1 Nkayomu, tunde Kiristi Genbeki a siki nki, se oku ma kuman yiri tunani ni kadishiya a siki Genbeki ku, sobon du nsude Genbeki a nki e laba kiya e yi ni mungu mbo. 2 A beyi yomu, dege kuzukam ta geba yaa taba yi zunwa ni durinya mu a siki memeri mungu ali ni nki gagaba, sede yaa yi zunwa ni jima Mirikisi. 3 Ku yi zunwa ni kwanki nyowa a beyi ku yi mbode worede shina Mirikisi ba su mayi de ma mbo kumnya, nja memeri ni kwana nja mata ko menza worosu su, sha bugu, so te a buki de sua sha giya bugu, nja biya boka, mbode Mirikisi yaa bila ba naka. 4 E ma su mbo mamanki de su geni ku kwa yi yiri ali ni daa ba, ku ma mbo basi anya su. 5 Sede konwawa yaa pala ni baki yi mbode yi anya Mirikisi nsude ma ashiri de e shiriya guru ntani worede su ma leyi nja su muntu. 6 Mbode sa aka de nabari kyakyawu mu, na de su keyi manki te nja worede su muntu du, tunde osu ma sua yi su shiriya a siki nki yiri de sua yi ntani guru, sede aworo nsude yaa yi ali de Mirikisi yaa bila.

7 Karishe ni guru mbo e ma nani. Sobon yomuna ku mani nsu kiya ku nja de kuma ashiri, sobon de ku yi lepa. 8 A beyi guru, ku so nkiya ku soseyi, sobon so nkiya ku kwa ripe lepi de ku yi nkiya ku nyowa. 9 Ku ma keleba yayuwa a gizi ku ba ni mumungu beta ba. 10 Konse e yi ampani ni kyawuta de Mirikisi, beyi de e sua worosu nto, Mirikisi beyi kyakyawu. 11 Du nsude kyawuta e yi ma ni beyi manki Mirikisi la, bila de e beyi manki Mirikisi kyakya kankye Mirikisi nkiya e yi na meyi beta dege anya e yi, nde kyawuta ake e ma ni ANKI la, yi ANKI ni dishiya daa ni sori de Mirikisi ba ke, sobon a siki kowoni mbo Mirikisi yaa keleba yobo ta turiki Yesu Kiristi. Girima nja yobo ma nja ari gbogbo gbogbo. Ema yomu.

12 Yayuwa na de man so, kede ku ku yi manki sobon ni zapi ni gwada de kwa sha, kede ema ku kankye sabuwa mbo. 13 sede ku yi peri siki de kwa sha Genbeki a kiya Kiristi, sobon de kwa sika ni peri siki nde pelesa yiri girima de ema shi. 14 Nde su te basi ku sobon ni seni Kiristi, kuma nsu anabirika la, sobon Aworo nsu dereja de ma Aworo ni Mirikisi nsu pelesa yiri girima de Mirikisi ma nshi yaa zunwa a siki aku. 15 Nde ku Genbeki, kede ema nkye ki ma nsu kisa ntani ko Bolowa ko nsu mumungu ali yiri nsum, ko nsu yuru a beta worosu. 16 Sede nde kwa Genbeki sobon de ki ma nsubiya Yesu, kede ki zi kumnya ba, sede ki yobo Mirikisi sobon ki ma ni Kiristi. 17 Sobon kwanki keyi wo de shiriya yaa para a kiya ntani Mirikisi, nde su te para nja mu, mina karishe worede su ki zi manki ni nabari kyakyawu ni Mirikisi? 18 Yiride ema rubuta a siki beta Mirikisi nkye,

<<Nde yaa man wuya de ntani gangasi su sila;

yaya na yaa ma nja worede su beigaskye ba nja nsu yi mungu mbo?>>

19 Nkayomu, worede su ma Genbeki sobon de su ma nsubiya Yesu, su la leyi asu munka ba mirikisi nja su sigeba ni yi mbode kyakyawu.