1 Yomuna oku mata amere, ku bwala kiya ku ba menza ku, nde nseda su beigaskye ni kelima beta Mirikisi ba, yiri ali kyakyawu de kwa yi menza ku e shiya sa Mirikisi yaa juyi menza ku, kode ku yi su beta ba. 2 De su geni zunwa ni ali kyakyawu de kwa yi su ba ku girima. 3 Kede kyawu ku e mani gyaga gyala nki, ko gyaga ni gyala gesa kiya, sa mbo wuya ni zinari nja sa keikei nsu gyolo nyowa. 4 Memeko yomu, kyawu ku e mani dishiya kyakyawu, kyawu ku e mani nsu bwala kiya nja nsu soki kiya, mbo worosu mu su pi guru dereja anya Mirikisi. 5 Sobon a turiki mu na mata nsu zunwa seki a kwanki de bise su sa dishiya su anya Mirikisi, su yi anpani ni mbo worosu mu de su ma kyakyawu, su bwala kiya su ba menza su, 6 Kankye Saratu de e ba Abireyi girima ari e sukwa yi nkye obagizi na. Yomuna du yayamata ku yi mbode ma kyakyawu, kede ku zi womba ba, kwa ma kankye amaa ku Saratu. 7 Yomuna oku menza dole la de kuma nsu zunwa ni ali kyakyawu nja mata ku a siki shina, ku ba su girima, sobon sori su keyi na ku ba. Oku nja mata ku ku ma nsu si gado la a siki aniyeri ni leyi kyawuta de Mirikisi ba ku, sobon de mbodaa yaa tele lepa ku ba nde ku yi lepa.

8 A karishe, guru, ku zunwa nja nkiaku a siki selema, ku ma nsu toseyi, ku zunwa ni so kankye yayuwa, ku ma nsu sua nkiaku nto, ba dege kiya. 9 Kede ku lama mbo mumungu nja mbo mumungu ko ku lama basi nja basi, sede ku sa nkiya ku anabirika, sobon ni yomuna yaa bila de ku yi de kuma nsu si gado ni anabirika ni Mirikisi. 10 Sobon e ma rubuta a beta Mirikisi nkye,

<<Du nsude yaa so leyi e yi

nja yaa bila de geni yowa nana kyakyawu

dole la de e ma nsu ka arishiya e yi dege pala beta mumungu

nja baki e yi dege pala beta yaruwa.

11 Dole la de e juyi bila mumungu mbo de ku yi mbo kyakyawu;

e ma nsu de yaa bila zunwa selema ni guru dishiya e yi.

12 Sobon ndani Obagizi ma kiya nse gangasi

kuni Mirikisi yaa zi lepa ni nse gangasi.

sede Obagizi yaa yi geba nja worede sua yi mbo mumungu.>>

13 Waa yaa yi ku mbodaa nde ku mayi memeri yi mbo kyakyawu? 14 Sede nde ku te Genbeki sobon de ku yi mbo gangasi, kuma nsu anabirika la. <<Kede ku zi womba mbode ntani sua yi ku; kede ku puari geba.>> 15 Sede a siki dishiya ku ku sa Kiristi de ema Obagizi aku, ku zunwa nshiri kowon nana de ku keleba du nsude minya ku delili sa dishiya ku de ku ma nshi anya Mirikisi. Sede ku yi guru mbo worosu mu ni bwala kiya nja beyi girima. 16 ku tabata ku man tunani de mani lepi ba, sobon worede sua yi beta ku ni yaruwa a kiya ali kyakyawu de kuma yi a siki Kiristi sua zi kumnya ni ali su mumungu. 17 Yaa pi kyawu, nde e ma nupi Mirikisi la de ku Genbeki sobon yi mbo kyakyawu, yaa pi de yaama sobon ni mbo mumungu. 18 Sobon Kiristi muntu sen daa a kiya nsu lepi guru, sobon nse gangasi nja mere gangasi, sobon de keyi mu zo anya Mirikisi. su sa e yi de e muntu a siki nki sede Mirikisi dege yi nleyi te anya Aworo. 19 Te yomuna Kiristi te yuru de a beyi manki anya worede su muntu. 20 aworo mu su ma worede su ki biya doka Mirikisi a kwanki a beyi Mirikisi kadishiya pekye su de Nuwu e yi kwanto. A siki kwanto mu ntani takusi kin na, su sila dege totolo riki mu. 21 Riki mu e ma kankye tunkwasa de kuzukam e sila ku, ba shire dola ni nki kin naba, sede anikowori de Mirikisi yi ni dishiya kyakyawu. E sila mu te turiki ni dege Yesu Kiristi a kumsha, 22 Yesu ta a bisi e zunwa a nani dama ni Mirikisi, e yi solota a kiya meleku nja guru mbode man sori nja yiko.