1 «ኣሳይ ታናራ ዲዛ

ጫቆ ቃላ ላሊዴስ፤

ታ ዎጋ ቦላካ ማካሊዴስ።

ሄሳ ጋሶን ሞርኬይ

ኣርጋን ማላ

ጎዳ ኬ ቦላ

ኣላንስ።

ሄሳ ጊሻስ

ኢስቲ ናጌታና ማላ

ዛዬ ፑና!

2 ኢስቲካ፥ ‹ጾሳዉ!

ኑ ኔና ኤሮስ› ጊሼ

ታኮ ዋሴቴስ።

3 ጊዶ ኣቲን ኢስራኤሌ ኣሳይ

ሎኦ ሚሽ ኢጺዳ ጊሻስ

ሞርኬይ ኢስታ ጎዳና።

4 «ታ ሼኔ ጊዶንታ ኢስቲ ባስ

ካዎታ ካዎዳ፤

ታና ኦይቾንታ ዲሼ

ዳናታ ዶሪዳ፤

ባ ቢራፔኔ ባ ዎርቃፌ

ባና ይሳና ኤቃ ጾሳታ

ባስ ኦዳ።

5 ሳማሪያ ዴሬ ኣሳቶ!

ማሪ ሚሳቲሲ ኢንቴ ሜዳ

ኤቃ ጾሳቲ ታና ሻቴቴስ።

ታ ሃንቆይ ኢንቴ ቦላ

ታማ ማላ ኤጼስ፤

ኢንቴ ሞሮ ኦሶን

ኣይዴ ጋካናስ ኢንቴ ጋምኣኔ?

6 ሂላንቻይ ማራ ሚስሌ

ሜዳ ኤቃ ጾሳቲ

ጾስ ጊዳናስ ዳንዳዬቴና።

ሄሳ ጊሻስ

ማር ሚሳቲ ኦሴቲዳ

ሳማሪያ ኤቃ ጾሳቲ

ሜቄሬቲ ዎና።

7 ኢስቲ ጫርኮ ዜሪዲ ጎቴ ሺሻና፤

ቡጻ ቦላ ኣይፌይ ዴና፤

ሌይካ ቤቴና፤

ኣይፊኮካ ኣላጋቲ ማና።

8 ኢስራኤሌይ

ሃራ ካዎቴታ ጊዶን

ሂራይሶ ሚሻ ማላ ጊዲዳ።

9 ባርካ ባዞ ቢታን ቶይላቲዛ

ሃርዲዳ ማላ

ጌዴ ኣሶሬ ዴሬ ቢዳ።

ባና ማዳና ማላ

ካዎታስ ሚሼ ኢሚዲ

ባስ ዳቦ ሻሚዳ።

10 ኢስቲ ባና ካዎታስ

ኣ ባይዚኮካ

ሃኢ ታ ኢስታ ሺሻና፤

ካዎቲኔ ዳናቲ

ኢስታ ቦላ ጋዛ

ሜቶፔ ዴንዲዳይሳን

ኢስቲ ጉጺ ጉጺ ባና።

11 «ኤፍሬሜይ ናጋራ ዉርሳናስ

ዳሮ ያርሾሶሆ ኦዴስ፤

ጊዶ ኣቲን ሄ ያርሾሶሆቲ

ናጋራ ኦዛሶ ጊዲዳ።

12 ታ ኢስታስ ታ ዎጋ ጋርሳን ዲዛ

ዳሮ ሚሻታ ጻፋዲስ።

ኢስቲ ጊዲኮ

ሃዳ ሚሻ ማላ ቆዲዳ።

13 ኢስቲ ሎኦ ያርሾ ሺሼቴስ

ሄ ያርሾ ኣሾዛካ ሜቴስ፤

ጊዶ ኣቲን ጎዳይ

ኢስታን ኡፋዬቲቤና።

ሄሳ ጊሻስ ኢዚ ኢስታ

ኢታቴ ዛሪ ቆፓና፤

ኢስታ ናጋራ ጊሻስ ቃጻያና።

ኢስቲካ ጊብጼ ሲማና።

14 «ኢስራኤሌ ዴሬይ

ባስ ጊታ ካዎቴ

ኬታ ኬጺዴስ፤

ጊዶ ኣቲን ባና ሜዳይሳ ባሊዴስ።

ዩሁዳ ዴሬይካ ዳሮ ሚኖ

ካታማታ ኦዴስ፤

ጊዶ ኣቲን ታኒ ሄ ካታማታ ቦላ

ታማ ዬዳና፤

ኢስታ ሚጻታካ

ታማይ ማና» ጊዴስ።