pure ni ntasi,

sanwa kyekeri pure yi yaa kekebe nya a kisi,

25 sede kelima beta Obagizi yaama gbogbo.>>

Nsu mu ma kelima nabari kyakyawu a kiya Yesu Kiristi de mu pala gye ku.