ሆሴኤ ቲንቢቴ 7

1 «ታኒ ታ ዴሬ ኢስራኤሌ

ኣሳ ፓናሲኔ

ዛራዳ ዱሬሳናስ ኮይዛ ዎዴ፤

ኤፍሬሜ ናጋራይኔ

ሳማሪያ ኣሳ ኢታቴ

ኬሂ ዳሪ ቤቲዴስ።

ኢስቲ ኢሶይ ኢሳስ ዎርዶቴቴስ፥

ካይሶቲ ኬ ቦኪ ጌሊዲ

ካይሶቴቴስ፥

ፓንጋቲ ኦጌ ቦላ

ኣሶን ኣሶን

ቦንቄቴስ።

2 ጊዶ ኣቲን ታኒ ሃይሳ

ኢስታ ኢታቴ ዉርሳ ኤሪዛይሳ

ኢስቲ ኣኬኪቤቴና።

ሄሳ ጊሻስ ኢስታ

ኢስታ ናጋራይ ጊዶ

ዎዴስ፤

ኢስታ ኢታ ኦሶይ

ታፔ ጌሚቤና» ጌስ።

ካዎ ኬን ዴንዲዳ ኢታ ማቆ

3 ጎዳይ፥ «ኢስቲ ካዎዛ ባ ኢታቴን

ሃላቃታካ ባንታ ዎርዶን

ባሌቴስ።

4 ኢስቲ ዉሪካ ላይማቲዛይታ፥

ቡኬሶይ ዴንዳና ጋካናስ

ዳቦ ኡኪዛዴይ

ታማ ኤናስ

ኮሾንታ ሴሊሲዳ ጮጬ ማላ።

5 ኑ ካዎዛ ባኣሌ ጋላስ

ሃላቃቲ ዎይኔ ኡሻን

ማ ሌላ ጊዳ።

ኢዚካ ቂዛይታራ ዙፔቲዴስ።

6 ኢስታ ዎዚናይ

ጮጬ

ታማ ማላ ሴሊዴስ፤

ጌኔን ኢዛኮ ሺቄቴስ።

ኢስቲ ኦማርሲ ኩሜ

ሃንቆ ጩዋቲሼ ኣቄቴስ

ዎንቴ ጋላስ ኤጺዛ ታማ ማላ

ፖፖልኡ ጌቴስ።

7 ዉሪካ ታማ ጮጬ ማላ ሴሊዳይታ፤

ባንታና ኣይሲዛይታ

ዲፒ ሂስቲ ዉርሲዳ።

ኢስታ ካዎቲካ ኩንዲዳ፤

ኢስታፌ ኦኒካ

ታኮ ሺቂቤና።

ኢስራኤሌ ኣሳይ ሃራ ካዎቴታራ ዋላኬቲዴስ

8 «ኤፍሬሜይ ሃራ ካዎቴታራ ዋላኬቲዴስ፤

ኢዚ ሺሬቶንታ ኣቲዳ

ኡኬ ማላ።

9 ኣላጋቲ ኢስታ ዎልቃ ሚዳ፤

ጊዶ ኣቲን ኢስቲ ሄሳ

ኤሪቤቴና።

ኢዛ ሁኤይ ፑሉን ጫዲዴስ፤

ጊዶ ኣቲን ኢዚ ሄሳ ኤሪቤና።

10 ኢስራኤሌ ኣሳ ኦቶሬቴ

ኢስታ ቦላ ማርካቴስ፤

ሄሲ ዉሪ ሃኒንካ

ኢስቲ ጎዳ ባንታ ጾሳኮ

ሲሚቤቴና፤

ኢዛካ ኮዪቤቴና።

11 «ኢስራኤሌ ኣሳይ ኤሌ ባሌቲዛኔ

ቆፋይ ባይንዳ

ሃራጴ ካፎ ማላ።

ኢሲቶ ጊብጼ ጼይጌስ፤

ሃራ ዎዴ

ቃሴ ኣሶሬኮ ሲሜስ፤

12 ኢስቲ ፒራሺን ታ ጊቴ

ኢስታ ቦላ ዬጋና፤

ሳሎ ካፎታ ማላ

ዱጌ ጎቻ ዎና፤

ኢስቲ ኦዳ ኢታ ኦሶ ጊሻስ

ታ ኢስታ ዴሬ ሲንን

ቃጻያና።

13 ኢስቲ ታፔ ሃኪ ቢዳ ጊሻስ

ኢስታስ ኣዬ ኣና!

ታ ቦላ ኢስቲ ማካሊዳ ጊሻስ

ኢስታ ቦላ ይሲዛዚ ዮ፤

ታኒ ኢስታ ዎዛና ኮያዲስ፤

ኢስቲ ጊዲኮ ታ ቦላ

ዎርዶ ሃሳዬቴስ።

14 ኢስቲ ባ ሂጻ ቦላ

ኢቺዲ ዬኬቴስ፤

ጊዶ ኣቲን ዎዚናፔ

ታኮ ዎሴቴና፤

ካሲኔ

ኡሻስ ሺቄቴስ፤

ጊዶ ኣቲን ታፔ ሼርኢ ጊዳ።

15 ታኒ ኢስታ ታማርሳዲሲኔ

ኢስታ ሚንዲስ፤

ኢስቲ ጊዲኮ ታ ቦላ ዴንዲዳ።

16 ታፔ ሃኪዲ

ሃዳ ሚሻኮ ሲሚዳ፤

ኢስቲ ጫዳና ጾንጊን

ዎራ ቢዛ ቶራ ማላ።

ኢስታ ካሌዛይቲካ

ባንቲ ሃሳይዛ ኢታ

ቃላ ጋሶን

ማሻን ዉራና፤

ሄሳፌ ዴንዶይሳን ኢስቲ ጊብጼ

ቢታን ቂስ ኣታና።