1 ኢስቲ ጾሳ ታቦታ ኤሂዲ ዳዊቲ ታቦታ ዎናስ ቶሊዳ ዱንካኔዛ ጊዶን ዎዳ፤ ሂስቲዲ ጹጌቲዛ ያርሾኔ ኢሲፌቴ ያርሾ ጾሳስ ያርሺዳ። 2 ዳዊቲ ጹጌቲዛ ያርሾዛኔ ኢሲፌቴ ያርሾ ያርሺዳፔ ጉዬ ጎዳ ሱንን ዴሬዛ ኣንጂዴስ። 3 ሄሳፌ ጉዬ ኢስራኤሌ ኣሳ ኡባስ፥ ማጫሳሲኔ ኣቱማሳስ፥ ሁኤን ሁኤን ኢሲ ኢሲ ጉ ኡኬ፥ ኢሲ ኢሲ ቃንጾ ኣሾኔ ኢሲ ኢሲ ዛቢቤ ኮምፓ* ጊሺዴስ።

4 ጎዳ ታቦታ ሲንን ኦና ማላኔ ጎዳ ኢስራኤሌ ጾሳ ዎሳናስ፥ ሳባናሲኔ ጋላታናስ ዳዊቲ ሌዌ ቆሞታፔ ጉታ ሱንዴስ። 5 ሌዌታ ሃላቃይ ኣሳፌ፤ ኢዛፔ ጋርሳራ ዛካራሳ፤ ዛካራሳራ ዲዛይቲ ዪኢኤሌ፥ ሻሚራሞቴ፥ ዪሂኤሌ፥ ማቲቲያ፥ ኤልያቤ፥ ባናያኔ ኦቤድ-ኤዶሜኔ ዪኢኤሌ፤ ሄይቲ ማሲንቆኔ ዲ ዲጻና ማላ ሱሚዳ፤ ኣሳፊ ጊዲኮ ዳላ ቃናስ ሱሚዴስ።* 6 ቄሴ ባናያይኔ ያሃዚኤሌይ ጾሳ ታቦታ ሲንን ኡባ ዎዴ ዛዬ ፑናና ማላ ሱሚዳ።

7 ሄ ጋላስ ዳዊቲ ካሴቲዲ ኣሳፌሲኔ ኢዛራ ኦዛ ላጌታስ ጎዳ ጋላቲዛ ዬ ኢሚዴስ።

8 ጎዳ ጋላቲቴ፤

ኢዛ ሱን ጼይጊቴ፤

ኢዚ ኦዳ ኡባ

ካዎቴታስ ዮቲቴ።

9 ኢዛ ሳቢቴ፤

ጋላታ ዬካ ኢዛስ ዬጺቴ፤

ኢዚ ኦዳ ማላሊሲዛ ኦሶ

ኡባ ዮቲቴ።

10 ኢዛ ጌሻ ሱንን

ቦንቺቴ፤

ጎዳ ኮይዛይታ

ዎዚናይ ኡፋዬቶ።

11 ጎዳኔ ኢዛ ዎልቃ ጾሞሲቴ፤

ኡባ ዎዴ ኢዛ ኮዪቴ።

12 ኢዚ ኦዳ ማላሊሲዛ ኦሶታ፥

ማላታታኔ ኢዛ ፒርዳ ኣኬኪቴ።

13 ኢንቴኖ ጾሳ ኣይሌ

ኢስራኤሌ ዜሬቶ!

ኢንቴኖ ዶሬቲዳ

ያቆቤ ናይቶ!

14 ኢዚ ጎዳይ ኑ ጾሳ፤

ኢዛ ፒርዳይ ኡባ ቦላና።

15 ባ ጫቂዳ ቃላ ሜርናስ፥

ባ ኣዛዚዳይሳካ ሺ ዬሌታ

ጋካናስ ቆፔስ።

16 ኣብራሃሜስ ጫቂዳ ጫቃ፥

ዪሳቃስ ኢሚዳ ሂዶታ ቃላ፥✝

17 ያቆቤስ ዎጋ ጊዳና ማላ፥

ኢስራኤሌሲካ ሜርና ጫቆ

ቃላ ጊዳና ማላ ሚንዴስ።

18 «ካናኔይ ኔስ

ጺንጾ ጊዳና ማላ

ታ ኔና ላቲሳና» ጊዴስ።✝

19 ኢስቲ ቆዳን ጉ ጊዲ ዲዛ ዎዴ፥

ዴራሲካ ኢማ ጊዲ ዲዛ ዎዴ፥

20 ኢሲ ዴሬፔ ሃራ ዴሬ፥

ኢሲ ካዎቴፌ

ሃራ ካዎቴ ቶይላቲዳ።

21 ኦኒካ ኢስታ ኡንኤና ማላ

ኣ ኢሚቤና፤

ኢስታ ጊሻስ ካዎታ ሴሪዴስ፤

22 «ታ ቲይዳይታ ቦቾፍቴ፤

ታ ናቤታ ቆሆፒቴ» ጊዴስ።✝

23 ቢታ ኡባይ ጎዳስ ዬጺቴ፤

ኢዚ ኣሺዛይሳ

ሃች ሃች ዮቲቴ።

24 ካዎቴታስ

ኢዛ ቦንቾ ኣዋጂቴ፤

ኢዚ ኦዳ ማላሊሲዛ

ሚሻታ ዴሬ

ኡባስ ዮቲቴ።

25 ጎዳይ ጊታ፤

ኢዛስ ቤሲዛ ጋላታይካ ቃ፤

ጾሳታ ኡባፌ ኣስ፤

ኢዛስ ያያናስ ቤሴስ።

26 ኣይዛቤታ ጾሳቲ

ኡባይ ኤቃ ጾሳታ፤

ጎዳይ ጊዲኮ

ሳሎታ ሜዳ ጾሳ።

27 ቦንቾይኔ ቴማይ ኢዛስ ዴስ፤

ሚኖቴኔ ኡፋይሲ

ኢዛ ኬን ዴስ።

28 ኢንቴኖ ኣሳ ዛሬ ኡባቶ!

ጎዳ ሳቢቴ፤

«ቦንቾይኔ ዎልቃይ

ጎዳሳ» ጊ ዮቲቴ።

29 ጎዳ ሱንስ ቤሲዛ

ቦንቾ ኢሚቴ፤

ያርሾ ኤኪዲ ኢዛ ሲን ሺቂቴ፤

ኢዛ ጌሻቴ ቦንቾ

ጊሻስ ጎዳስ ጎይኒቴ።

30 ቢታን ዲዛ ኣስ ኡባይ

ኢዛ ሲንን ኮኮሪቴ፤

ሳኣይ ሚኒ ኤቂዴስ፤

ሙሌካ ቃጼና።

31 ሳሎቲ ኡፋዬቴቶ!

ሳኣይካ ሃሹ ጎ!

ካዎቴታ ጊዶን ኢስታስ፥

«ጎዳይ ካዎቲዴስ!» ጌቶ።

32 ኣባይኔ ኢዛ ጊዶን ዲዛ

ኡባይ ጉሜቶ፤

ዴምባቲኔ ኢስታ ቦላ ዲዛ

ኡባቲ ኡፋዬቴቶ።

33 ኢዚ ቢታ ቦላ ፒርዳናስ ያና።

ሄ ዎዴ ዎራ ሚቲ

ጎዳ ጾሳ

ሲንን ኡፋይሳን ዬጻና።

34 ጎዳይ ኪያ፤

ኢዛ ማሮቴይካ ሜርናሳ፤

ሄሳ ጊሻስ ጎዳ ጋላቲቴ።✝

35 «ኣቤት ኑና ኣሺዛ ጎዳዉ!

ኑና ኣሻ፤

ኔ ጌሻ ሱን

ኑ ጋላታና ማላ፥

ኑ ኔና ጋላታን

ቦንቻና ማላ

ካዎቴታ ጊዶፌ ኑና

ሺሻዳ ኣሻ» ጊቴ።

36 ጎዳ ኢስራኤሌ ጾሳይ

ሜርናፔ ሜርና ጋካናስ ጋላቴቶ!

ሄሳፌ ጉዬ ዴሬ ኡባይ፥ «ኣሚን» ጊዲ ጎዳ ጋላቲዴስ።

37 ጎዳ ታቦታ ሲንን ሃች ሃች ጎይኖስ ኮሺዛዝ ኡባ ዎዴ ኢስቲ ኦና ማላ ዳዊቲ ኣሳፌኔ ኢዛ ዳቦታ ዎዴስ። 38 ቃሴካ ኦቤድ-ኤዶሜኔ ኢዛ ዳቦታ ኡሱፑን ታማኔ ኦስፑናታ ኢስታራ ኦና ማላ ዎዴስ፤ ኤዶታኔ ና ኦቤድ-ኤዶሜኔ ሆሳ ዲርሳ ፔንጌ ናጋና ማላ ዎዴስ።

39 ቄሴ ሳዶቄኔ ኢዛራ ኦዛ ቄሴቲ ጌባኦኔን ቃሶሆን ዲዛ ጎዳ ዱንካኔዛ ሲንን ኦና ማላ ሄን ዎዴስ። 40 ጋሶይካ ጎዳይ ኢስራኤሌስ ኢሚዳ ዎጋ ማላ ኢስቲ ኡባ ዎዴ ጹጌቲዛ ያርሾይ ያርሼቲዛሶን ማላዶኔ ኦማርስ ጹጌቲዛ ያርሾ ያርሻናሳ። 41 ኢዛ ማሮታይ ሜርናስ ጊዲዳ ጊሻስ ጎዳ ጋላታና ማላ ሄማኔ፥ ኤዶታኔኔ ዶሬቲዳ ሃራታ ዳዊቲ ኢስታራ ኢሲፌ ኤሲዴስ። 42 ሄማኔሲኔ ኤዶታኔስ ጹሩምባ ፑናናስ፥ ዳላ ጊሪሳናሲኔ ዬ ዬጺሼ ጎኤቲዛ ሃራ ማሳራታ ቦላ ኣዋቴ ኢስታስ ኢሜቲዴስ፤ ኤዶታኔ ናይቲ ዲርሳ ፔንጌ ናጋና ማላ ኣላፌቴ ኢሜቲዴስ።

43 ሄሳፌ ጉዬ ኡባ ኣሳይ ባሶ ባሶ ቢዴስ፤ ዳዊቲካ ባሶ ኣሳ ኣንጃናስ ሶ ሲሚዴስ።✝