ሆሴኤ ቲንቢቴ 9

ኢስራኤሌ ቦላ ያና ቂጻቴ

1 ኢስራኤሌ ኣሳዉ! ኡፋዬቶፍቴ!

ሃራ ካዎቴታ ማላ

ኡፋይስ ኖጮጩ ጎፒቴ!

ኣይስ ጊኮ ኢንቴ ኢንቴ ጾሳስ

ኣማኔቲቤኬታ

ካ ባሌ ኡባን

ላይማቴስ

ኢሚዛ ዋጋ ዶሲዴታ።

2 ሄሳ ጊሻስ ሃይሳፌ ጉዬ

ኢንቴ ካ ባሌፔ ካ፥

ዎይኔ ጉምኢዛሶሆፔ

ዎይኔ ኡሹ ዴሜኬታ።

ኦራ ዎይኔ ኡሺካ

ኢንቴስ ፓጫና።

3 ኢስራኤሌ ዴሬይ ጎዳይ

ኢስታስ ኢሚዳ ቢታን ኡቴና።

ኤፍሬሜይ ዱጌ ጊብጼ ሲማና፤

ኣሶሬካ ቢዲ ቱኒዳ ካ ማና።

4 ሄን ጎዳስ ዎይኔ ኡሹ

ያርሻናስ ዳንዳዬቴና፤

ኢስታ ያርሾይካ

ጎዳ ኡፋይሴና።

ሄሳ ጊሻስ ኢስታስ ያርሾዚ

ሾቻ ካ ጊዳና፤

ኢዛ ሚዛ ኡባይ ቱናና።

ሄ ካዚ ጮ ጋፋስ

ሚዛ ካ ጊዳና ኣቲን

ጎዳ ኬ ያርሾስ ሺቄና።

5 ሂስቲን ኢንቴ ዱማ ዱማ

ባኣሌ ጋላሳታኒኔ

ጎዳ ባኣሌ ጋላሳታን

ኣይ ኦቲ?

6 ኢስቲ ባሻፌ ኣታናስ ቤቲኮካ

ጊብጼይ ኢስታ ሺሻና፤

ሜምፒሳ ጌቴቲዛሶን

ኢስታ ሞጋና፤

ኢስቲ ሃሪዳ ቢራይ ዉሪካ

ሻራፋ ማይኢ ኣታና፤

ኢስታ ዱሳሶ

ኡባ ኣጉን ላታና።

7 ቃጻያና ዎዴይ ጋኪዴስ፤

ፒርዳ ጋላሲካ ጋኪዴስ፤

ሄሳ ኢስራኤሌ ኣሳይ ኤሮ።

ኢንቴ ኦዳ ናጋራይ

ዳሮ ጊዲዳ ጊሻሲኔ

ኢንቴ ሞርኬቴ ጊታ ጊዲዳ

ጊሻስ ናቤይ ኤያ ማላ፥

ጾሳ ኣያናይ ኢዛ ቦላ

ሼምፒዳዴይ

ጎሻ ማላ ቆዴቲዴስ።✝9፡7 ሉቃ 21፡22

8 ናቤይ ጾሳራ ጊዲዲ

ኤፍሬሜ ናጊዛዴ፤

ጊዶ ኣቲን ኢዛ ኦጌ

ኡባን ዎጺማዴይ፥

ኢዛ ጾሳ ኬን ኢጾይ

ኢዛ ናጌስ።

9 ኢስራኤሌ ኣሳይ

ካሴ ጊቢኣ ዎዴ ዲዛ

ኣሳ ማላ ኬሂ ቱኒዴስ፤

ጾሲ ኢስታ ቆሆዛ ቆፒዲ

ኢስታ ናጋራ ጊሻስ

ኢስታ ቃጻያና።✝9፡9 ዳና 19፡1-30

ናጋራ ጋሶን ኢስራኤሌ ኣሳ ኩንዴ

10 ጎዳይ፥ «ታኒ ኢስራኤሌ ኣሳ

ዴሚዳ ዎዴ ታስ ባዞ ቢታን

ዎይኔ ሚ ኣይፌ

ዴሚዳ ሚሳቲዴስ።

ታኒ ካሴ ኢንቴ ኣዋታ

ቤኢዳ ዎዴ

ታስ ኮይሮ ካጺዳ ባላሴ ሚ

ኣይፌ ቤኢዳ ሚሳቲዴስ።

ኢስቲ ባኣሊ-ፔኦሬ ጋኪዳ ዎዴ

ባንታናቴ ዬላቺዛ

ኤቃ ጾሳስ ዱማሲዳ።

ኢስቲካ ሄ ባ ሲቂዛ

ኤቃ ጾሳ ማላ ቱኒዳ።✝9፡10 ታይ 25፡1-5

11 ኤፍሬሜ ቦንቾይ

ካፎይ ፒራዛ ማላ

ፒራ ያና፤

ሃይሳፌ ጉዬ ና ቃንቴ፥

ሻራይኔ ና ዬሎይካ ዴና።

12 ና ዬሊዲ ዲቺኮካ

ኢስቲ ማና ጋካናስ

ታ ኢስታ ዎና።

ታ ኢስታፌ ታ ኣይፌሶ ዛሪዳ ዎዴ

ኢስታስ ኣዬ ኣና!

13 ኤፍሬሜይ ጺሮሴ ማላ

ሎኦ ጋዴን ቶኬቲን ቤኣዲስ፤

ሃኢ ጊዲኮ ኤፍሬሜይ

ባ ናይታ ሼምፖ ዎዛይታስ

ኣ ኢማና።

14 ጎዳዉ! ኔ ሃ ዴራስ

ኣይ ኢማኔ?

ኣዉጫዪዛ ኡሎኔ

ሹላ ን ኢማ!

ኢስራኤሌ ኣሳ ቦላ ጾሳ ፒርዳ

15 «ኢስቲ ጌልጌላን

ኦዳ ኢታቴ

ጋሶን ታ ኢስታ ኢጻዲስ፤

ኢስቲ ኦዳ ኢታ ኦሶ ጊሻስ

ታ ኬፌ ታ ኢስታ ጎዳና፤

ሃይሳፌ ጉዬካ

ታ ኢስታ ዶሲኬ፤

ኢስታ ካሌዛይቲ

ኡባይ ማካላንቻታ።

16 ኤፍሬሜይ ሾጬቲዴስ፤

ኢስታስ ጻጶይካ ሜሊዴስ፤

ኢስቲ ኢሻሎን ዲቺዳ ናይታ

ታ ዎና» ጌስ።

ሆሴኤይ ኢስራኤሌ ኣሳ ሴሪዴስ

17 ኢስቲ ኣዛዜቶንታ ኢጺዳ ጊሻስ

ታ ጾሲ ኢስታ ዬጊ ኣጋና፤

ኢስቲካ ካዎቴታ ጊዶን

ጮ ቶይላታና።