1 Nkayomu, ku laba kiya ku dege siki kowoni yiri mungu mbo, nja guru yaruwa, munabuki, kishi, nja pala beta mumungu a kiya ntani. 2 Kuma kankye yaya dende de su yapu su sabuwa, de memeri asu ma de su sha kyakyawu nono ni amaa e yi, wato ku yi memeri zi kelima beta Mirikisi nde ku te sha yi e shiya yaa sa ku ku yi girima ari ku samu sila, 3 Yiride ema a rubutu a siki beta Mirikisi nkye, <<kuzukam de ku shina nkye Mirikisi man kyawu.

4 Ku zo anya Yesu, nsude ma kankye dunsi nsu leyi de ntani ki sede Mirikisi zabi yi de ema nsu dereja anya e yi. 5 Oku du, kuma kankye dunsi de mani leyi de Mirikisi yaa yi ampani nsu de e gina laki lepa, anya de kwa yi bowuta kankye pirisi nsuseki, de ku munka sedeka ku de ma mbo keleba anya Mirikisi te anya Yesu Kiristi. 6 Sobon e ma rubuta a siki beta Mirikisi nkye:

<<Kone, Ni kapa dunsi de yaa ka gini a siyona,

Ni zabi dunsi nsude pi dereja a gini,

nja du nsude sa dishiyeyi anya Yesu

yaa taba sha kumnya ba.>>

7 Kuzukam oku worede ku beigaskye, dunsi mu e ma nsu dereja la anya ku. Sede te anya worede su beigaskye ba,

<<Dunsi de nsu gini ki

e shiya kuma pi dunsi guru dereja a siki gini,

8 E ma a rubuta a siki beta Mirikisi jaja nkye,

Dunsi de yaa sa ntani titimi,

nja dunsi de yaa sa ntani puari.>>

Su titimi sobon de su ki zi beta ni Mirikisi, sobon yomuna su shiriya su de su ma ka.

9 Sede oku kuma zazabi ntani ni Mirikisi, ku man kankye ntani gizi pirisi, Ntani nsuseki, ntani de su mani Mirikisi, de ku pala ANKI mamanki ni Mirikisi nsude sukwa ku butu a siki dopuwa de keyi ku zo a siki asikye yi nsu beyi mamanki. 10 A kwanki de bise ku ma ntani Mirikisi na ba, sede kuzukam kuma ntani ni Mirikisi la; nsu adaatolo ku shina toseyi ni Mirikisi ba, sede kuzukam ku samu toseyi yi.

11 Yayuwa na de Mma so, ku shina nkye kuma bakwe la a durinya mu, ku yi gudu bila mumungu memeri ni nki, nsude yaa sa gidigidi a siki dishiya ku. 12 Ku yi zunwa ni ali kyakyawu anya worede su shina Mirikisi ba, ko sua pala beta mumungu a kiya ku, sua geni zunwa ni ali ku kyakyawu de kwa yi sua dereja Mirikisi a nana de yaa zo.

13 Ku bwala kiya ku sobon ni Obagizi te anya kowoni yiko de su kapa a siki ntani: ko anya totolo seleki, de mani totolo yiko, 14 ko te anya nsu gomuna, worede seleki saka su de su yi worede su mayi mbo mumungu poro nja su yobo worede su mayi mbo kyakyawu. 15 Sobon Mirikisi yaa bila de ku yi mbo kyakyawu de nsu mere shina su zi kumnya a kiya beta mumungu de nsu Odundu sua pala. 16 Ku zunwa kankye ntani de su man yenshi, sede kede ku yi ampani ni yenshi ku de ku yi mbode ma mumungu ba; zunwa ku e ma yiri ni bunwa Mirikisi. 17 Ku ba konwawa girima: Ku so yayuwa de su beigaskye, ku yi womba Mirikisi, ku ba seleki girima.

18 Bunwa, ku bwala kiya ku ba nsugizi ku ku ba su girima a siki kowoni mbo, ba te nja worede sua yi ku mbo kyakyawu na kin ba, sede nzun worede su ma mere toseyi. 19 Sobon du nsude Genbeki a kiya lepi de yi ba Mirikisi yaa sa yi anabirika, nde e kadishiya a siki Genbeki sobon nupi Mirikisi. 20 Sede nde ku yi mbodaa mumungu la, to nsugizi ku mani dama de e dukwa ku, sede nde ku Genbeki sobon de ku yi mbo kyakyawu se ku yi ankuri, da mu e ma mbo peri siki la anya Mirikisi. 21 Ema sobon yiri Genbeki mu na su sukwa ku, sobon Kiristi Genbeki sobon omu, sobon yomuna e bila mu de mu biya seni yi.

22 <<Yesu yi lepi ni mbodaa ba

E taba yi yaruwa ba.>>

23 De ntani basi yi, e lama ba, de sha geni beki, e yi kasheji ba, sede e sa dishiya e yi anya ni Mirikisi nsude yaa yi shiriya gaskye. 24 Kiristi nkiya yi la lepi mu e muntu a gidiri, sobon de ali mu ni lepi e muntu de mu zunwa ni gangasi anya Mirikisi; sobon suwo de zi na mu samu worikye. 25 Sobon muma kankye timshiya de beeta, sede kuzukam ku kuma nbeyi zo anya Yesu nsu kpanku mu nja nsu kone leyi mu.