ሆሴኤ ቲንቢቴ 13

ኢስራኤሌ ቦላ ያና ዉርሴ ፒርዳ።

1 ኤፍሬሜይ ኢስራኤሌ ዴሬዛ ጊዶን

ቦንቼቲ ዲዛ ጊሻስ

ኢዚ ሃሳይሺን ኣሳይ

ኡባይ ኮኮሬስ።

ጊዶ ኣቲን ባኣሌስ

ጎይኒዳ ጊሻስ

ቆሂዴስ፤ ሃይቂዴስ።

2 ሃኢካ ናጋራ ቦላ

ናጋራ ጉጂዳ፤

ባንታ ጪንጫቴን ሚስሌታ

ባስ ጊግሲዳ፤

ቢራፔ ኤቃ ጾሳታ

ባንታስ ሜዳ፤

ሄይቲ ዉሪካ

ኣሳ ኩሼን ኦሴቲዳይታ፤

ሃይታ ሃ ኣሳታ ጊሻስ፥

«ኣስ ያርሾ ሂስቲ ሺሼቴስ፤

ማራ ሚስሌን ኦሴቲዳ ኤቃ

ጾሳታ ዬሬቴስ» ጌቴቲዴስ።

3 ሄሳ ጋሶን ኢስቲ ዎንታ

ማላዶ ሻራ ማላ

ጮ ቲምኢ ጋና፤

ማላዶ ጻዛ ማላካ ጮ

ዎ ያና፤

ዎይኮ ባንጋ ቡኪዛ ባሌፔ

ጎቴ ጫርኮይ ኤፊዛ

ሱላ ማላ ጊዳና፤

ዎይኮ ኬፌ

ኬዚዲ ቤቲሼ

ጮ ይዛ ጩዋ ማላ ጊዳና።

4 ጎዳይ፥ «ኔና ጊብጼፔ ኬሲዳይ

ታና ጎዳ ኔ ጾሳ፤

ኔስ ታፔ ኣቲን

ሃራ ጾሲ ዴና፤

ኔና ኣሺዳይ ታፔ ኣቲን

ሃራ ጾስ ጊዴና።

5 ባዞ ቢታን ካኔ ሃ ባይንዳሶን

ኔና ኢሻልሳ ዎዲስ።

6 ጊዶ ኣቲን ታ ሚዚን

ኢስቲ ካሊዳ፤

ካሊዲ ኦቶሬቲዳ፤

ሄሳፌ ጉዬ ታና ባሊዳ።✝13፡5-6 ዛሬ 8፡11-17

7 ሄሳ ጊሻስ ታኒ ኢስታ ቦላ

ጋሞ ማላ ያና፤

ማሄ ማላ ኦጌ ቦላ

ዛማዳ ኡታና።

8 ኢዚ ማራቲ ቦንቄቲዳ ዛርዶ ማላ

ታ ኢስታ ሾጫናኔ

ፑዜሬና፤

ታ ኢስታ ጋሞ ማላ

ፑዜሬ ሚታና፤

ዎራ ዶኣ ማላ ዱሴሬና።

9 «ኢስራኤሌ ዴሬዞ!

ኔ ታ ቦላ ዴንዲዳ ጊሻሲኔ

ኔና ማዲዛ ታናራ

ኔ ኤቄቲዳ ጊሻስ

ኔ ያና፤

10 ኔ ታና፥ ‹ታስ ካዎኔ

ሃላቃታ ኢማ› ጋዳሳ፤

ሂስቲን ሃኢ ኔና ኣሻና

ካዎይ ኣዋን ዲዜ?

ኔ ካታማታን ዲዛ

ሃላቃቲ ኡባይ

ሃኢ ኣዋን ዲዞ?✝13፡10 1ሳሜ 8፡5-6

11 ታ ሃንቄታሼ

ኢንቴስ ካዎ ኢማዲስ፤

ጊዶ ኣቲን ታኒ ቦሻንካ

ኢዛ ሻራዲስ።✝13፡11 1ሳሜ 10፡17-24፤ 15፡26

12 «ኤፍሬሜ ቆሆይ ዶሬቲዴስ፤

ኢዛ ናጋራይካ

ማዝጋቤን ጻፌቲዴስ።

13 ሚጻይ ኦይኪዳ ማጫሳ ማላ

ኢዛ ቦላ ሜቶይ ያና፤

ኢዚ ጊዲኮ

ኣ ኤራቴ ባይንዳ

ኤያ ና፤

ዬሌቲዛ ዎዴይ ጋኪን

ባ ኣዬይ ኡሎፔ ዬሌታናስ

ኮዮንታ ና ማላ።

14 ታኒ ኔና

ዱፎ ዎልቃፌ ኣሻና፤

ሃይቆፔካ ዎዛና።

ሃይቆ! ኔ ዎዛ

ዎልቃይ ኣዋን ዲዜ?

ዱፎዞ! ኔኒ ኣስ ይሲዛ ዎልቃይ

ኣዋን ዲዜ?

ታኒ ኢዛስ ቃቲኬ።✝13፡14 1ቆሮ 15፡55

15 ኢዚ ባ ኢሻታ ጊዶን

ዱሬ ጊዲኮካ

ጎዳፔ ኪቴቲዳ ጫርኮይ

ኣርሼይ ሞኪዛ ባጋራ

ባዞ ቢታፌ ዴንዲዲ ያና።

ፑልቶይ ቶኣና፤

ሃ ኦላይካ ሜላና፤

ኢዛስ ዲዛ ኣልኦ ኣቆታይ

ሚንጃ ኬፌ ቦንቄታና።

16 ሳማሪያ ኣሳይ

ባንታ ጾሳ ቦላ

ማካሊዳ ጊሻስ

ባንታ ቆሆ ቶካና፤

ማሻንካ ሲፌታና፤

ቄሪ ናይቲ ቢታ ቦላ

ዲንጬታና፤

ቃንራ ዲዛ ማጫሳታ

ኡሎይ ዳኬታና» ጌስ።